ស្មានតែគេភ្លេច…រត់គេចជិត3ឆ្នាំត្រលប់មកវិញជាប់ខ្នោះ(មានវីដេអូ)
ខេត្តកណ្ដាល ៖ កម្លាំងនគរបាលស្រុកអង្គស្នួលបានធ្វើការចាប់ខ្លួនបុរសម្នាក់កាលពីវេលាម៉ោង៧និង៣០នាទីព្រឹក ថ្ងៃទី២២ ខែមិថុនា ឆ្នាំ២០១៧
ខេត្តកណ្ដាល ៖ កម្លាំងនគរបាលស្រុកអង្គស្នួលបានធ្វើការចាប់ខ្លួនបុរសម្នាក់កាលពីវេលាម៉ោង៧និង៣០នាទីព្រឹក ថ្ងៃទី២២ ខែមិថុនា ឆ្នាំ២០១៧ នៅក្នុងភូមិកណ្តោល ឃុំលំហាច ស្រុកអង្គស្នួល ខេត្ដកណ្ដាល ដែលការចាប់ខ្លួននោះបានធ្វើឡើងតាមដីកាបង្គាប់ឲ្យចាប់ខ្លួនរបស់សាលាដំបូងខេត្តកណ្ដាល ដោយបានចោទប្រកាន់ពីបទ បើកកន្លែងល្បែងស៊ីសងដោយខុសច្បាប់ ហើយមុននឹងចាប់ខ្លួនបានបុរសនោះបានព្យាយាមគេចខ្លួនរយៈពេលជិត៣ឆ្នាំមកហើយ ។
នគរបាលបានឲ្យដឹងថា បុរសម្នាក់នោះឈ្មោះ ផង់ ចន្ថា អាយុ៣៤ឆ្នាំ ជនជាតិខ្មែរ មុខរបរជាសន្តិសុខ មានទីលំនៅភូមិខាងលើ ត្រូវបានកម្លាំងឃាត់ខ្លួនតាមដីកាលេខ៥៥៨ ដ.ក.ប.ច.ខ ចុះថ្ងៃទី០៩ ខែតុលា ឆ្នាំ២០១៤ របស់លោក អ៊ី សុវណ្ណ ចៅក្រមស៊ើបសួរនៃសាលាដំបូងខេត្តកណ្ដាល ដែលបានចោទប្រកាន់ពីបទបើកកន្លែងស៊ីសង និងត្រូវបានកម្លាំងនគរបាលស្រាវជ្រាវ និងរកឃើញកាលពីថ្ងៃទី២៦ ខែមិនា ឆ្នាំ២០១៤ នៅនឹងផ្ទះរបស់បុរសនោះផ្ទាល់តែម្ដង ស្ថិតនៅក្នុងភូមិកណ្តោល ឃុំលំហាច ស្រុកអង្គស្នួល ខេត្ដកណ្ដាល ។
ប្រភពដដែលបានបន្តទៀតថា បុរសខាងលើបានបើកសង្វៀនជល់មាន់ដែលមួយថ្ងៃៗមានមនុស្សចូលទៅលេងយ៉ាងច្រើនកុះករមិនបានខ្លាចញញើតច្បាប់ និងនរណាឡើយ តែក្រោយមកត្រូវបានកម្លាំងនគរបាលស្រុកធ្វើការស្រាវជ្រាវដឹងក៏បានចុះទៅធ្វើការបង្ក្រាប និងចាប់ខ្លួន ប៉ុន្តែខណៈនោះចាប់បានតែមាន់មួយចំនួនប៉ុណ្ណោះ ចំណែកបុរសម្ចាស់ទីតាំងល្បែងម្នាក់នេះបានរត់គេចខ្លួនហើយដោយសារតែបានស្គាល់ពីអត្តសញ្ញាណអស់ហើយនោះកម្លាំងបានកសាងសំណុំរឿងបញ្ជូនទៅសាលាដំបូងខេត្តកណ្ដាលតែម្ដង ៕
ចែករំលែកព័តមាននេះ