ខេត្តពោធិ៍សាត់ ៖ ពួកកម្មករចិនផ្នែកតបណ្តាញវារីអគ្គិសនីប្រមាណជាង៣០នាក់ កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១៣ មីនា ឆ្នាំ២០១១ បានចូលអុកឡុកក្នុងហាងខារ៉ាអូខេ មួយយីហោ «សេរីរ័ត្ន» ស្ថិតក្នុងភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ ដោយបានប្រើអំពើហិង្សាវាយនារីខារ៉ាអូខេ និងវាយបំផ្លិចបំផ្លាញសម្ភារខូចខាតអស់ជាច្រើន រួចហើយនាំគ្នាគេចខ្លួនទៅបាត់អស់ ។
នារីខារ៉ាអូខេម្នាក់និយាយថា នៅយប់នោះ មុនដំបូងពួកកម្មករចិនមានគ្នាតែ៥នាក់ទេ ជិះរថយន្តវីហ្គោ មួយគ្រឿង ។ ពេលចូលមកដល់បានបបួលនាងទៅដេកនៅខាងក្រៅ តែនាងមិនព្រម ។ ដោយសារបបួលម្តងហើយម្តងទៀតនាងនៅតែមិនព្រម ពេលនោះស្រាប់តែកម្មករចិនដែលបបួលនាង បានទះនាងមួយកំផ្លៀងរួចធាក់មួយជើង ព្រមទាំងទាញកៅអីជ័រវាយក្បាលថែមទៀត ។ មិនអស់ចិត្ត គេបានទូរស័ព្ទហៅគ្នាគេមកបន្ថែម៣រថយន្តទៀត ដែលមានគ្នាសរុបប្រមាណពី៣៥ទៅ៤០នាក់ចូលមកវាយបំផ្លិចបំផ្លាញសម្ភារក្នុងហាង បណ្តាលឱ្យបែកបាក់ខូចខាតអស់មួយចំនួនធំ រួចហើយក៏នាំគ្នាចេញទៅបាត់អស់រលីង ដោយគ្មានការរារាំងណាមួយឡើយ ។
បើតាមម្ចាស់ហាងឈ្មោះលី សាត និងប្រពន្ធឈ្មោះគឹម ហេង និយាយថា ពេលចូលមកដំបូងពួកកម្មករចិនទាំងនោះ ទំនងសុទ្ធតែស្រវឹងស្រារួចបាត់ទៅហើយ ព្រមទាំងបញ្ចេញអាកប្បកិរិយាមិនសមរម្យទាល់តែសោះ ដោយនិយាយចិនស្រែកឡូឡាចរិតបែបកាចសាហាវ លើកតុក្រឡាប់ ទាត់ថូផ្កា វាយបំបែកកញ្ចក់ទ្វារ-បង្អួច ទូរទស្សន៍ យកកៅអីបោកបំបាក់ចោល ធ្វើពួកគាត់ភ័យនាំគ្នាឡើងទៅសម្ងំនៅខាងលើ ។ លុះពួកកម្មករចិនទាំងនោះចេញរថយន្តទៅអស់ ទើបចុះមកវិញឃើញសម្ភាររប៉ាត់រប៉ាយពេញផ្ទះតែម្តង ។ សម្ភារដែលខូចខាតមានក្បាលទូរទស្សន៍២គ្រឿង ក្បាលវីស៊ីឌី ចំនួន១គ្រឿង ក្បាលអំភ្លឺ១គ្រឿង ទូរស័ព្ទដៃ២គ្រឿង កៅអីជ័រ៩ កញ្ចក់ទ្វារ៨ផ្ទាំង កញ្ចក់ទូក៣ យកលុយ៣.០០០ដុល្លារ និងលុយខ្មែរ៦០.០០០រៀល ព្រមទាំងថូផ្កា និងសម្ភារមួយចំនួនទៀត ។ លុះព្រឹកឡើងថ្ងៃទី១៣ មីនា ទើបមានសមត្ថកិច្ចនគរបាលក្រុងពោធិ៍សាត់ ចុះទៅពិនិត្យ និងសាកសួរនៅកន្លែងកើតហេតុ ៕
ចែករំលែកព័តមាននេះ