ខេត្តកំពង់ចាម ៖ យុវជនម្នាក់ហេតុតែតូចចិត្តសុំលុយម្តាយមិនបាននោះក៏សំរេចចិត្តជិះម៉ូតូ១គ្រឿងម៉ាកC125 ស៊េរីឆ្នាំ២០១១ទៅលោតទឹកទន្លេមេគង្គពីលើស្ពានគីហ្ស៊ុណា
ខេត្តកំពង់ចាម ៖ យុវជនម្នាក់ហេតុតែតូចចិត្តសុំលុយម្តាយមិនបាននោះក៏សំរេចចិត្តជិះម៉ូតូ១គ្រឿងម៉ាកC125 ស៊េរីឆ្នាំ២០១១ទៅលោតទឹកទន្លេមេគង្គពីលើស្ពានគីហ្ស៊ុណា ត្រង់ផ្នែកកណ្តាលស្ពាន ។ ដែលហេតុការណ៏នេះកើតឡើងនៅវេលាម៉ោង៨និង១០នាទីព្រឹក ថ្ងៃទី២៤ ខែមិថុនា ឆ្នាំ២០១៧ ប៉ុន្តែសំណាងល្អត្រូវបានខ្មែរឥស្លាមបានចេញទូកទៅជួយស្រង់អាយុជីវិតទាន់ពេលវេលារួចផុតពីសេចក្តីស្លាប់ ។ ជនរងគ្រោះឈ្មោះ ហុង ដារ៉ូ អាយុ២២ឆ្នាំ រស់នៅភូមិចុងថ្នល់ទី១ សង្កាត់បឹងកុក ក្រុងកំពង់ចាម ប្រាប់ឲ្យដឹងថា នៅពេលមុនកើតហេតុរូបគេបាននិយាយទៅកាន់ម្តាយសុំលុយចំនួន២០០ដុល្លារដើម្បីទិញរបស់របរសម្រាប់យកមកលក់នៅផ្ទះ ប៉ុន្តែត្រូវបានម្តាយមិនឲ្យ បន្ទាប់មកក៏បានជិះម៉ូតូរបស់ខ្លួនចេញមកកាន់ស្ពានគីហ្ស៊ុណា ឡើងលើបង្កាន់ដៃស្ពានលោតចូលទៅក្នុងទឹកទន្លេមេគង្គដើម្បីធ្វើអត្តឃាត ។ តែនៅពេលក្រោយលោតបានផុសចេញពីទឹកមកវិញអណ្តែតទៅតាមខ្សែទឹកហូរក៏ត្រូវបានគេមកជួយសង្គ្រោះដឹកមកកាន់ត្រើយកំពង់ចាម និងត្រូវបាននគរបាលនាំមកកាន់អធិការដ្ឋាននគរបាលក្រុងកំពង់ចាមដើម្បីសួរនាំរឿងហេតុដែលធ្វើឲ្យរូបគេលោតទឹក ។
អ្នកស្រី ង៉ូវ សុថារី អាយុ៥០ឆ្នាំ ត្រូវជាម្តាយអ្នករងគ្រោះបានប្រាប់ឲ្យដឹងថា នៅពេលមុនកើតហេតុកូនប្រុសរបស់គាត់ពិតជាបានសុំលុយចំនួន២០០ដុល្លារពីរូបគាត់មែនដោយបានសុំយកទៅសម្រាប់ឲ្យថ្លៃជួលបន្ទប់នៅខាងក្រៅផ្ទះទៅវិញ ។ ទើបគាត់មិនព្រមឲ្យនោះទេ ព្រោះថាបើជួលគេនៅយ៉ាងច្រើនបាន២ទៅ៣ខែនឹងអស់លុយហើយគឺគាត់មិនឲ្យទៅកូនឈ្មោះ ដារ៉ូ នេះទេ ។ អ្នកស្រី សុថារី ម្តាយរងគ្រោះប្រាប់បន្តថា ទោះបីជាមិនមានលុយក៏សុខចិត្តទៅខ្ចីលុយគេយកមកឲ្យកូនដែរឲ្យតែប្រើមានប្រយោជន៏ដល់គ្រួសារ បន្ទាប់មកកូនប្រុសបាននិយាយទូរស័ព្ទជាមួយនឹងសង្សាររបស់ខ្លួនយំបង្ហូរទឹកភ្នែករួចមកទទូចសុំ២០០ដុល្លារទិញទូរស័ព្ទដៃ១គ្រឿងយកទៅប្រើប្រាស់គាត់មិនឲ្យទៀត ហើយក៏សុំពីគាត់២០ដុល្លារនូវតែមិនឲ្យ ។ ហើយកូនប្រុសនេះបានយកមកម៉ូតូជិះចេញមកក្រៅប្រាប់ថា ជិះចេញទៅធ្វើការនៅកន្លែងដែលបានដាក់ពាក្យជាប់ផ្នែកសន្តិសុខនៅកន្លែងមួយក្នុងក្រុងកំពង់ចាម នូវពេលដែលជិះចេញមិនបានប៉ុន្មានផងស្រាប់តែមាននគរបាល២នាក់ជិះម៉ូតូមកប្រាប់ដល់ផ្ទះថា កូនប្រុសគាត់បានលោតទឹកពីលើស្ពានគីហ្ស៊ុណាធ្វើគាត់រន្ធត់ចិត្តក៏ប្រញាប់ចេញមកមើលកូនប្រុសជាបន្ទាន់ ។
គាត់បានលើកឡើងថា កូនបងទើបតែដោះស្រាយគ្រោះថ្នាក់ចរាចរហើយថ្មីៗនៅអធិការដ្ឋាននគរបាលក្រុងកំពង់ចាមមកដល់ពេលនេះកូនប្រុសនេះចូលមកកន្លែងប៉ូលិសទៀតកូនប្រុសឈ្មោះ ដារ៉ូ មានបញ្ហាររលាកច្រមុះដោយសារតែកូនមិនស្តាប់ក៏បានឲ្យសមត្ថកិច្ចយកទឹកនោមតេស្តរកមើលសារធាតុញៀនតែមិនឃើញនោះទេ បើកូននេះមិនស្តាប់ដំបូន្មានឪពុកម្តាយទេមានតែបណ្តោយតាមយថាកម្មទៅចុះ ៕
ចែករំលែកព័តមាននេះ