ខេត្តបាត់ដំបង ៖ សេចក្តីរាយការណ៍បន្តឱ្យដឹងថា ពាក់ព័ន្ធអតីតភិក្ខុសង្ឃនាម ហន សុផាន្នី ជាសមាជិកបណ្ដាញព្រះសង្ឃឯករាជ្យ ដើម្បីយុត្តិធម៌សង្គមប្រចាំខេត្តបាត់ដំបង ដែលនាំខ្លួនមកសាលាដំបូងខេត្តបាត់ដំបង ដើម្បីសាកសួរពីបទធ្វើឱ្យប៉ះពាល់ដល់ព្រះពុទ្ធសាសនា និងកាន់កាប់រក្សាទុកអាវុធដោយខុសច្បាប់នោះ គិតនៅត្រឹមម៉ោង១២ថ្ងៃត្រង់ថ្ងៃទី២២ មិថុនា នេះ ត្រូវបានចៅក្រមស៊ើបសួរសម្រេចឃុំខ្លួនជាបណ្តោះអាសន្នហើយ ដោយត្រូវចោទពីបទ «កាន់កាប់អាវុធដោយគ្មានការអនុញ្ញាត និងញុះញង់ឱ្យប្រព្រឹត្តបទឧក្រិដ្ឋជាអាទិ៍» ។
ប្រភពឱ្យដឹងថា ក្រោយពីការប្រកាសសម្រេចឃុំខ្លួនជាបណ្តោះអាសន្ន អតីតសង្ឃអង្គនេះ គេឃើញសមត្ថកិច្ចបាននាំខ្លួនបញ្ចូលទៅក្នុងរថយន្ត ដើម្បីបញ្ជូនទៅពន្ធនាគារខេត្ត ខណៈដែលមានព្រះសង្ឃជាច្រើន បាននិមន្តឈរយ៉ាងព្រោងព្រាត នៅសាលាដំបូងខេត្តនោះផងដែរ ។ បើទោះបីជាមានភាពតានតឹងនៅមុខសាលាដំបូងយ៉ាងណាក្តី ដែលសុំឱ្យមានការដោះលែងសង្ឃអង្គនោះ ពីសំណាក់មន្ត្រីសង្ឃនានា គឺពុំមានបាតុភាពហិង្សាណាមួយកើតឡើងឡើយ ។
គួរបញ្ជាក់ថា នាព្រឹកថ្ងៃទី២២ មិថុនា នេះថា សមត្ថកិច្ចបានបញ្ជូនអតីតភិក្ខុសង្ឃនាម ហនសុផាន្នី សមាជិកបណ្ដាញព្រះសង្ឃឯករាជ្យ ដើម្បីយុត្តិធម៌សង្គមប្រចាំខេត្តបាត់ដំបង ទៅដល់តុលាការខេត្ត ដើម្បីប្រគល់ឱ្យអយ្យការសួរនាំតាមនីតិវិធី ពាក់ព័ន្ធនឹងបណ្ដឹងព្រហ្មទណ្ឌពីបទធ្វើឱ្យប៉ះពាល់ដល់ព្រះពុទ្ធសាសនា និងកាន់កាប់រក្សាទុកអាវុធដោយខុសច្បាប់ ។
គួរបញ្ជាក់ថា អតីតសង្ឃអង្គនេះ ត្រូវបានកម្លាំងស្នងការខេត្ត នាំខ្លួនតាមដីកាបញ្ជាឱ្យចូលខ្លួនរបស់អយ្យការអមសាលាដំបូងខេត្ត កាលពីថ្ងៃទី២១ មិថុនា ស្ថិតនៅក្នុងវត្តដំរី.ស ក្នុងក្រុងបាត់ដំបង ដែលបានបង្កការភ្ញាក់ផ្អើលយ៉ាងខ្លាំង ។ ក្រោយពីនាំខ្លួនដល់ស្នងការខេត្ត នៅរសៀលថ្ងៃដដែលនោះ សង្ឃអង្គនេះត្រូវបានបញ្ជូនទៅឱ្យមន្ត្រីធម្មការផ្សឹកភ្លាមៗដែរ ដើម្បីឱ្យសមត្ថកិច្ច្ចាត់ការតាមនីតិវិធី។ ជាមួយគ្នានេះ គេឃើញមន្ត្រីសង្ឃជាច្រើនអង្គបាននិមន្តទៅកាន់ស្នងការខេត្ត ដែលមានវត្តមានព្រះតេជគុណ ប៊ុត ប៊ុនទិញ ផងដែរ ប៉ុន្តែត្រូវបានឆ្មាំទ្វារនៅច្រកចូលស្នងការខេត្ត មិនអនុញ្ញាតឱ្យចូលទៅខាងក្នុងឡើយ ។
នៅព្រឹកថ្ងៃទី២២ មិថុនា ដដែលនេះ គេបានឃើញវត្តមានមន្ត្រីសង្ឃនានា បាននិមន្តមកប្រមូលផ្តុំឈរនៅមុខសាលាដំបូងខេត្ត ដើម្បីតវ៉ា និងបានចោទប្រកាន់ទៅសមត្ថកិច្ចវិញថា បានធ្វើខុសពីនីតិវិធីច្បាប់ទៅលើព្រះសង្ឃ ។ ក្នុងនោះ រួមមានទាំងព្រះតេជគុណ ប៊ុត ប៊ុនទិញ កំពុងតែស្វះស្វែងអន្តរាគមន៍ ស្នើឱ្យអាជ្ញាធរដោះលែងអតីតសង្ឃ ហន សុផាន្នី នេះ ។
ចែករំលែកព័តមាននេះ