ខេត្តបន្ទាយានជ័យ ៖ មន្ត្រីការិយាល័យទំនាក់ទំនងកម្ពុជា.ថៃ(BLO) បានសហប្រតិបត្តិការ និងយុទ្ធនាការបង្ក្រាបគ្រឿងញៀនតាមបន្ទាត់ព្រំដែន ដែលត្រូវបានធ្វើឡើងនៅថ្ងៃទី២១ ខែមិថុនា ឆ្នាំ២០១៧ នៅស្រុកអារញ្ញ ខេត្តស្រះកែវ ប្រទេសថៃ។ កម្ពុជាដែលចូលមានលោកវរៈសេនីយ៍ឯក ចាប សុផារិទ្ធ ស្នងការរងនគរបាលខេត្តបន្ទាយមានជ័យ តំណាងលោក អ៊ុំ រាត្រី អភិបាលរងខេត្ត លោកវរៈសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្ត និងអាជ្ញាធរថ្នាក់ដឹកនាំស្រុក.ក្រុង ជាប់ជាយដែនបានចូលរួម ខាងភាគីថៃមានលោក សានិត សូរិយះគុណ អភិបាលស្រុកអារញ្ញ និងមន្ត្រីពាក់ព័ន្ធជាច្រើនរូបទៀត។ លោកវរៈសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបានឲ្យដឹងថា កិច្ចប្រជុំមន្ត្រីការិយាល័យទំនាក់ទំនងកម្ពុជា.ថៃ(BLO)នេះ គឺក្នុងគោលបំណងដើម្បីសហប្រតិបត្តិការ និងយុទ្ធនាការគ្រឿងញៀនតាមបន្ទាត់ព្រំដែនកម្ពុជា.ថៃ។
លោកវរៈសេនីយ៍ឯក ចាប សុផារិទ្ធ បានមានប្រសាសន៍សំណូមពរដល់ភាគីត្រូវចូលរួមទប់ស្កាត់បទល្មើសគ្រឿងញៀនឆ្លងដែនតាមបន្ទាត់ព្រំដែនកម្ពុជា.ថៃ និងចូលទប់ស្កាត់បទល្មើសឆ្លងដែនមានដូចជា ជួញដូរអាវុធឆ្លងដែនខុសច្បាប់ វត្ថុបូរាណឆ្លងដែន ជួញដូរមនុស្សឆ្លងដែន និងបទល្មើសឈើគ្រញូង ដែលនាំចូលពីប្រទេសថៃទៅកម្ពុជា និងទំនិញគេចពន្ធដែលឈ្មួញនាំចូលពីប្រទេសថៃចូលទៅកម្ពុជាដោយគ្មានច្បាប់ទម្លាប់។ លោក សានិត សូរិយះគុណ អភិបាលស្រុកអារញ្ញ បានសំណូមពរដល់ភាគីកម្ពុជាដូចគ្នា ដោយសហប្រតិបត្តិការ និងយុទ្ធនាការបង្ក្រាបបទល្មើសគ្រឿងញៀនតាមបន្ទាត់ដែន និងទប់ស្កាត់បទល្មើសឆ្លងដែនត្រូវតែចូលរួមទាំងអស់គ្នា៕
ចែករំលែកព័តមាននេះ