រាជធានីភ្នំពេញ ៖ ជនសង្ស័យលួចមិនរើសមុខម្នាក់ បានគាស់បន្ទប់ចូលទៅលួចរបស់របរ ឃើញអង្ករក្នុងធុងបម្រុងលួចហើយ ស្រាប់តែម្ចាស់មកទាន់ឃាត់ខ្លួនប្រគល់ឲ្យសមត្ថកិច្ច បង្កឲ្យមានការភ្ញាក់ផ្អើលកាលវេលាម៉ោង០៤ទាបភ្លឺ ថ្ងៃទី២៦ ខែមិថុនា ឆ្នាំ២០១៧ នៅភូមិចំការឪឡឹក សង្កាត់កាកាប ខណ្ឌពោធិ៍សែនជ័យ ។
ជនសង្ស័យមានឈ្មោះ ទូច សោ អាយុ១៦ឆ្នាំ មុខរបរដើររើសអេតចាយ ស្នាក់នៅវត្តពោធិ៍ចិនតុង មានស្រុកកំណើតនៅខេត្តបាត់ដំបង ។ ជនរងគ្រោះមានឈ្មោះ សែម សាធ ភេទប្រុស អាយុ៥១ឆ្នាំ មុខរបរលក់ដូរ ស្នាក់នៅភូមិចំការឪឡឹក សង្កាត់កាកាប ខណ្ឌពោធិ៍សែនជ័យ មានស្រុកកំណើតនៅភូមិស្រែរំដួល ឃុំប្រសូត្រ ខេត្តស្វាយរៀង ។ តាមប្រភពព័ត៌មានពីម្ចាស់ផ្ទះឈ្មោះ សែម សាធ បាននិយាយថា នៅមុនពេលកើតហេតុ គាត់បានសម្រាកនៅផ្ទះមួយទៀតនៅមុខផ្ទះកើតហេតុ បន្ទាប់មកកូនប្រុសរបស់គាត់បានចូលទៅរៀបចំខ្លួនចេញទៅធ្វើការ ស្រាប់តែឃើញទ្វារផ្ទះបើកចំហ កូនគាត់បានចូលមើលបន្ទប់ឃើញជនសង្ស័យនៅក្នុងបន្ទប់ជួលរបស់ខ្លួន ហើយបានស្រែកប្រាប់ឪពុកខ្លួនថាមានចោរចូលផ្ទះ ភ្លាមៗនោះក៏ឃាត់បានជនសង្ស័យភ្លាមៗ ហើយបានប្តឹងសមត្ថកិច្ចមកអន្តរាគមន៍យកជនសង្ស័យទៅសួរនាំ ។ បើតាមការសារភាពរបស់ជនសង្ស័យ បានសារភាពថា ខ្លួនបានជិះកង់ចូលផ្ទះជនរងគ្រោះពិតប្រាកដមែន ដោយចូលទៅរុករកទ្រព្យសម្បត្តិ អ្វីក៏លួចដែរ តែមិនឃើញអ្វី ពេលចូលទៅដល់ ឃើញមានតែអង្ករនៅក្នុងធុង បម្រុងនឹងយក មិនទាន់បានផង ក៏ត្រូវកូនម្ចាស់ផ្ទះមកទាន់តែម្តង ។ ជនសង្ស័យបានសារភាពទៀតថា ខ្លួនធ្លាប់ធ្វើសកម្មភាពលួចបានចំនួន៦លើក ហើយត្រូវបានគេឃាត់ឲ្យសមត្ថកិច្ចផងដែរ តែដោយសារលួចរបស់របរបានតិចតួចពេក ម្ចាស់ពុំបានដាក់ពាក់បណ្តឹងទេ គ្រាន់តែឲ្យសមត្ថកិច្ចធ្វើកាអប់រំ ។
ក្រោយពេលកើតហេតុ ត្រូវបានជនរងគ្រោះដាក់ពាក្យបណ្តឹង ទើបសមត្ថកិច្ចឃាត់ខ្លួនកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