រាជធានីភ្នំពេញ ៖ ក្នុងរយៈពេល៥ខែដើមឆ្នាំនេះ កម្ពុជាបាននាំចេញអង្ករទៅបរទេសមានបរិមាណសរុបជាង២៥,៧ម៉ឺនតោន កើនឡើង១០% បើធៀបនឹងរយៈពេលដូចគ្នាឆ្នាំ២០១៦។ នេះបើយោងតាមតួលេខពីលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ ។
របាយការណ៍ក៏បានបញ្ជាក់ផងដែរពីប្រទេសគោលដៅដែលកម្ពុជានាំចេញអង្ករបានច្រើនជាងគេ ក្នុងនោះរួមមាន ចិនចំនួន៨,៨ម៉ឺនតោន បារាំង ៣,៣ម៉ឺនតោន, ប៉ូឡូញ ២,៣ម៉ឺនតោន, អង់គ្លេស ២ម៉ឺនតោន, ន័រវែស ១,២ម៉ឺនតោន,ប៊ែលហ្សិក ៩ពាន់តោន, ឆែក ៨ពាន់តោន និងអុីតាលី ៦ពាន់តោន ។ ចំណែកក្រុមហ៊ុនដែលនាំចេញអង្ករបានច្រើន រួមមាន Cristal Rice, Baitang, Apsara Rice, Khmer Foods, Amru Rice, Golden Rice, City Rice, Nikoline Investmen, Kolveasna Investment និងSignatures of Asia ជាដើម ។
អគ្គនាយកក្រុមហ៊ុនអេមរុ រាយស៍ លោកឧកញ៉ា សុង សារ៉ន មានប្រសាសន៍ថា នៅ៥ខែដើមឆ្នាំនេះ កម្ពុជានាំចេញច្រើនទៅទីផ្សារប្រទេសចិន ចំណែកនៅទីផ្សារសហគមអឺរ៉ុប ពុំមានការកើនឡើងនោះទេ ហើយក្នុងរយៈពេល៥ខែកន្លងទៅនេះសម្រាប់ក្រុមហ៊ុន អេមរុ រាយស៍ ពេញចិត្តនឹងអ្វីដែលបានដាក់នៅក្នុងផែនការ ។
លោកឧកញ៉ាបន្តថា ៖« យើងបានកំណត់ក្នុងផែនការគ្រោងនាំចេញអង្ករតែជាង៤ម៉ឺនតោនទេ តែមកដល់ពេលនេះយើងនាំចេញបាន២ម៉ឺនតោន ហើយរំពឹងថានៅដំណាច់ឆ្នាំ២០១៧នេះ ការនាំចេញអង្កររបស់ក្រុមហ៊ុនអាចបាន៥ម៉ឺនតោន លើសពីផែនការ »។
លោកឧកញ៉ា ភូ ពុយ នាយកក្រុមហ៊ុន បៃតងបានឱ្យដឹងថា ការនាំចេញអង្ករក្រុមហ៊ុនលោកនៅតែបន្ដកើនឡើង ហើយលោករំពឹងថា នៅដំណាច់ឆ្នាំ២០១៧នេះ នឹងសម្រេចបានកំណើនលើស៥០% ។
លោកឧកញ៉ាបន្តថា ៖« ការនាំចេញនៅអង្ករនៅតែបន្តកើនឡើង ហើយខ្ញុំរំពឹងថាសម្រាប់ក្នុងឆ្នាំ២០១៧នេះ ការនាំចេញអង្ករសរុបរបស់ក្រុមហ៊ុននឹងកើនឡើងលើស៥០%បើធៀបនឹងឆ្នាំ២០១៦ ដោយសារកសិករផលិតស្រូវបានច្រើន អាចឱ្យក្រុមហ៊ុនប្រមូលទិញស្រូវកិន កែច្នៃអង្ករនាំចេញបានច្រើន ។ ក្នុងនោះ មិនសម្រាប់តែក្រុមហ៊ុនបៃតងនោះទេ ក្រុមហ៊ុនផ្សេងទៀតក៏អាចនឹងនាំចេញកើនផងដែរ » ៕
ចែករំលែកព័តមាននេះ