ឃាត់ខ្លួនជនសង្ស័យម្នាក់ ខណៈធ្វើសកម្មភាពឆក់ការបូបពីស្ត្រីជនជាតិចិន
រាជធានីភ្នំពេញ ៖ ក្រុមជនសង្ស័យម្នាក់ក្នុងចំណោមបក្ខពួក៣នាក់ ជិះម៉ូតូសុទ្ធតែស៊េរីទំនើបឆ្នាំ២០១៧ ចំនួន២គ្រឿង ត្រូវបានកម្លាំងនគរបាលប៉ុស្តិ៍បឹងកេងកងទី១
រាជធានីភ្នំពេញ ៖ ក្រុមជនសង្ស័យម្នាក់ក្នុងចំណោមបក្ខពួក៣នាក់ ជិះម៉ូតូសុទ្ធតែស៊េរីទំនើបឆ្នាំ២០១៧ ចំនួន២គ្រឿង ត្រូវបានកម្លាំងនគរបាលប៉ុស្តិ៍បឹងកេងកងទី១ ធ្វើការចាប់ឃាត់ខ្លួន ខណៈដែលពួកគេបានធ្វើសកម្មភាពឆក់កាបូបពីស្ត្រីជនជាតិចិនម្នាក់មិនបានសម្រេចក៏ជួបជាមួយនឹងកម្លាំងល្បាតដេញចាប់បាន ហើយត្រូវប្រជាពលរដ្ឋឡោមព័ទ្ធចាប់បានវាយម្នាក់មួយដៃ មួយជើងបណ្តាលឱ្យសន្លប់ស្តូកស្តឹងរងរបួសយ៉ាងធ្ងន់ធ្ងរផងដែរ។ ករណីឆក់មិនបានសម្រេចនេះដែរបានកើតឡើងកាលពីវេលាម៉ោង៤ និង១៥នាទីល្ងាច ថ្ងៃទី២៦ ខែមិថុនា ឆ្នាំ២០១៧ នៅចំណុចផ្លូវព្រះនរោត្តម កែងនឹងផ្លូវលេខ២៨២ ក្នុងសង្កាត់បឹងកេងកងទី១ ខណ្ឌចំការមន។
តាមប្រភពព័ត៌មានពីនគរបាលបានប្រាប់ឱ្យដឹងថា ជនសង្ស័យដែលបានឃាត់ខ្លួនមានឈ្មោះ ម៉ូវ ចាន់និមិត្ត អាយុ១៨ឆ្នាំ ភេទប្រុស មុខរបរមិនពិតប្រាកដ មានទីលំនៅក្នុងភូមិឫស្សីស្រស់ សង្កាត់និរោធ ខណ្ឌច្បារអំពៅ។ មុនពេលកើតហេតុ យុវជនសង្ស័យបានជិះម៉ូតូម៉ាកហុងដា C125ស៊េរីឆ្នាំ២០១៧ ព៌ណខ្មៅ ពាក់ស្លាកលេខភ្នំពេញ១DD-៩៦៤៦ មួយគ្រឿងតែម្នាក់ឯង និងបក្ខពួកចំនួនពីរនាក់ទៀតគឺមានឈ្មោះ អាខ្លា និងអាឆក ជិះម៉ូតូម៉ាកហុងដា C125 ស៊េរីឆ្នាំ២០១៧ ពណ៌ខ្មៅ មិនចាំស្លាកលេខបាននាំគ្នាដើររកឆក់។ តាមប្រភពដដែលបានប្រាប់បន្តទៀតថា លុះមកដល់ចំណុចកើតហេតុខាងលើ បក្ខពួករបស់គេចំនួនពីរនាក់ដែលមានឈ្មោះ អាខ្លា និងអាឆក នោះបានធ្វើសកម្មភាពឆក់កាបូបពីស្ត្រីជនជាតិចិនម្នាក់់ដែលកំពុងតែដើរម្នាក់ឯងនៅតាមផ្លូវ ស្របពេលនោះកម្លាំងល្បាតរបស់លោកក៏មកដល់ល្មម ហើយពួកគេក៏នាំគ្នាព្យាយាមជិះម៉ូតូរត់។
ពេលនោះពួកគេទាំង៣នាក់ដែលជិះម៉ូតូសុទ្ធតែស៊េរីទំនើបជិះរត់ដល់ខាងកើតវិមានឯករាជ្យ កម្លាំងរបស់លោកក៏ធ្វើការឃាត់ខ្លួនបានជនសង្ស័យជាអ្នកបិទគូថបានម្នាក់់ ចំណែកឯពីរនាក់ទៀតជិះម៉ូតូរត់គេចខ្លួនបាត់ស្រមោល ភ្លាមនោះដោយក្រុមប្រជាពលរដ្ឋមានកំហឹងក៏នាំគ្នាឡោមព័ទ្ធចាប់វាយម្នាក់មួយដៃ មួយជើង សន្លប់ស្តូកស្តឹងរងរបួសយ៉ាងធ្ងន់ធ្ងរផងដែរ។ ក្រោយពេលកើតហេតុ ស្ត្រីជនជាតិចិនរងគ្រោះនោះបានបន្តដំណើរទៅបាត់ ចំណែកឯយុវជនជាជនសង្ស័យត្រូវបាននាំខ្លួនយកទៅធ្វើការសាកសួរ និងធ្វើកំណត់ហេតុនៅនគរបាលប៉ុស្តិ៍បឹងកេងកងទី១ ដើម្បីបញ្ជូនទៅកាន់អធិការដ្ឋាននគរបាលខណ្ឌចំការមនចាត់ការតាមច្បាប់ជាបន្តទៅទៀត៕
ចែករំលែកព័តមាននេះ