ព្រះរាជអាជ្ញាចេញដីកាបញ្ជាឲ្យសមត្ថកិច្ច តាមចាប់ក្រុមហែកគុកមកវិញ
ខេត្តកំពង់ស្ពឺ ៖ តាមមការបង្ហើបប្រាប់ពីលោកឧត្តមសេនីយ៍ត្រីស្នងការនគរបាលខេត្តបានឲ្យដឹងនៅរសៀលថ្ងៃទី២២ មិថុនា ២០១៧នេះថា លោក កែវ សុធា
ខេត្តកំពង់ស្ពឺ ៖ តាមមការបង្ហើបប្រាប់ពីលោកឧត្តមសេនីយ៍ត្រីស្នងការនគរបាលខេត្តបានឲ្យដឹងនៅរសៀលថ្ងៃទី២២ មិថុនា ២០១៧នេះថា លោក កែវ សុធា ព្រះរាជអាជ្ញាអមសាលាដំបូង ខេត្តកំពង់ស្ពឺ បានចេញដីកាបញ្ជាឲ្យកម្លាំងសមត្ថកិច្ច តាមចាប់ខ្លួនក្រុមអ្នកទោស៥នាក់ដែលហែកគុកយកមកផ្តន្ទាទោសឡើងវិញ។ ការចេញដីកាបង្គាប់ឲ្យសមត្ថកិច្ចតាមចាប់ខ្លួន អ្នកទោស៥នាក់ នៅខេត្តកំពង់ស្ពឺ បន្ទាប់ពីពួកគេបានរួមគំនិតគ្នាហែកគុករត់គេចខ្លួន កាលពីរំលងអាធ្រាត្រថ្ងៃទី១៩ ឈានចូលថ្ងៃទី២០ ខែមិថុនា ឆ្នាំ២០១៧។អ្នកទោសទាំង៥នាក់នេះ មានម្នាក់ជាទណ្ឌិត ម្នាក់ជាពិរុទ្ធជន និង៣នាក់ទៀតជាជនត្រូវចោទ ហើយពួកគេសុទ្ធតែមានជំងឺប្រចាំកាយ។
ក្រុមអ្នកទោសទាំងនេះមុនពេលធ្វើសកម្មភាព ពួកគេទាំង៥នាក់ ត្រូវបានមន្ដ្រី នាំទៅសម្រាកព្យាបាលនៅប៉ុស្ដិ៍សុខភាពរបស់ពន្ធនាគារខេត្ត ដោយសារតែពួកគេមានជំងឺ ហើយនៅម៉ោងប្រហែល២រំលងអាធ្រាត្រ ពួកគេបានរួមគ្នាយកក្រមាចងហើយឡើងតាមដំបូល រត់មកក្រៅគេចខ្លួនតែម្ដង។ លោកឧត្តមសេនីយ៍ត្រី សម សាមួន បន្តថា រហូតមកដល់ពេលនេះ កម្លាំងសមត្ថកិច្ចពាក់ព័ន្ធ នៅក្នុងខេត្តកំពង់ស្ពឺ បាន និងកំពុងធ្វើការស្រាវជ្រាវ យ៉ាងយកចិត្តទុកដាក់ ដើម្បីតាមចាប់ពួកគេត្រឡប់មកវិញ។ ក្នុងនោះលោកបានបញ្ជូនឯកសារពាក់ព័ន្ធរួមទាំងរូបថតទៅគ្រប់បណ្តារាជធានីខេត្តអស់ហើយ ដើម្បីងាយស្រួលដល់សមត្ថកិច្ចនគរបាលក្នុងការកំណត់មុខសញ្ញា។ ការងារនេះលោកបានបញ្ជាកម្លាំងរបស់លោកឲ្យសហការណ៍ជាមួយកម្លាំងគ្រប់បណ្តារាជធានីខេត្ត ធ្វើយ៉ាងណាចាប់ខ្លួនក្រុមជនសង្ស័យទាំងនោះយកមកផ្តន្ទាទោសសារជាថ្មីម្តងទៀតឲ្យសមទៅនឹងទង្វើដែលពួកគេបានធ្វើ។
លោកស្នងការបានបញ្ជាក់បន្ថែមដែរថា អ្នកទោសទាំង៥នាក់ខាងលើនេះដែលរត់គេចខ្លួន រួមមាន៖ ទី១. ឈ្មោះ កែវ អែម ហៅ ខៀវ រិទ្ធី អាយុ៤៧ឆ្នាំ រស់នៅភូមិខ្នាចខាងត្បូង ឃុំបឹងត្រាញ់ខាងជើង ស្រុកសំរោង ខេត្តតាកែវ គឺជាពិរុទ្ធជន ពាក់ព័ន្ធបទល្មើសប្លន់ទ្រព្យសម្បតិ្ត, ទី២.ឈ្មោះ ឃុន សុភឿន អាយុ២១ឆ្នាំ រស់នៅភូមិស្នោទី១ សង្កាត់រកាធំ ក្រុងច្បារមន ខេត្តកំពង់ស្ពឺ ជាទណ្ឌិត ពាក់ព័ន្ធបទល្មើសជួញដូរគ្រឿងញៀន ខុសច្បាប់, ទី៣.ឈ្មោះ ស៊ុ ម៉ូច អាយុ៣២ឆ្នាំ រស់នៅភូមិតាជៀល ឃុំព្រះស្រែ ស្រុកឧដុង្គ ខេត្តកំពង់ស្ពឺ ជាជនជាប់ចោទពាក់ព័ន្ធ បទល្មើសឃាតកម្មគិតទុកជាមុន, ទី៤.ឈ្មោះ ឡុង ប៊ុនណាត អាយុ៣០ឆ្នាំ រស់នៅភូមិតាមេម ឃុំស្រង់ស្រុកគងពិសី ខេត្តកំពង់ស្ពឺ ជាជនជាប់ចោទ ពាក់ព័ន្ធបទល្មើសជួញដូរគ្រឿងញៀនខុសច្បាប់ និងទី៥.ឈ្មោះ រុន រ៉ានី អាយុ២២ឆ្នាំ រស់នៅភូមិព្រៃទទឹង ឃុំវាល ស្រុកគងពិសី ខេត្តកំពង់ស្ពឺ ជាជនជាប់ចោទ ពាក់ព័ន្ធបទល្មើសជួញដូរគ្រឿងញៀនខុសច្បាប់៕
ចែករំលែកព័តមាននេះ