ខេត្តបន្ទាយមានជ័យ ៖ នៅព្រឹកថ្ងៃទី២៣ ខែមិថុនា ឆ្នាំ២០១៧ ប្រតិភូកម្ពុជាមួយក្រុមបានចេញពីកម្ពុជាតាមច្រកទ្វារអន្តរជាតិប៉ោយប៉ែត ដើម្បីទៅជួបពិភាក្សាជាមួយភាគីថៃនៅស្រុកអារញ្ញ ខេត្តស្រះកែវ ស្តីពីការកសាងស្ពានព្រំដែនច្រកអន្តរជាតិថ្មី ស្ទឹងបត់ណងអៀន ។
ភាគីកម្ពុជា គេឃើញដឹកនាំដោយលោក ភ័ក្រ វ័ន្តមុន្នី រដ្ឋលេខាធិការក្រសួងសាធារណៈការ និងដឹកជញ្ជូន អមដោយលោក សួន បវរ អភិបាល នៃគណៈអភិបាលខេត្តបន្ទាយមានជ័យ និងមន្ត្រីមកពីមន្ទីរពាក់ព័ន្ធក្នុងខេត្ត រួមទាំងមន្ត្រីស្ថាបន នៅមាត់ច្រកទ្វារអន្តរជាតិប៉ោយប៉ែតផងដែរ ។ ភាគីថៃបានយករថយន្តទំនើបៗ មកទទួលភាគីកម្ពុជាដល់ចំណុចខ្លោងទ្វារប្រាសាទកំពូលបីខាងទឹកដីខ្មែរតែម្តង ។ កោះសន្តិភាពមិនអាចសុំការអត្ថាធិប្បាយ ពីថ្នាក់ដឹកនាំបានទេ ដោយសាររថយន្តបានចេញដំណើរឆ្លងព្រំដែនទៅហើយ ប៉ុន្តែប្រភពពីមន្ត្រី និងសមត្ថកិច្ចនៅមាត់ច្រកទ្វារប្រាប់ថា ជំនួបភាគីទាំ២ នឹងពិភាក្សាលើការកសាងស្ពានព្រំដែនស្ទឹងបត់ណងអៀន ។
គួរបញ្ជាក់ថា ច្រកអន្តរជាតិថ្មី ស្ទឹងបត់ណងអៀន ខាងកម្ពុជាស្ថិតក្នុងភូមិស្ទឹងបត់សង្កាត់ផ្សារកណ្តាល ក្រុងប៉ោយប៉ែត ដោយឡែកខាងភាគីថៃ ស្ថិតក្នុងភូមិណងអៀន ស្រុកអារញ្ញ ខេត្តស្រះកែវ ៕
ចែករំលែកព័តមាននេះ