ខេត្តរតនគិរី ៖ ជនសង្ស័យចំនួន៣នាក់ ត្រូវបានសមត្ថកិច្ចខេត្តសហការណ៍ជាមួយកម្លាំងអធិការដ្ឋាននគរបាលស្រុកលំផាត់ ធ្វើការបង្ក្រាបតាមបណ្តឹងជនរងគ្រោះ អំពីករណីប្រើអំពើហិង្សាក្នុងគ្រួសារ និងសេពគ្រឿងញៀន ។ ការឃាត់ខ្លួននេះបានធ្វើឡើងនៅវេលាម៉ោង១៧និង៣០នាទី ថ្ងៃទី២១ ខែមិថុនា ឆ្នាំ២០១៧ នៅចំណុចកន្លែងជីកត្បូង ស្ថិតក្នុងភូមិចងរ៉ា ឃុំបាតាង ស្រុកលំផាត់ ខេត្តរតនគិរី ។
តាមប្រភពពីលោកអធិការស្រុកលំផាត់ បានឱ្យដឹងថា ៖ ប៉ុស្តិ៍សន្ដិសុខអូរស៊ិនលែរ៍ បានទទួលបណ្តឹងពីជនរងគ្រោះឈ្មោះ បូស្រីមុំ ភេទស្រី បានប្តឹងថា ប្តីរបស់ខ្លួន និងបក្ខពួកចំនួន២នាក់ទៀត សេពគ្រឿងញៀនរាល់ថ្ងៃ និងប្តីរបស់គាត់បានប្រើអំពើហិង្សាលើរូបរាងកាយ (វាយដំ) មកលើរូបគាត់ កាលពីថ្ងៃទី២០ ខែមិថុនា ឆ្នាំ២០១៧ បណ្តាលឲ្យរងរបួសម្រាមដៃនាងខាងឆ្វេង(របួសស្រាល) ។ លោកបន្តថាក្រោយពីប៉ុស្ដិ៍ទទួលបណ្ដឹងរួច យោងតាមបញ្ជាតាមរយៈទូរស័ព្ទដៃរបស់លោក ជា ពេជ្យ ព្រះរាអាជ្ញាអមសាលាដំបូងខេត្តរតនគិរី លោកឧត្ដមសេនីយ៍ ផែន ឌីណា និងលោកវរសេនីយ៍ឯក លាង អ៊ីម និងកម្លាំងប៉ុស្តិ៍ បានសហការណ៏ជាមួយប្រជាការពារភូមិ បានចុះបង្ក្រាបបទល្មើសសេពគ្រឿងញៀននោះភ្លាម ឃាត់ខ្លួនបានជនសង្ស័យចំនួន៣នាក់ រួមមាន ១.ឈ្មោះ សុខ គាំ ភេទប្រុស អាយុ៣៣ឆ្នាំ ជនជាតិខ្មែរ មុខរបរកម្មករជីកត្បូង រស់នៅភូមិឃុំកើតហេតុខាងលើ ។ ២.ឈ្មោះ ហាន សួគា ភេទប្រស អាយុ២៧ឆ្នាំ ជនជាតិខ្មែរ មុខរបរកម្មករជីកត្បូង រស់នៅភូមិ ឃុំខាងលើ ។ ៣.ឈ្មោះ អំ សំអុល ភេទប្រុស អាយុ២០ឆ្នាំ ជនជាតិខ្មែរ មុខរបរកម្មករជីកត្បូង រស់នៅភូមិឃុំកើតហេតុខាងលើ ។ ជនរងគ្រោះឈ្មោះ បូ ស្រីមុំ ភេទស្រី អាយុ២៩ឆ្នាំ ជនជាតិខ្មែរ រស់នៅភូមិឃុំកើតហេតុខាងលើ ត្រូវជាប្រពន្ធរបស់ជនសង្ស័យឈ្មោះ សុខ គាំ ។ ហើយតាមការសាកសួរ ជនសង្ស័យទាំង៣នាក់បានឆ្លើយសារភាពថា ខ្លួនពិតជាបានប្រព្រឹត្តិពិតប្រាកដមែន ។ កម្លាំងជំនាញ និងកម្លាំងប៉ុស្ដិ៍ បានចុះត្រួតពិនិត្យកន្លែងកើតហេតុ ប្រមូលយកវត្ថុតាងដបទឹកសុទ្ធ ទុយោ ដែកកេះចំនួន០៣ និងសម្ភារមួយចំនួនទៀត ដែលជាឧបករណ៍សម្រាប់សេពគ្រឿងញៀន និងបានធ្វើតេស្តទឹកនោម ពិតជាមានសារធាតុញៀន ។
យោងតាមចម្លើយសារភាព និងវត្ថុតាំង សមត្ថកិច្ចបានកសាងសំណុំរឿងបញ្ជូនជនសង្ស័យទៅសាលាដំបូងខេត្តរតនគិរី ដើម្បីចាត់ការតាមនីតិវិធីច្បាប់ ។
ចែករំលែកព័តមាននេះ