រាជធានីភ្នំពេញ ៖ បុរសម្នាក់បានដេកខ្យល់គរស្លាប់ ខណៈដែលកូនប្រុសត្រលប់មកពីរៀនវិញ អត់ដឹងឪពុកស្លាប់ ខំប្រឹងទៅដាំទឹក ដើម្បីយកមកឆុងតែឲ្យឪពុក ដែលតែងតែហូបតែជារៀងរាល់ថ្ងៃ ដែលហេតុការណ៍នេះបង្កឲ្យមានការភ្ញាក់ផ្អើលនៅវេលាម៉ោង០៥និង៣០នាទីល្ងាច ថ្ងៃទី២២ ខែមិថុនា ឆ្នាំ២០១៧ នៅផ្ទះជួលបន្ទប់លេខ៨ ភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ។
សពឈ្មោះ រ៉ង សារ៉េត ភេទប្រុស អាយុ៣៧ឆ្នាំ មុខរបរលក់កាហ្វេបោះឲ្យម៉ូយ ស្នាក់នៅភូមិថ្មគោល សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅឃុំដូង ស្រុកបាទី ខេត្តតាកែវ មានប្រពន្ធឈ្មោះ អួន សុផារី អាយុ៣៧ឆ្នាំ ធ្វើការនៅប្រទេសជប៉ុន មានកូនប្រុសម្នាក់ឈ្មោះ រ៉ង សុវណ្ណា អាយុ១១ឆ្នាំ រៀនថ្នាក់ទី៤ នៅសាលាបឋមសិក្សាគោគបញ្ជាន់ ។ មានបងថ្លៃឈ្មោះ អួន ពុធ ភេទប្រុស អាយុ៤០ឆ្នាំ រៀនភាសាកូរ៉េ ស្នាក់នៅជាមួយគ្នា មានស្រុកកំណើតនៅខេត្តក្រចេះ ។ តាមប្រភពព័ត៌មានពីកូនប្រុសឈ្មោះ រ៉ង សុវណ្ណា បាននិយាយថា ផ្ទះជួលគាត់រស់នៅរាល់ថ្ងៃមានគ្នា៣នាក់ឪពុក ។ រូបគេ និងអ៊ុំប្រុស ត្រូវជាបងរបស់ម្តាយគេម្នាក់ទៀត ដែលទើបនឹងមកស្នាក់នៅបានជិត២ខែ ចំណែកម្តាយរបស់គេវិញ បានទៅធ្វើការនៅប្រទេសជប៉ុនជាង២ឆ្នាំមកហើយ ។ នៅមុនពេលកើតហេតុ រូបគាត់បានទៅរៀននៅសាលាបឋមសិក្សាគោកបញ្ជាន់ ដោយរៀននៅពេលថ្ងៃ លុះគាត់ត្រលប់មកពីរៀនវិញ ស្រាប់តែឃើញឪពុករបស់ខ្លួនកំពុងសម្រាន្តនៅក្នុងបន្ទប់មិនដឹងថាគាត់ស្លាប់នោះទេ បន្ទាប់មកទៀតគាត់បានទៅដាំទឹកក្តៅឲ្យឪពុករបស់ខ្លួនសម្រាប់ឆុងទឹកតែ ។ លុះពេលអ៊ុំប្រុសមកពីរៀនភាសាកូរ៉េវិញ បានទៅដាស់អង្រួនឪពុករបស់គេមិនដឹងខ្លួនទេ ហើយខ្លួនមានសភាពរឹងទៅហើយ ក៏បានស្រែកហៅអ្នកជិតខាងមកជួយមើល បង្កឲ្យផ្អើលឆោឡោតែម្តង ។ បើតាមការឲ្យដឹងពីបុរសជាបងថ្លៃសពបាននិយាយថា នៅមុនពេលកើតហេតុ នៅវេលាពេលព្រឹក ប្អូនថ្លៃរបស់ខ្លួនបានចេញទៅយកកាហ្វេឲ្យម៉ូយដូចសព្វដង ហើយពេលថ្ងៃបានមកហូបបាយជាមួយពួកគាត់ដែរ និងបាននិយាយប្រាប់គាត់ថា ថ្ងៃនេះដូចជាមិនស្រួលខ្លួនចេះតែឈឺក្បាល ហើយគាត់បាននិយាយថាបើឈឺក្បាល មកគាត់កោសខ្យល់ឲ្យ តែសពខាងលើថាមិនអីទេបង ហើយគាត់ចេញទៅរៀនបាត់ទៅ ។ ប្រភពពីនាក់ជិតខាងបានបន្តទៀតថា បុរសខាងលើបានប្រាប់អ្នកជិតខាងថា ខ្លួនមានជំងឺខ្សោយបេះដូង ពេលអ្នកជិតខាងមានកម្មវិធីតិចតួច នៅជិតគ្នាបានហៅគាត់ផឹកស៊ី គឺគាត់មិនដែលមកហូបជាមួយនឹងគេទេ ដោយប្រាប់ថាខ្លួនមានជំងឺខ្សោយបេះដូង ហើយចូលចិត្តហូបទឹកតែ ។
ក្រោយពេលកើតហេតុ សមត្ថកិច្ចជំនាញបានពិនិត្យសព ឃើញមានស្នាមក្រហមជាំពេញខ្លួន សមត្ថកិច្ចបានបញ្ជាក់ថា សពខាងលើ ស្លាប់ដោយគាំងបេះដូង បន្ទាប់មកសមត្ថកិច្ចបានធ្វើលិខិតប្រគល់សពឲ្យបងថ្លៃនឹងកូន យកទៅធ្វើបុណ្យតាមប្រពៃណី តែក្រុមគ្រួសារបានយកសពទៅតម្កល់នៅវត្តគោគបញ្ជាន់ ដើម្បីរងចាំប្រពន្ធត្រលប់មកពីប្រទេសជប៉ុនវិញធ្វើបុណ្យតាមប្រពៃណី ៕
ចែករំលែកព័តមាននេះ