រាជធានីភ្នំពេញ ៖ យុវតីជាសិស្ស នៃវិទ្យាល័យ ជាស៊ីម សាមគ្គី ម្នាក់ ត្រូវបានក្រុមអាជីវករលក់ដូរ សម្លៀកបំពាក់ នៅក្នុងផ្សារស្ទឹងមានជ័យថ្មី ធ្វើការឃាត់ខ្លួនប្រគល់ជូនសមត្ថកិច្ចប៉ុស្តិ៍រដ្ឋបាលនគរបាលស្ទឹងមានជ័យ ក្រោយធ្វើសកម្មភាពចូលទៅលួចយកខោអាវ១ឈុត បង្កឲ្យមានការភ្ញាក់ផ្អើលកាលពីវេលាម៉ោង១០និង០០នាទី ព្រឹកថ្ងៃទី២២ ខែមិថុនា ឆ្នាំ២០១៧ ស្ថិតក្នុងផ្សារស្ទឹងមានជ័យថ្មី ក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
យុវតីខាងលើ សមត្ថកិច្ចសុំមិនបញ្ចេញឈ្មោះ អាយុ១៧ ជាសិស្សថ្នាក់ទី១១ នៃវិទ្យាល័យ ជាស៊ីម សាមគ្គី ។ តាមចម្លើយឆ្លើយសារភាពរបស់រូបនាងឲ្យដឹងថា នៅវេលាព្រឹកថ្ងៃខែឆ្នាំដដែល មិត្តភក្តិរបស់នាង បានពឹងនាងឲ្យជួយទិញខោខៅប៉ូយ១ ដោយឲ្យលុយនាងចំនួន១០ដុល្លារទៅទិញ ហើយសល់បន្តិចបន្តួចទុកចាយចុះ ប៉ុន្តែនាងបានជ្រុះបាត់លុយនោះ មិនដឹងថាបាត់នៅទីណា ។ ដោយភ័យខ្លាច មិនមានខោសងមិត្តភក្តិវិញ នាងក៏សម្រេចចិត្តចូលមកក្នុងផ្សារស្ទឹងមានជ័យតែម្នាក់ ហើយធ្វើសកម្មភាពលួចយកខោខៅប៉ូយ និងអាវ ១ឈុត ដែលគេភ្ជួរដាក់លក់ ដាក់ចូលក្នុងកាបូបខ្លួន ប៉ុន្តែសំណាងអាក្រក់ត្រូវក្រុមអាជីវករផ្សារប្រទះឃើញ ក៏នាំគ្នាចាប់ឃាត់ខ្លួនប្រគល់ជូនសមត្ថកិច្ចតែម្តង ។ ស្ត្រីជាម្ចាស់សម្លៀកបំពាក់ បានបញ្ជាក់ថា ក្នុង១ខែៗ គាត់បានបាត់សម្លៀកបំពាក់ជារឿយៗ ប៉ុន្តែតាមចាប់ចោរមិនដែលបានសោះ ព្រោះអ្នកទាំងនោះ លួចហើយរត់គេចលឿនណាស់ ។ ហើយក្នុងតម្លៃខោអាវនីមួយៗ សុទ្ធតែមានតម្លៃចាប់ពី ១០ដុល្លារឡើងទៅ ។
យ៉ាងណាមិញ ជុំវិញករណីលួចនេះ ស្ត្រីជាម្ចាស់សម្លៀកបំពាក់ ពុំបានដាក់ពាក្យបណ្តឹងក្មេងស្រីខាងលើឡើយ ដោយគ្រាន់តែសំណូមពរសមត្ថកិច្ចមូលដ្ឋានធ្វើការអប់រំណែនាំនាង ហើយទំនាក់ទំនងទៅអាណាព្យាបាលឲ្យមកធ្វើកិច្ចសន្យាបញ្ឈប់ទង្វើបែបនេះជាលើកទី២ បើពុំដូច្នោះ នឹងចាត់វិធានការតាមផ្លូវច្បាប់ ៕
ចែករំលែកព័តមាននេះ