រាជធានីភ្នំពេញ ៖ ក្មេងស្រីអាយុ៩ឆ្នាំម្នាក់ ដែលរៀននៅសាលាបឋមសិក្សាទួលស្វាយព្រៃ ក្នុងខណ្ឌចំការមន ត្រូវជនមិនស្គាល់មុខម្នាក់បានល្បួងហៅនាងជិះម៉ូតូ យកទៅបាត់ដូចមានក្នុងរូបថតដែលថតបាន ដោយកាមេរ៉ាសុវត្ថិភាពនៅទីនោះ វេលាម៉ោងប្រមាណ១០ព្រឹកថ្ងៃទី២៣ មិថុនា ម្សិលមិញ ។ ក្រោយពីទទួលបានពាក្យបណ្តឹង លោកនាយឧត្តមសេនីយ៍ ជួន សុវណ្ណ ស្នងការនគរបាលរាជធានី បានបញ្ជាឲ្យសមត្ថកិច្ចខណ្ឌចំការមន ធ្វើការស្រាវជ្រាវជាបន្ទាន់ ។
ការបាត់ខ្លួនសិស្សស្រីនេះ បានធ្វើឱ្យក្រុមគ្រួសារទាំងមូល បាននឹងកំពុងតាមស្វះស្វែងរក ព្រមទាំងអំពាវនាវឱ្យសមត្ថកិច្ចពាក់ព័ន្ធជួយអន្ដរាគមន៍ ។ ហេតុការណ៍នេះ បានកើតឡើងនៅវេលាម៉ោងប្រមាណ១០ព្រឹកថ្ងៃទី២៣ មិថុនា ។ បុរសជាឪពុកឈ្មោះ កែវ សុថារិទ្ធ អាយុ៣៦ឆ្នាំ ប្រពន្ធឈ្មោះស៊ីម សុជាតិ មានមុខរបរផ្ញើម៉ូតូ និងលក់ចាប់ហួយបន្តិចបន្ទួចនៅផ្ទះ ស្នាក់នៅលេខ៥២ ផ្លូវលេខ៣១០ ក្នុងសង្កាត់ទួលស្វាយព្រៃទី២ ខណ្ឌចំការមន បានរៀបរាប់ប្រាប់ឱ្យដឹងថា មុនពេលកើតហេតុ កាលពីវេលាម៉ោង១០ អ្នកគ្រូបង្រៀនម្នាក់ បានទូរស័ព្ទទៅសួរអ្នកគ្រូម្នាក់ទៀត ដែលមានផ្ទះនៅទល់មុខផ្ទះរបស់គាត់ដោយបានសួរថា តើម្តាយក្មេងស្រីម្នាក់ឈ្មោះកែវ កញ្ញណា ហៅអេនណា មានបានមកយកកូនទៅផ្ទះទេ ព្រោះមិនបានឃើញនាងចូលរៀនទេ ឃើញតែកាតាបនៅលើតុរបស់នាង ។
ក្រោយពីទទួលបានទូរស័ព្ទពីអ្នកគ្រូម្នាក់ពីសាលារួចហើយ អ្នកគ្រូម្នាក់នោះ ក៏បានទៅសួរពួកគាត់នៅឯផ្ទះ តែត្រូវបានពួកគាត់ឆ្លើយថា «មិនបានទៅយកនាងមកផ្ទះទេ» ទើបមានការភ្ញាក់ផ្អើលឡើង និងនាំគ្នាមករកមើលកូននៅថ្នាក់រៀន តែមិនឃើញ ឃើញតែកាតាបនៅលើតុក៏ទៅដាក់ពាក្យបណ្តឹងនៅប៉ុស្តិ៍នគរបាលទួលស្វាយព្រៃទី២ ដែលនៅក្បែរនោះតែម្តង ។
តាមប្រភពដដែលបានប្រាប់បន្តទៀតថា កូនស្រីរបស់គាត់មានឈ្មោះកែវ កញ្ញណា ហៅ អេន ណា អាយុ៩ឆ្នាំ ពីមុនមកនាងរៀននៅសាលាឯកជនមួយឈ្មោះ អាត់វេនធីស នៅម្តុំទួលគោក ។ ដោយសារតែនាងរៀនខ្សោយផ្នែកភាសាខ្មែរ និងស្របពេលដែលសាលាវ៉ាកងនោះ ទើបកាលពីថ្ងៃទី២០ មិថុនា ត្រូវនឹងថ្ងៃអង្គារកន្លងមកនេះ យកនាងមកផ្ញើឱ្យរៀនថ្នាក់ទី៣ នៅសាលាទួលស្វាយព្រៃ បានតែរយៈពេល៣ថ្ងៃប៉ុណ្ណោះ កូនស្រីរបស់គាត់ក៏បាត់ពីសាលាតែម្តង ។
