រាជធានីភ្នំពេញ ៖ ជាទូទៅមនុស្សភាគច្រើនគិតថា រថយន្ដ ម៉ូតូ ឬសម្ភារផ្សេងៗដែលដំណើរការដោយម៉ាស៊ីន វាតែងអស់តម្លៃបន្តិចនៅពេលដែលគេប្រើប្រាស់យូរឆ្នាំ ។ ខុសប្លែកពីអ្នកដទៃ យុវជនម្នាក់ដែលសព្វថ្ងៃមានអាជីពជាអ្នកកែច្នៃម៉ូដម៉ូតូ បែរជាមានគំនិតថា ម៉ូតូចាស់ៗមានគុណសម្បត្តិច្រើនជាងម៉ូតូថ្មីទៅវិញ ។ ហេតុអ្វីបានជាយុវជនរូបនេះយល់ឃើញបែបនេះ ?
កំពុងអង្គុយច្នៃម៉ូតូបណ្ដើរ និយាយបណ្ដើរ យុវជន ម៉ៃ ឃុនឧត្តមវិសា បានរៀបរាប់ថា ជាធម្មតាជាងជួសជុលតែងនិយាយថា ការបោះរបស់ខូចៗចោលគឺជារឿងខ្ជះខ្ជាយបំផុត ក្នុងនាមជាជាងជួសជុលម្នាក់ យើងត្រូវជួសជុលឲ្យអស់ពីសមត្ថភាព និងសង្គ្រោះវាឲ្យបាន មិនថាស្ថិតក្នុងកាលៈទេសៈណាក៏ដោយ ។ ដូចគ្នានេះដែរ ក្នុងនាមជាអ្នកកែច្នៃម៉ូតូមួយរូប យុវជនរូបនេះមានចំណាប់អារម្មណ៍ខ្ពស់ទៅលើការប្រមូលយកម៉ូតូចាស់ៗមកកែច្នៃ ផ្លាស់ប្តូរគ្រឿងបន្លាស់ ម៉ាស៊ីន និងបាញ់ពណ៌ថ្មីជាដើម ។ ការច្នៃពីម៉ូតូមួយគ្រឿងដែលគ្មានអ្នកត្រូវការ យុវជនវិសាបានផ្លាស់ប្តូរវាឲ្យទៅជាម៉ូតូថ្មីសន្លាង មានរូបរាងប្លែកសង្ហារ ជាមួយគុណភាពកម្លាំងម៉ាស៊ីនខ្លាំងល្អ មិនចាញ់ម៉ូតូថ្មីឡើយ ។
ដោយសារតែមានបទពិសោធន៍ច្រើនជាមួយនឹងការកែច្នៃម៉ូតូ គួបផ្សំនឹងទឹកចិត្តស្រឡាញ់ ក៏ដូចជាទេពកោសល្យពីកំណើតផងនោះ យុវជនរូបនេះបានចាប់ផ្តើមតាំងពីបាតដៃទទេ រហូតក្លាយជាម្ចាស់លើអាជីវកម្មកែច្នៃម៉ូតូមួយកន្លែង ដែលមានទីតាំងនៅខណ្ឌទួលគោក ក្រោមស្លាកយីហោមានឈ្មោះថា «Home Workshop» ។
វិសា មិនដែលនឹកស្មានដល់ទេថាខ្លួនឯងនឹងអាចចាប់យកអាជីពនេះ ព្រោះអ្វីៗទាំងអស់គឺផ្តើមចេញមកពីគំនិតមួយដែលស្រឡាញ់ពីធម្មជាតិតែប៉ុណ្ណោះ ។
អ្នកកែច្នៃម៉ូតូដែលមានឈ្មោះបោះសំឡេងក្នុងវិស័យអ្នកលេងម៉ូដម៉ូតូរូបនេះបានរៀបរាប់ថា កាលពីនៅតូច រូបគេមានតែកង់មួយប៉ុណ្ណោះ ប៉ុន្តែដោយសារតែចំណូលចិត្តស្រឡាញ់ពីធម្មជាតិ និងការផ្សងព្រេង វិសាបានដាក់សំណួរសួរខ្លួនឯងថា ៖« តើធ្វើបែបណាទើបអាចធ្វើដំណើរទៅកន្លែងឆ្ងាយៗបាន ? »
