រាជធានីភ្នំពេញ ៖ ដូចផែនការដែលរាជរដ្ឋាភិបាលបានគ្រោងទុក ដោយសារតែកំណើននៃភ្ញៀវទេសចរ និងវិស័យដឹកជញ្ជូនតាមផ្លូវអាកាស ក៏ដូចជាពង្រីកគោលដៅទេសចរណ៍នៅក្នុងប្រទេស ពេលនេះក្រុមហ៊ុន Union Development Group (UDG) បានបោះទុនវិនិយោគតម្លៃ៣៥០លានដុល្លារ សាងសង់ព្រលានយន្តហោះលំដាប់អន្តរជាតិនៅខេត្ត កោះកុង ដែលគម្រោងនេះបាននិងកំពុងចាប់ផ្តើមសាងសង់ហើយ ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលលោក ស៊ិន ចាន់សិរីវុត្ថា បានថ្លែងឲ្យដឹងតាមទូរស័ព្ទកាលពីថ្ងៃទី២០ មិថុនា ថា ការសាងសង់ព្រលានយន្តហោះខ្នាតអន្តរជាតិនេះ បាននិងកំពុងចាប់ផ្តើមឈូសឆាយដី ដើម្បីរៀបចំជាការដ្ឋានហើយ ។ ព្រលានយន្តហោះនេះស្ថិតនៅក្នុងស្រុកបទុនសាគរ ខេត្តកោះកុង ដែលវិនិយោគដោយក្រុមហ៊ុនUnion Development Group មានមូលដ្ឋាននៅប្រទេសចិន ។
លោកបន្តថា ៖« ការសាងសង់ព្រលាននេះស្ថិតនៅក្នុងដំណើរយឺតៗ ដោយសារវាជារដូវភ្លៀង ហើយក្រុមហ៊ុនបានយកពេលវេលានេះ ដើម្បីធ្វើការរចនាប្លង់លម្អិតពីរបស់ព្រលាននេះ»។ លោកបន្តថា ៖« តាមព័ត៌មាន ខ្ញុំទទួលបាន ព្រលានយន្តហោះនេះមានទំហំដី៧៥០ហិកតា ដែលជាព្រលានយន្តហោះខ្នាតអន្តរជាតិ អាចចុះចតយន្តហោះមកពីគ្រប់ទិសទី » ។
លោកបន្តថា ព្រលានយន្តហោះនេះអាចចុះចតយន្តហោះប្រភេទ4C ជាយន្តហោះខ្នាតមធ្យមបាន ប៉ុន្តែការបញ្ចប់ការសាងសង់ពេលណា មិនទាន់អាចបញ្ជាក់បាននៅឡើយទេ ។ ការសិក្សាពីផលប៉ះពាល់បរិស្ថានស្ថិតក្រោមសមត្ថកិច្ចរបស់ក្រសួងបរិស្ថាន និងការសាងសង់ស្ថិតក្រោមក្រសួងរៀបចំដែនដី នគរូបនីយកម្ម និងសំណង់ ។
ប្រធាននាយកដ្ឋានវាយតម្លៃហេតុប៉ះពាល់បរិស្ថាន នៃក្រសួងបរិស្ថាន លោក ដាញ់ សេរីបានថ្លែងថា ក្រុមហ៊ុននេះបានជួលក្រុមហ៊ុនសិក្សាពីផលប៉ះពាល់បរិស្ថានលំដាប់អន្តរជាតិ ដើម្បីវាយតម្លៃពីផលប៉ះពាល់នៃគម្រោងនេះនិងត្រូវដាក់ឯកសារមកកាន់ក្រសួង ប៉ុន្តែរហូតមកទល់ពេលនេះ ក្រសួងមិនទាន់ទទួលបានរបាយការណ៍សិក្សាពីផលប៉ះពាល់បរិស្ថានរបស់ក្រុមហ៊ុននេះនៅឡើយទេ ។
លោក ហូ វណ្ឌី ទីប្រឹក្សាសភាពាណិជ្ជកម្មកម្ពុជាបានថ្លែងថា នេះជាគម្រោងវិនិយោគដ៏ធំមួយរបស់ចិន ដែលទទួលបានដីសម្បទានពីរាជរដ្ឋាភិបាលចំនួនជាង៥ម៉ឺនហិកតានៅតំបន់នេះ ដែលគ្របដណ្តប់ស្រុកចំនួនពីរគឺស្រុកថ្មបាំង និងស្រុកបទុមសាគរ ។ លោកបន្តថា កន្លែងនោះជាតំបន់មានភាពទាក់ទាញខ្លាំង ដោយសារមានការដឹកជញ្ជូនតាមផ្លូវទឹកច្រើន ហើយនៅពេលណាមានការដឹកជញ្ជូនតាមផ្លូវទឹកច្រើន វានឹងធ្វើឲ្យការដឹកជញ្ជូនតាមផ្លូវអាកាសជួយគាំទ្របន្ថែម ។
លោកបន្តថា ៖« នេះជាគម្រោងវិនិយោគទឹកប្រាក់ធំមែនទែន សម្រាប់ការចាប់ផ្តើមដំបូង ដែលការវិនិយោគនេះ នឹងជួយជំរុញឲ្យការដឹកជញ្ជូនតាមផ្លូវអាកាសកាន់តែមានភាពទូលំទូលាយ » ។ លោកបន្តថា៖ «ទីតាំងនោះជាតំបន់ភ្ជាប់រវាងខេត្តត្រាត ខេត្តច័ន្ទបុរីរបស់ប្រទេសថៃ និងខេត្តកោះកុង ដែលជាការភ្ជាប់គ្នាលើការដឹកជញ្ជូន និងការធ្វើពាណិជ្ជកម្មដ៏ល្អប្រសើរផងដែរ » ៕
ចែករំលែកព័តមាននេះ