ទីបំផុត! បុរសមានប្រពន្ធ១២នាក់ កូននិងចៅ៦៧០នាក់ សម្រេចចិត្តឈប់បង្កើតសមាជិកគ្រួសារថ្មី
អ៊ូហ្គង់ដា ៖ នៅទីបំផុត កសិករជនជាតិអ៊ូហ្គង់ដាម្នាក់ ដែលមានប្រពន្ធសរុប១២នាក់ កូន១០២នាក់
អ៊ូហ្គង់ដា ៖ នៅទីបំផុត កសិករជនជាតិអ៊ូហ្គង់ដាម្នាក់ ដែលមានប្រពន្ធសរុប១២នាក់ កូន១០២នាក់ និងចៅ៥៦៨នាក់ បានសម្រេចចិត្តឈប់បន្ថែមសមាជិកនៅក្នុងក្រុមគ្រួសាររបស់គាត់ទៀតហើយ ដោយសារតែបញ្ហាហិរញ្ញវត្ថុ។ នេះបើយោងតាមប្រភពពីសារព័ត៌មាន The Sun ចេញផ្សាយកាលពីថ្ងៃទី២៧ ខែធ្នូ កន្លងទៅ។
លោក Musa Hasahya អាយុ៦៧ឆ្នាំ បានសុំប្រពន្ធរបស់គាត់ ដើម្បីប្រើវិធីពន្យារកំណើត ដើម្បីអាចមានលទ្ធភាពទិញហូបអាហារ សម្រាប់ចិញ្ចឹមបីបាច់សមាជិកគ្រួសារទាំងអស់។ លោកបាននិយាយថា «ប្រាក់ចំណូលរបស់ខ្ញុំកាន់តែទាប នៅប៉ុន្មានឆ្នាំមកនេះ ដោយសារតម្លៃនៃការចាយវាយរស់នៅប្រចាំបានឡើងថ្លៃ ហើយគ្រួសាររបស់ខ្ញុំកាន់តែមានសមាជិកច្រើនទៅៗ»។
នៅពេលមានការរិះគន់អំពីរឿងមានប្រពន្ធ និងកូនច្រើនបែបនេះ លោក Hasahya បាននិយាយថា «ខ្ញុំបានរៀបការជាមួយនារីម្នាក់ បន្ទាប់មកម្នាក់ហើយម្នាក់ទៀត។ តើបុរសអាចស្កប់ចិត្តនឹងនារីម្នាក់ដោយរបៀបណា?»។
លោក Hasahya និងគ្រួសាររបស់គាត់ រស់នៅក្នុងតំបន់ Lusaka នៃអ៊ូហ្គង់ដា ដោយនៅទីនោះ ពហុពន្ធភាពគឺស្របច្បាប់។ គាត់បាននិយាយថា ប្រពន្ធគាត់ទាំងអស់រស់នៅក្នុងផ្ទះតែមួយ ដូច្នេះគាត់អាចតាមដានពួកគាត់ ដោយបញ្ឈប់ពួកគាត់ពីការលួចលាក់ជាមួយបុរសផ្សេងទៀត ដែលរស់នៅក្នុងភូមិជាមួយគ្នា។
ប្រពន្ធចុងក្រោយរបស់លោក Hasahya មានឈ្មោះថា Zulaika ដែលជាម្ដាយរបស់កូនចំនួន១១នាក់របស់គាត់ បាននិយាយថា «ខ្ញុំមិនមានកូនទៀតទេ។ ខ្ញុំបានឃើញស្ថានភាពប្រាក់ចំណូលមិនល្អ ហើយឥឡូវនេះ ខ្ញុំកំពុងបានលេបថ្នាំពន្យារកំណើត ប៉ុន្តែថ្នាំពន្យារកំណើតគឺមានភាពចម្រូងចម្រាសនៅទីនេះ ហើយជារឿយៗត្រូវបានផ្សារភ្ជាប់ទៅនឹងភាពមិនច្បាស់លាស់យ៉ាងច្រើនផងដែរ»។
ប្រហែលមួយភាគបីនៃកូនរបស់លោក Hasayha ដែលមានអាយុចន្លោះពី ៦ទៅ៥១ឆ្នាំ រស់នៅជាមួយគាត់ក្នុងកសិដ្ឋានលក្ខណៈគ្រួសារ។ កូនពៅរបស់លោកគាត់មានអាយុ៦ឆ្នាំ ខណៈដែលកូនចាស់ជាងគេរបស់គាត់មានអាយុ៥១ឆ្នាំ ដែលចាស់ជាងប្រពន្ធចុងក្រោយរបស់គាត់ប្រហែល២០ឆ្នាំ។
បច្ចុប្បន្នលោក Hasayha មិនអាចបន្តធ្វើកិច្ចការបានទៀតនោះទេ ដោយសារតែមានវ័យកាន់តែចាស់ ហើយសុខភាពក៏មិនល្អផងដែរ ដែលបញ្ហានេះហើយ បានធ្វើឱ្យប្រពន្ធ២នាក់របស់គាត់ បានសម្រេចចិត្តចាកចេញគ្រួសារ ដោយសារតែសម្ពាធនៃបញ្ហាហិរញ្ញវត្ថុក្នុងគ្រួសារ៕ (ដកស្រង់ចេញពី The Sun)
ចែករំលែកព័តមាននេះ