ឯកអគ្គរដ្ឋទូតកូរ៉េខាងជើងប្រចាំប្រទេសឥណ្ឌា លោក KYE CHUN YONG ថ្លែងកាលពីថ្ងៃទី២១ មិថុនា ថា កូរ៉េខាងជើងពុំបដិសេធឡើយ ការផ្អាកសាកល្បងនុយក្លេអ៊ែរ និងបាញ់សាកគ្រាប់មីស៊ីលទាំងឡាយ ប្រសិនបើសហរដ្ឋអាមេរិកបោះបង់ចោលបណ្តាសមយុទ្ធយោធាទ្រង់ទ្រាយធំនានា ។
ខណៈដែលក្រុងវ៉ាស៊ីនតោនមានការព្រួយបារម្ភខ្លាំងបំផុតចំពោះកម្មវិធីនុយក្លេអ៊ែរកូរ៉េខាងជើង ក្រុងព្យុងយ៉ាងយល់ថា មានលទ្ធភាពផ្អាកការសាកល្បងនានារបស់ខ្លួន ។
យោងតាមឯកអគ្គរដ្ឋទូតកូរ៉េខាងជើងរូបនេះថា ប្រទេសរបស់លោកត្រៀមប្រកាសពីការផ្អាកសាកល្បងនុយក្លេអ៊ែរ និងមីស៊ីលទាំងឡាយ ប្រសិនបើសហរដ្ឋអាេមរិកបោះបង់ចោលបណ្តាសមយុទ្ធយោធាទ្រង់ទ្រាយធំទាំងឡាយ ។ លោកគូសបញ្ជាក់ថា យើងអាចផ្អាកការសាកល្បងនុយក្លេអ៊ែរ និងផ្អាកការបាញ់សាកបណ្តាមីស៊ីលទាល់តែមានលក្ខខណ្ឌមួយចំនួន ។
ប្រសិនបើសហរដ្ឋអាេមរិកបញ្ឈប់ទាំងស្រុងបណ្តាសមយុទ្ធយោធាទ្រង់ទ្រាយធំជាបណ្តោះអាសន្ន ឬជាអចិន្ត្រៃយ៍នោះយើងក៏ផ្អាកបណ្តោះអាសន្នដែរ ។ យើងអាចធ្វើការចរចាគ្នាលើរឿងផ្អាកសាកល្បងគ្រឿងសព្វាវុធ ។
យោងតាមអ្នកការទូតកូរ៉េខាងជើងរូបនេះថា ក្រុងព្យុងយ៉ាងត្រៀមខ្លួនចរចាជាមួយក្រុងវ៉ាស៊ីនតោនគ្រប់ពេល ក៏ប៉ុន្តែពុំមានលក្ខខណ្ឌជាមុន ៕
ចែករំលែកព័តមាននេះ