រាជធានីភ្នំពេញ ៖ មេឃកំពុងតែភ្លៀងស្រិចៗ អ្នកបើកបររ៉ឺម៉កម៉ូតូមួយគ្រឿងបានអែបខាង ដើម្បីឈប់ពាក់អាវភ្លៀង ស្រាប់តែយុវជន៣នាក់ជិះម៉ូតូមួយគ្រឿងក្នុងល្បឿនលឿន បើកទៅបុកពីក្រោយរ៉ឺម៉កម៉ូតូពេញទំហឹង បណ្តាលឲ្យអ្នកបើកម៉ូតូស្លាប់ម្នាក់ និងរងរបួសធ្ងន់ស្រាល២នាក់ ដែលហេតុការណ៍នេះ បានកើតឡើងកាលពីម៉ោង០៥ល្ងាច ថ្ងៃទី២២ ខែមិថុនា ឆ្នាំ២០១៧ តាមបណ្តោយផ្លូវជាតិលេខ6A នៅចំណុចគីឡូម៉ែតលេខ១៥ ស្ថិតនៅក្នុងភូមិក្តីចាស់ សង្កាត់បាក់ខែង ខណ្ឌជ្រោយចង្វារ ។
សាក្សីសុំមិនបញ្ច្រាស់ឈ្មោះបានប្រាប់ឲ្យដឹងថា មុនពេលកើតហេតុ គេឃើញមានយុវជន៣នាក់ជិះម៉ូតូម៉ាក MSX ពណ៌ស ពាក់ស្លាកលេខភ្នំពេញ ១FM-៨១០៦ បើកបរតាមបណ្តោយផ្លូវជាតិលេខ6A ទិសដៅពីជើងទៅត្បូង ក្នុងល្បឿនយ៉ាងលឿន មិនបានប្រយ័ត្នទាំងមេឃកំពុងតែភ្លៀងរលឹមស្រិចៗផងនោះ ក៏ជិះទៅបុកគូថរ៉ឺម៉កម៉ូតូមួយគ្រឿង ដែលអ្នកបើកបរកំពុងតែឈប់ម៉ូតូពាក់អាវភ្លៀង ត្រូវម៉ូតូបុកពីក្រោយពេញទំហឹង បណ្តាលឲ្យអ្នកបើកម៉ូតូ MSX ស្លាប់ភ្លាមៗនៅនឹងកន្លែងកើតហេតុ ។ ចំណែកឯ ២នាក់ដែលជិះពីក្រោយ រងរបួសធ្ងន់ម្នាក់ និងស្រាលម្នាក់ ម៉ូតូខ្ទេចអស់មួយកំណាត់ខាងមុខ ឬឯអ្នកបើករ៉ឺម៉កម៉ូតូវិញ មិនមានរងរបួសអីនោះទេ បានទុករ៉ឺម៉កម៉ូតូចោលហើយរត់គេចខ្លួនបាត់ស្រមោល ។
បន្ទាប់ពីកើតហេតុភ្លាមៗ អ្នករងរបួសធ្ងន់ និងស្រាល ត្រូវរថយន្តសង្គ្រោះដឹកយកទៅព្យាបាលនៅមន្ទីរពេទ្យកាល់ម៉ែត ។ សពមិនទាន់ស្គាល់អត្តសញ្ញាណនៅឡើយទេ ត្រូវបានដឹកយកទៅតម្កល់ទុកនៅវត្តទឹកថ្លា ម៉ូតូ និងរ៉ឺម៉កម៉ូតូ សមត្ថកិច្ចវាស់វែងយកទៅរក្សាទុកនៅការិយាល័យចរាចរណ៍ផ្លូវគោក រងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