រាជធានីភ្នំពេញ ៖ រថយន្តកូរ៉េដឹកទំនិញធុនមួយតោនមួយគ្រឿង បានបើកថយដោយខ្វះការប្រុងប្រយ័ត្នក៏បានទៅបុកនឹងរថយន្តស៊េរីទំនើបម៉ាកឡង់គ្រីស័រដ៏ថ្មីមួយគ្រឿង
រាជធានីភ្នំពេញ ៖ រថយន្តកូរ៉េដឹកទំនិញធុនមួយតោនមួយគ្រឿង បានបើកថយដោយខ្វះការប្រុងប្រយ័ត្នក៏បានទៅបុកនឹងរថយន្តស៊េរីទំនើបម៉ាកឡង់គ្រីស័រដ៏ថ្មីមួយគ្រឿង របស់លោកមេធាវីម្នាក់ ដាក់ចតក្នុងទិសដៅបញ្ច្រាសទិសនៅលើចិញ្ចើមផ្លូវមុខផ្ទះបណ្តាលឲ្យក្រពឹត និងដាច់មួយឆ្នូត ទារសំណងរហូតទៅដល់៥ពាន់ដុល្លារ។ ហេតុការណ៍នេះដែរបានកើតឡើងកាលពីវេលាម៉ោង៣ និង៤៥នាទីល្ងាច ថ្ងៃទី២២ ខែមិថុនា ឆ្នាំ២០១៧នេះ នៅចំណុចខាងមុខក្រុមមេធាវី អន្តរជាតិ ខេធីអិល ផ្ទះលេខ៣១B ផ្លូវលេខ៣៨៤ ក្នុងសង្កាត់ទួលស្វាយព្រៃទី១ ខណ្ឌចំការមន។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុ លោកមេធាវីម្នាក់បានបើករថយន្តស៊េរីទំនើបមួយគ្រឿង ម៉ាកឡង់គ្រីស័រ ព៌ណស ពាក់ស្លាកលេខ ភ្នំពេញ២ AI-៦៦៥៧ មកចតទុកស្ងៀមនៅខាងមុខការិយាល័យ ក្រុមមេធាវី អន្តរជាតិ ខេធីអិម របស់ខ្លួនរាប់ម៉ោងទៅហើយ។ ក៏ស្រាប់តែមានរថយន្តដឹកទំនិញម៉ាកហ៊ីយ៉ាន់ដាយ ធុនមួយតោន ពណ៌ខៀវ ពាក់ស្លាកលេខ ប-០៨៩៦ មួយគ្រឿង បើកបរដោយបុរសវ័យជាង៤០ឆ្នាំម្នាក់ បើកថយចេញពីមុខផ្ទះមួយកន្លែងដែលនៅក្បែរនោះ ដោយខ្វះការប្រុងប្រយ័ត្នមិនបានមើលក្រោយក៏ទៅបុករថយន្តម៉ាកឡង់គ្រីស័រនោះ បណ្តាលឲ្យក្រពឹត និងដាច់ផ្នែកខាងក្រោយមួយឆ្នូតតែម្តង។ ភ្លាមៗនោះ លោកមេធាវីក៏បានចេញមកមើលរថយន្តរបស់គាត់ និងធ្វើការទាមទារសំណងរហូតទៅដល់ចំនួន៥ពាន់ដុល្លារ ពីបុរសអ្នកបើកបររថយន្តកូរ៉េដឹកទំនិញបង្កនោះ តែដោយធ្វើការដោះស្រាយមិនត្រូវគ្នាក៏រយការណ៍ប្រាប់កម្លាំងមានសម្ថកិច្ចមូលដ្ឋានឲ្យចុះមកធ្វើការវាស់វែងរកខុសត្រូវ។
នៅនឹងកន្លែងកើតហេតុ គេក៏បានសង្កេតឃើញដែរថា រថយន្តស៊េរីទំនើបម៉ាកឡង់គ្រីស័ររបស់លោកមេធាវីនោះ គឺបានចតលើផ្លូវបញ្ច្រាសទិសនៅខាងឆ្វេងដៃ ដោយមិនបានចតស្តាំដៃឲ្យបានត្រឹមត្រូវទៅតាមច្បាប់ចរាចរណ៍ឡើយ។ ក្រោយពេលកើតហេតុ កម្លាំងមានសម្ថកិច្ចមូលដ្ឋានខណ្ឌចំការមន ក៏បានចុះមកដល់ធ្វើការវាស់វែង និងយករថយន្តទាំងពីរគ្រឿងដាក់លើចិញ្ចើមផ្លូវឲ្យធ្វើការដោះស្រាយគ្នា ដោយភាគីលោកមេធាវីម្ចាស់រថយន្តម៉ាកឡង់គ្រីស័ររងគ្រោះបានធ្វើការទាមទារសំណងរហូតទៅដល់ចំនួន៥ពាន់ដុល្លារ និងធ្វើការចរចាគ្នាអស់រយៈពេលរហូតទៅដល់ជាងមួយម៉ោងទើបបញ្ចប់ត្រឹមតែ៩០០ដុល្លារតែប៉ុណ្ណោះ៕
ចែករំលែកព័តមាននេះ