ចម្លើយនោះគឺ ៖ « ចុះបើខ្ញុំមានម៉ូតូមួយ ?» ។ គ្រានោះហើយគឺជាពេលដែលវិសាចាប់ផ្តើមចផ្ដោតអារម្មណ៍ទៅលើម៉ូតូ និងយល់ឃើញថា បើចង់ឲ្យម៉ូតូជូនយើងទៅកន្លែងឆ្ងាយៗបានដោយទំនុកចិត្ត គឺយើងត្រូវតែចេះពីវិធីជួសជុលវា ជៀសវាងខូចតាមផ្លូវ ចង់បន្តដំណើរទៅណាទៀត ក៏មិនកើត ។
ដូចអ្វីដែលយុវជនរូបនេះបានគិត ក្រោយពេលមានម៉ូតូហើយ វិសាចេះតែចង់កែច្នៃលេងម៉ូដដោយដំឡើងនេះដំឡើងនោះ និងកែច្នៃរូបរាងដើមរបស់វាបន្តិចម្តងៗ ដោយប្រើប្រាស់លុយសន្សំជារបបចាយវាយបានពីឪពុកម្តាយ ។
គ្រាដំបូង ដោយឃើញកូនប្រុសមានចំណង់ចំណូលចិត្តបែបនេះ ម្តាយឪពុករបស់វិសាហាក់មិនសប្បាយចិត្តសោះ គាត់ចង់ឲ្យកូនប្រុសទៅថ្ងៃមុខ ចូលធ្វើការនៅការិយាល័យ ត្រជាក់ចិត្តត្រជាក់កាយ មិនមែនមកប្រឡូកប្រឡាក់ដៃជើងនឹងប្រេងម៉ាស៊ីនបែបនេះឡើយ ។
ប៉ុន្តែការហាមឃាត់ មិនអាចយកឈ្នះលើចំណង់ចំណូលចិត្ត និងទេពកោសល្យដែលមានពីកំណើតរបស់វិសាបានឡើយ ទើបចុងក្រោយឪពុករបស់វិសាបានផ្តល់ជាដំបូន្មានថា ៖« បើកូនចង់លេងវា ត្រូវលេងរបៀបចំណេញ និងទាញផលពីវា »។ ពាក្យពេចន៍នេះបានលើកទឹកចិត្តឲ្យវិសាចេះចាប់យកប្រាក់ចំណូលពីការកែច្នៃម៉ូតូ និងក្លាយទៅជាម្ចាស់ហាង Home Workshop ដែលបានឈរជើងអស់រយៈពេល ១៣ឆ្នាំរហូតមកដល់សព្វថ្ងៃនេះ ។
វិសារំលឹកថា ពេលនោះរូបគេផ្ទាល់មិនមានសមត្ថភាពបើកជាហាងអ្វីទេ ព្រោះក្រុមគ្រួសារមិនសូវពេញចិត្ត ម្យ៉ាងគ្មានដើមទុនផង។ ដោយសារតែមានមិត្តភក្តិ ឬអ្នកស្គាល់គ្នាមួយចំនួនទាក់ចិត្តទៅលើម៉ូដម៉ូតូដែលខ្លួនកំពុងតែជិះនាពេលនោះ ពួកគេក៏ចាប់ផ្តើមទុកចិត្តចង់ឲ្យរូបគេជួយលេងម៉ូដម៉ូតូឲ្យដែរ ។ ពេលនោះ ជាឱកាសបានឲ្យរូបគេរកប្រាក់ចំណេញបានខ្លះពីអ្នកទាំងនោះ ប៉ុន្ដែវាបានត្រឹមបន្តិចបន្តួចប៉ុណ្ណោះ មិនច្រើនជាដុំកំភួនអ្វីទេ ។
វិសាបានសន្សំប្រាក់ទាំងនោះទុករហូតដល់មានសមត្ថភាពរៀបចំហាងឲ្យមានទីតាំងមួយជាក់លាក់រហូតមកដល់បច្ចុប្បន្ន ។ យ៉ាងណាមិញ ចំពោះវិសាផ្ទាល់ មិនដែលចាត់ទុក Home Workshopជាហាងមួយ ហើយរឹតតែមិនចង់ឲ្យគេចាត់ទុកខ្លួនជាម្ចាស់ហាងឡើយ តែចង់ឲ្យមនុស្សគ្រប់គ្នាចាត់ទុកថា Home Workshop គឺជាផ្ទះរបស់អ្នកស្រឡាញ់ការកែច្នៃម៉ូតូ ដែលគ្រប់គ្នាអាចមកជួបជុំលេងម៉ូដនៅទីនេះបាន ៕
ចែករំលែកព័តមាននេះ