ខេត្តបាត់ដំបង ៖ យោងតាមប្រភពពីសមត្ថកិច្ចខេត្តបានឱ្យកោះសន្តិភាពដឹងថា ពាក់ព័ន្ធករណីអតីតភិក្ខុសង្ឃនាម ហន សុផាន្នី ដែលជាសមាជិកបណ្ដាញព្រះសង្ឃឯករាជ្យ ដើម្បីយុត្តិធម៌សង្គមប្រចាំខេត្តបាត់ដំបង ជាប់ពាក់ព័ន្ធពីបទបានធ្វើឱ្យប៉ះពាល់ដល់ព្រះពុទ្ធសាសនា និងកាន់កាប់រក្សាទុកអាវុធដោយខុសច្បាប់ ហើយត្រូវបានចាប់ផ្សឹកនោះ គឺអតីតសង្ឃអង្គនេះ គាត់ពិតជាបានទទួលស្គាល់កំហុសរបស់ខ្លួនមែន ក្រោយពេលសួរនាំដោយចៅក្រមស៊ើបសួរ កាលពីព្រឹកថ្ងៃទី២២ មិថុនា នេះ ។
តាមចម្លើយសារភាពគាត់ទទួលស្គាល់ថា លោកពិតបានកាន់កាំភ្លើងនេះប្រាកដមែន តែជាកាំភ្លើងជ័រទេ ព្រមទាំងកាន់ដាវនិងកាំបិត ដូចដែលបានបង្ហោះតាមប្រព័ន្ធសង្គមហ្វេសប៊ុក កាលពីខែមេសាកន្លងមកនោះ ។ អតីតសង្ឃដែលត្រូវបានចាប់ផ្សឹកនោះបានបញ្ជាក់ទៀតថា កាំភ្លើងដែលគាត់កាន់បាញ់នោះ គឺមិនមែនជាកម្មសិទ្ធិរបស់គាត់ទេ ដោយគាត់បានប្រគល់ទៅឱ្យម្ចាស់ដើមវិញ ក្រោយពេលកាន់កាំភ្លើងថតរួច ។ ទោះបីជាយ៉ាងណា សមត្ថកិច្ចនៅតែមិនទាន់ទទួលស្គាល់ថា កាំភ្លើងនោះជាកាំភ្លើងជ័រផងដែរ ខណៈដែលកំពុងធ្វើការស្រាវជ្រាវបន្ត ។
គួរបញ្ជាក់ថា ពាក់ព័ន្ធអតីតភិក្ខុសង្ឃនាម ហន សុផាន្នី ជាសមាជិកបណ្ដាញព្រះសង្ឃឯករាជ្យ ដើម្បីយុត្តិធម៌សង្គមប្រចាំខេត្តបាត់ដំបង ដែលនាំខ្លួនមកសាលាដំបូងខេត្តបាត់ដំបងដើម្បីសាកសួរពីបទធ្វើឱ្យប៉ះពាល់ដល់ព្រះពុទ្ធសាសនា និងកាន់កាប់រក្សាទុកអាវុធដោយខុសច្បាប់នោះ គិតនៅត្រឹមម៉ោង១២ថ្ងៃត្រង់ថ្ងៃទី២២ មិថុនា នេះ ត្រូវបានចៅក្រមស៊ើបសួរ សម្រេចឃុំខ្លួនជាបណ្តោះអាសន្នហើយ ។
ក្រោយពីការប្រកាសសម្រេចឃុំខ្លួនជាបណ្តោះអាសន្ន អតីតសង្ឃអង្គនេះ គេឃើញសមត្ថកិច្ចបាននាំខ្លួនបញ្ចូលទៅក្នុងរថយន្ត ដើម្បីបញ្ជូនទៅពន្ធនាគារខេត្ត ខណៈដែលមានព្រះសង្ឃជាច្រើន បាននិមន្តឈរយ៉ាងព្រោងព្រាត នៅសាលាដំបូងខេត្តនោះផងដែរ ។ បើទោះបីជាមានភាពតានតឹងនៅមុខសាលាដំបូងយ៉ាងណាក្តី ដែលសុំឱ្យមានការដោះលែងសង្ឃអង្គនោះ ពីសំណាក់មន្ត្រីសង្ឃនានា គឺពុំមានបាតុភាពហិង្សាណាមួយកើតឡើងឡើយ ។
ចែករំលែកព័តមាននេះ