ខេត្តពោធិ៍សាត់ ៖ បុរសម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ និងម្នាក់ទៀតរងរបួសស្រាល ដោយសារបាតុភូតធម្មជាតិរន្ទះបាញ់ ខណៈពេលកំពុងជ្រកភ្លៀងក្នុងខ្ទមស្រែ កាលពីថ្ងៃទី២១ ខែមិថុនា ឆ្នាំ២០១៧ វេលាម៉ោង១៥និង១៥នាទីរសៀល នៅចំណុចបឹងរនាមក្រោម ស្ថិតក្នុងភូមិទួលគូ ឃុំកោះជុំ ស្រុកកណ្តៀង ខេត្តពោធិ៍សាត់ ។
លោកវរសេនីយ៍ត្រី លីវ សេងហ៊ីម អធិការនគរបាលស្រុកកណ្តៀង បានប្រាប់អ្នកយកព័ត៌មានកោះសន្តិភាពឲ្យដឹងថា ជនរងគ្រោះដែលត្រូវរន្ទះបាញ់ស្លាប់នោះ មានឈ្មោះ នួន ពុតលី ភេទប្រុស អាយុ២១ឆ្នាំ ពីមុនជាកសិករ រស់នៅភូមិត្រាំពែរ ឃុំស្នាមព្រះ ស្រុកបាកាន បច្ចុប្បន្នមករស់នៅភូមិគៀន ឃុំកោះជុំ ស្រុកកណ្តៀង ។ លោកអធិការបន្តថា មុនពេលកើតហេតុ បុរសទាំង២នាក់នោះ បានប្រាប់ក្រុមគ្រួសារថា ទៅឃ្វាលក្របី នៅចំណុចកើតហេតុខាងលើ ។ ពេលកំពុងតែដើរមើលក្របីនោះ ស្រាប់តែមានភ្លៀងធ្លាក់មួយមេលាយឡំដោយផ្គររន្ទះព្រាកៗ គួរឲ្យភ័យខ្លាច ។ ឃើញដូច្នេះ ពួកគេទាំងពីរនាក់ ក៏ដាក់ក្របីចោលឲ្យដើរស៊ីស្មៅនៅវាលស្រែ ហើយក៏ទៅជ្រកភ្លៀងក្នុងខ្ទមស្រែក្បែរនោះ ។ ខណៈពេលកំពុងជ្រកភ្លៀងនោះ ស្រាប់តែរន្ទះកំណាចបានបាញ់ផាំង ឡើងកក្រើកដី បណ្ដាលឲ្យបុរសទាំងពីរនាក់ដួលសន្លប់ក្នុងខ្ទម ហើយម្នាក់បានស្លាប់ភ្លាមៗនៅនឹងកន្លែងកើតហេតុ ឯម្នាក់ទៀតគ្រាន់តែរងរបួលស្រាលប៉ុណ្ណោះ ។
ជនរងគ្រោះ ដែលស្លាប់បាត់បង់ជីវិត ក្រោយពីពិនិត្យរួចមក សមត្ថកិច្ចបានប្រគល់ឲ្យក្រុមគ្រួសារ ដើម្បីយកទៅធ្វើបុណ្យតាមប្រពៃណី ។ ចំណែកអ្នករងរបួសកំពុងសម្រាកព្យាបាលក្នុងមណ្ឌលសុខភាពឃុំ ៕
ចែករំលែកព័តមាននេះ