រាជធានីភ្នំពេញ ៖ សង្ស័យជារឿងគំនុំបុរសជាអ្នករត់រ៉ឺម៉កម៉ូតូម្នាក់ ដឹកមិត្តភក្ដិ២នាក់ទៅផឹកស៊ីនៅផ្ទះមិត្តភក្ដិម្នាក់ទៀត ហើយមានទំនាស់ជាមួយជនដៃដល់ម្នាក់តាមផ្លូវ បានដកកាំភ្លើងបាញ់មួយគ្រាប់ចំដើមទ្រូងខាងឆ្វេង ធ្លាយទៅខាងស្តាំរងរបួសធ្ងន់ធ្ងរ បញ្ជូនដល់មន្ទីរពេទ្យកាល់ម៉ែត បានស្លាប់ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង០៩និង៥០នាទីយប់ ថ្ងៃទី២៣ ខែមិថុនា ឆ្នាំ២០១៧ តាមបណ្តោយផ្លូវព្រះនរោត្តម នៅចំណុចអាកាសចរណ៍ស៊ីវិល ស្ថិតនៅក្នុងក្រុម៣៧ភូមិ៧ សង្កាត់ទន្លេបាសាក់ ខណ្ឌចំការមន ។
ជនរងគ្រោះដែលស្លាប់មានឈ្មោះ ឡុច វីម ភេទប្រុស អាយុ២៧ឆ្នាំ មុខរបររត់រ៉ឺម៉កម៉ូតូ ស្នាក់នៅភូមិឬស្សី សង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅស្រុកឃុំរក្សជ័យ ស្រុកបាភ្នំ ខេត្តព្រៃវែង មានប្រពន្ធឈ្មោះ ឈាន ស៊ាន់ អាយុ២៤ឆ្នាំ មុខរបរធ្វើស្រែចំការ មានស្រុកកំណើតនៅភូមិស្វាយតានី ឃុំបឹងព្រះ ស្រុកបាភ្នំ ខេត្តព្រៃវែង មានកូនតូច២នាក់ ។ មិត្តភក្ដិដែលរួមដំណើរជាមួយ ទី១.ឈ្មោះ ញ្ញេប រីត ភេទប្រុស អាយុ១៩ឆ្នាំ មុខរបរជាអ្នករត់រ៉ឺម៉កម៉ូតូ ស្នាក់នៅផ្លូវ១៧២ សង្កាត់ផ្សារថ្មី៣ ខណ្ឌដូនពេញ និងទី២.ឈ្មោះ ដៀប លីដា ភេទប្រុស អាយុ៣២ឆ្នាំ មុរបរជាអ្នករត់រ៉ឺម៉កម៉ូតូ ស្នាក់នៅផ្ទះជួលគ្មានលេខ សង្កាត់ចាក់អង្រែក្រោម ខណ្ឌមានជ័យ ។ ប្រភពព័ត៌មានពីមិត្តភក្ដិទាំង២នាក់ ដែលរួមដំណើរជាមួយបានឲ្យដឹងថា មុនពេលកើតហេតុពួកគាត់ទាំង៣នាក់ បានផឹកស៊ីនៅចំណុចដែលខ្លួនឈប់ចាំដឹកម៉ូយ ខណៈពេលផឹកស្រាអស់ម្នាក់៣ទៅ៤កំប៉ុង ស្រាប់តែមិត្តភក្ដិឈ្មោះ ដៀប លីដា បានបបួលហៅទៅផឹកស៊ី នៅផ្ទះគេបន្តទៀត នៅចាក់អង្រែក្រោម ខណ្ឌមានជ័យ ដោយជនរងគ្រោះបើករ៉ឺម៉កម៉ូតូដឹកមិត្តភក្ដិ២នាក់ មកដល់ចំណុចកើតហេតុខាងលើ ស្រាប់តែលេចមុខជនបង្កម្នាក់ មិនស្គាល់អត្តសញ្ញាណជិះម៉ូតូ Honda Icon ពណ៌សលាយខ្មៅ មិនចាំស្លាកលេខ បានជិះទៅជិត ហើយវាយទៅលើជនរងគ្រោះ ដែលកំពុងតែបើករ៉ឺម៉កម៉ូតូចំនួនមួយដៃ ចំស្មា ពេលនោះជនរងគ្រោះរួមនឹងមិត្តភក្តិ២នាក់ទៀត បានព្រួតគ្នាវាយជនបង្កវិញ ។ ភ្លាមៗនោះ ជនបង្កបានទៅមុខហួសបានបន្តិច ក៏បានបត់ត្រលប់ក្រោយ ហើយដកកាំភ្លើងមិនស្គាល់ម៉ាក បាញ់សំដៅទៅជនរងគ្រោះ ចំនួនមួយគ្រាប់ ចំដើមទ្រូងខាងឆ្វេង ក៏ធ្លាយទៅទ្រូងខាងស្តាំរងរបួសធ្ងន់ ហើយជនដៃដល់ក៏បានបើកម៉ូតូរត់គេចខ្លួនបាត់ស្រមោល ចំណែកឯជនរងគ្រោះបានបញ្ជូនទៅដល់មន្ទីរពេទ្យកាល់ម៉ែត ក៏បានដាច់ខ្យល់ស្លាប់ ធ្វើឲ្យម្តាយជនរងគ្រោះ និងប្រពន្ធបានស្រែកយំបោកខ្លួននៅមន្ទីរពេទ្យ ។ ប្រភពដដែលបន្តទៀតថា ករណីខាងលើ ជារឿងគំនុំ ហើយខ្មាញ់កាំភ្លើង និងជនរងគ្រោះអាចជាមនុស្សស្គាល់គ្នា ។ ជនរងគ្រោះទើបតែទិញរ៉ឺម៉កម៉ូតូយកមករត់បានជាង១០ថ្ងៃប៉ុណ្ណោះ កើតមានរឿងតែម្តង ។
ជុំវិញករណីខាងលើនេះ សមត្ថកិច្ចបានបញ្ជាក់ជំហានដំបូងថា ករណីនេះសង្ស័យជារឿងគំនុំ នគរបាលខណ្ឌចំការមន រួមនឹងកងរាជអាវុធហត្ថខណ្ឌចំការមន កំពុងតែធ្វើការស្រាវជ្រាវរកជនដៃដល់ ដើម្បីយកមកផ្តន្ទាទោសតាមច្បាប់ ។ ចំណែកសពជនរងគ្រោះ ត្រូវបានសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើត ៕
ចែករំលែកព័តមាននេះ