ខេត្តបាត់ដំបង ៖ សេចក្តីរាយការណ៍ឱ្យដឹងថា បុរសម្នាក់ដែលត្រូវបានចោទពីបទរំលោភសេចក្តីទុកចិត្ត ក្នុងករណីរកស៊ីទិញ-លក់រថយន្តចូលគ្នា ក្នុងទឹកប្រាក់ប្រហែលចំនួន៥ម៉ឺនដុល្លារនោះ ត្រូវបានចៅក្រមស៊ើបសួរសម្រេចឃុំខ្លួនដាក់ពន្ធនាគារហើយ កាលពីវេលាម៉ោង១២ថ្ងៃត្រង់ថ្ងៃទី២៤ មិថុនា នេះ ។
ជនជាប់ចោទឈ្មោះអ៊ឹង ហេងលាភ អាយុ២៩ឆ្នាំ មុខរបរទិញ-លក់រថយន្ត មានទីលំនៅក្នុងភូមិចំការសំរោង សង្កាត់ចំការសំរោង ក្រុងបាត់ដំបង រីឯដើមបណ្តឹងឈ្មោះវ៉ាន់ សុខ ។
គួររំលឹកថា ការិយាល័យបទល្មើសព្រហ្មទណ្ឌខេត្តបាត់ដំបង បានអនុវត្តសាលដីកាបញ្ជាឱ្យចូលខ្លួន កាលពីវេលាម៉ោង១១ព្រឹកថ្ងៃទី២២ មិថុនា ។ ក្រោយមក កម្លាំងការិយាល័យក៏បានចុះទៅដល់ចំណុចភូមិខាងលើ ធ្វើការចាប់ខ្លួនបុរសនោះតាមដីកាលេខ២៤ ដបខ/២០១៧ ចុះថ្ងៃទី២១ មិថុនា របស់លោកហេង លុយ ព្រះរាជអាជ្ញារងអមសាលាដំបូងខេត្តបាត់ដំបង ដោយពីបទរំលោភលើទំនុកចិត្ត បានប្រព្រឹត្តកាលពីថ្ងៃទី១៩ មិថុនា ២០១៥ កន្លងមក ស្ថិតនៅសង្កាត់បឹងទំពុន ខណ្ឌមានជ័យ រាជធានីភ្នំពេញ ។
ប្រភពចុងក្រោយបានបង្ហើបថា បុរសជាប់ចោទខាងលើនេះ មានអ្នកធំចង់រត់ការឱ្យនៅក្រៅឃុំដែរ តែមិនអាចធ្វើទៅរួច ។
ចែករំលែកព័តមាននេះ