ខេត្តកំពត៖ មន្ត្រីជាន់ខ្ពស់ក្រសួងទេសចរណ៍ បានដឹកនាំកិច្ចប្រជុំ ស្តីពី ផែនការអនុវត្តគោលការណ៍ណែនាំ ស្តីពី ការរៀបចំទីក្រុងកំពត ជាទីក្រុងទេសចរណ៍ គ្មានផ្សែងបារី។ កិច្ចប្រជុំនោះចូលរួមពីលោក លាង រឿនសុធី អភិបាលក្រុងកំពត និងលោក សយ ស៊ីណុល ប្រធានមន្ទីរទេសចរណ៍ ខេត្តកំពត ផងដែរ។
លោក ហោ សារុន រដ្ឋលេខាធិការក្រសួងទេសចរណ៍ បានលើកទ្បើងថា កិច្ចប្រជុំ នាពេលនេះគឺមានគោលបំណង ជួយលើកកម្ពស់ការយល់ដឹង និងលើកទឹកចិត្តឲ្យមានការចូលរួមពីគ្រប់ផ្នែកទាំងអស់ ដើម្បីការពារសុខុមាលភាពរបស់ប្រជាជន ភ្ញៀវទេសចរ ការពារ និងទប់ស្កាត់ ការរងផ្សែង ផលិតផលថ្នាំជក់ ដែលបង្កឲ្យមានហានិភ័យសុខភាពដល់អ្នកនៅជុំវិញ និងបរិស្ថាន។
ទន្ទឹមនោះ កាត់បន្ថយផលប៉ះពាល់ដល់សុខភាពសេដ្ឋកិច្ចសង្គម និងបរិស្ថាន ដែលបណ្តាលមកពីផលិតផលថ្នាំជក់ តាមរយៈការផ្សព្វផ្សាយ និងការជំរុញអនុវត្តច្បាប់ ស្តីពី ការត្រួតពិនិត្យផលិតផលថ្នាំជក់ និងលិខិតបទដ្ឋានគតិយុត្តិនានា សេចក្តីណែនាំ ស្តីពី បរិស្ថាន គ្មានផ្សែងបារី ដល់ម្ចាស់មូលដ្ឋាន អាជីវកម្មសេវាកម្មទេសចរណ៍ទូទាំងព្រះរាជាណាចក្រកម្ពុជា និងជា ពិសេស គឺជំរុញទីក្រុងកំពត ជាទីក្រុងទេសចរណ៍គ្មានផ្សែងបារី។
លោកបន្តថា អ្វីដែលសំខាន់ទៀតនោះ កិច្ចប្រជុំ នឹងជួយទាញការចាប់អារម្មណ៍របស់យើងទាំងអស់គ្នាឲ្យមានការយកចិត្តទុកដាក់បន្ថែមទៀត ក្នុងការកសាងបរិស្ថានមួយ ដែលគ្មានផ្សែងបារី ដើម្បីខេត្តកំពតរបស់យើង ក្លាយជាគោលដៅទេសចរណ៍ស្អាត បៃតង និងមានសុវត្ថិភាព និងជាគោលដៅនៃការរៀបចំព្រឹត្តិការណ៍ជាតិ និងអន្តរជាតិធំៗ ជាពិសេសពិធីបុណ្យសមុទ្រ ដែលនឹងរៀបចំធ្វើជាម្ចាស់ផ្ទះនៅឆ្នាំបន្តបន្ទាប់តាមរង្វិលជុំ។
លោករដ្ឋលេខាធិការ បានលើកទ្បើងថា ដើម្បីជំរុញទីក្រុងកំពតជាទីក្រុងទេសចរណ៍គ្មានផ្សែងបារី យើងត្រូវចូលរួមអនុវត្តតាមផែនការអនុវត្ត គោលការណ៍ណែនាំស្តីពីការរៀបចំទីក្រុងកំពតជាទីក្រុងទេសចរណ៍គ្មានផ្សែងបារី។
លោក ហោ សារុន ក្នុងនាមក្រុមការងារបរិស្ថានគ្មានផ្សែងបារី ក្នុងវិស័យទេសចរណ៍ បានថ្លែងអំណរគុណដល់ក្រុមការងាររបស់រដ្ឋបាលក្រុងកំពត សហភាពសហព័ន្ធយុវជនកម្ពុជា ក្រុងកំពត និងសមត្ថកិច្ចពាក់ព័ន្ធ ដែលបានចូលរួមយ៉ាងសកម្មក្នុងការចុះបិទស្លាកសញ្ញា និងលើកផ្លាកសញ្ញាស្តីពីការ ហាមជក់បារីនិងបារីអេឡិកត្រូនិក នៅតាមទីផ្សារ និងទីកន្លែងហាមឃាត់ដទៃទៀតផងដែរ។
សូមបញ្ជាក់ផងដែរថា តាមផែនការ នៅខែក្រោយនេះ ក្រុមការងារបរិស្ថានគ្មានផ្សែងបារី ក្នុងវិស័យទេសចរណ៍ នឹងវាយតម្លៃការអនុវត្តបរិស្ថានគ្មានផ្សែងបារី នៅតាមមូលដ្ឋានអាជីវកម្មសេវាកម្មទេសចរណ៍នានា ក្នុងក្រុងកំពត ដើម្បីរៀបចំបែបបទពេញលេញក្នុងការបញ្ចូលទីក្រុងកំពត ជាទីក្រុងទេសចរណ៍គ្មានផ្សែងបារី និងទទួលស្គាល់ ពីសម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ផងដែរ៕ សុខ សារ៉ាយ
ចែករំលែកព័តមាននេះ