ក្រោយពីបាត់កូនស្រីរួចហើយនោះ រូបគាត់ក៏បានធ្វើការស្រាវជ្រាវ និងសាកសួរទៅរកតាមផ្ទះបងប្អូនរបស់គាត់អស់ហើយ នៅតែមិនមានអ្នកណាម្នាក់បានឃើញនាងឡើយ រហូតមកដល់ល្ងាចថ្ងៃដដែលនេះ ក៏បានប្តឹងទៅកម្លាំងនគរបាល និងកងរាជអាវុធហត្ថអោយជួយស្រាវជ្រាវរក ។
តាមប្រភពព័ត៌មានពីមន្ត្រីនគរបាលម្នាក់បានប្រាប់ឱ្យដឹងថា ក្រោយពីមានការភ្ញាក់ផ្អើលពីករណីបាត់ក្មេងស្រីខាងលើរួចហើយ ឪពុកម្តាយក្មេងស្រីខាងលើ ក៏បានមកដាក់ពាក្យបណ្តឹងនៅនគរបាលប៉ុស្តិ៍ទួលស្វាយព្រៃទី២របស់លោក ហើយកម្លាំងរបស់លោក ក៏បានធ្វើការស្រាវជ្រាវភ្លាមៗ ដោយធ្វើការសាកសួរក្មេងៗសិស្សសាលា និងឆែកកាមេរ៉ាសុវតិ្ថភាពតាមផ្ទះក្បែរៗនោះផងដែរ ។
ក្នុងការស្រាវជ្រាវនោះដែរ កម្លាំងរបស់លោកក៏បានទទួលព័ត៌មានតាមរយៈក្មេងៗថា «ខណៈពេលដែលពួកគេចេញលេងនោះ មាននារីវ័យក្មេងម្នាក់ចូលទៅក្នុងបរិវេណសាលានិងដើរបបួលពួកគេថា តើមានអ្នកណាចង់ទៅដើរលេងនៅកោះពេជ្រជាមួយនាងទេ» តែមិនមានអ្នកណាម្នាក់ទៅឡើយ និងតាមរយៈកាមេរ៉ាសុវត្ថិភាព គេបានឃើញក្មេងស្រីម្នាក់នោះជិះម៉ូតូមិនស្គាល់ម៉ាកមួយគ្រឿង ជាមួយនិងជនសង្ស័យម្នាក់តាមច្រកទ្វារតូចមួយ ខាងក្រោយប៉ុស្តិ៍របស់លោកឆ្ពោះទៅតាមបណ្តោយផ្លូវលេខ៣៧៤ ទៅទិសខាង កើតបាត់ទៅ ហើយកម្លាំងរបស់លោកកំពុងតែដុតដៃដុតជើងក្នុងការស្រាវជ្រាវរកផងដែរ ។
តាមប្រភពព័ត៌មានមួយទៀតថា មានបុរសម្នាក់មកហៅនាងអេនណា ដោយប្រាប់ថា ម្តាយគ្រោះថ្នាក់ចរាចរណ៍ឱ្យមកតាមហៅនាងទៅបន្ទាន់ ទើបនាងឡើងជិះម៉ូតូទៅជាមួយដូចមានរូបថតក្នុងកាមេរ៉ាសុវត្ថិភាព ។ តាមព័ត៌មានចុងក្រោយនៅវេលាម៉ោង៦និង៤៥នាទីល្ងាចថ្ងៃដដែល មន្ត្រីប៉ូលិសបានផ្ដល់ព័ត៌មានឱ្យដឹងថា ក្មេងស្រីដែលគេនាំយកទៅនោះ ត្រូវបានរ៉ឹម៉កម៉ូតូ(កង់៣)ដឹកនាងមកសាលារៀនវិញហើយ ប៉ុន្តែរឿងរ៉ាវបែបណានោះមិនទាន់ដឹងនៅឡើយទេ ។
ចែករំលែកព័តមាននេះ