រាជធានីភ្នំពេញ ៖ បុរសម្នាក់ស្រវឹងស្រាជិះម៉ូតូជ្រុលទៅបុករថយន្តតាក់ស៊ីតែមិនបណ្តាលឲ្យរងរបួសទេ ស្រាប់តែបក្សពួកជិះម៉ូតូមកតាមក្រោយបានចុះទៅវាយបែកកញ្ចក់រថយន្តបង្កឲ្យមានការ ភ្ញាក់ផ្អើលកាលពីវេលាម៉ោង៨និង១៥នាទីយប់ថ្ងៃទី២១ ខែមិថុនា ឆ្នាំ២០១៧ តាមបណ្តោយផ្លូវ២០០៤ កែងផ្លូវ៣៧១សូឡា ស្ថិតក្នុងសង្កាត់ទឹកថ្លា ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញេរថយន្តមួយគ្រឿង ពណ៌ស្លែ ពាក់ស្លាកលេខ កណ្តាល 2A-6792 ជារថយន្តតាក់ស៊ីបើកបរដោយបុរសម្នាក់ដឹកភ្ញៀវជនជាតិចិន២នាក់ស្រី-ប្រុស តាមបណ្តោយផ្លូវ២០០៤ក្នុងទិសដៅពីលិចទៅកើតខណៈមកដល់ត្រង់ចំណុចកើតហេតុស្រាប់តែមានម៉ូតូមួយគ្រឿងម៉ាក SCOPY ពណ៌លឿងលាយខ្មៅ ពាក់ស្លាកលេខភ្នំពេញ1BZ-6944 បើកបរដោយបុរសម្នាក់ក្នុងស្ថានភាពស្រវឹងតាមបណ្តោយផ្លូវ៣៧១សូឡា ក្នុងទិសដៅពីជើងទៅត្បូងបានជ្រុលទៅបុករថយន្តឡិចស៊ីសចំកង់ខាងមុខចំហៀងខាងឆ្វេងមិនមានខូចខាតរថយន្តទេ ធ្វើឲ្យឱ្យម៉ូតូដួលរងការខូចខាតបែកកាតាប៊ូខាងមុខបន្តិចតែមិនមានរងរបួសទេ ភ្លាមៗនោះស្រាប់តែមានមិត្តភក្តិជិះម៉ូតូមួយគ្រឿងទៀតម៉ាកហុងដាឌ្រីមសងប៊ិច ពណ៌ខ្មៅ ពាក់ស្លាកលេខ ភ្នំពេញ1BW-0305 បើកបរដោយបុរសម្នាក់ជិះមកពីក្រោយក្នុងស្ថានភាពស្រវឹងជោកជាំបានចុះពីលើម៉ូតូហើយបានចុះទៅវាយកញ្ចក់រថយន្តរងគ្រោះបណ្តាលឱ្យបែកកញ្ចក់ខាងមុខផ្នែកខាងឆ្វេងហើយបម្រុងលើកម៉ូតូបក្សពួករបស់គេគេចខ្លួនត្រូវបានប្រជាពលរដ្ឋឃាត់ជាប់ ។
បើតាមសម្តីម្ចាស់រថយន្តរងគ្រោះមានឈ្មោះ ឆឹង លីម អាយុ៣៣ឆ្នាំ មុខរបរអ្នករត់តាក់ស៊ីស្នាក់នៅម្តុំសង្កាត់ចាក់អង្រែក្រោម ខណ្ឌមានជ័យ បានឱ្យដឹងថា មុនពេលកើតហេតុគាត់បានបើករថយន្តដឹកភ្ញៀវជនជាតិចិនពីរនាក់ស្រីប្រុសចេញពីអាកាសយាន្តដ្ឋានអន្តរជាតិភ្នំពេញគោលបំណងដឹកទៅក្រុងតាខ្មៅ ខេត្តកណ្តាល ក្នុងតលៃ៣០ដុល្លារ ខណៈមកដល់ត្រង់ចំណុចកើតហេតុស្រាប់តែមានម៉ូតូបង្កខាងលើបើកបរក្នុងទិសដៅពីជើងទៅត្បូងទៅបុករថយន្តរបសគាត់ហើយ ស្រាប់តែមានម៉ូតូមួយគ្រឿងទៀតបើកបរដោយបុរសម្នាក់ក្នុងស្ថានភាពស្រវឹងជោគជាំទៅវាយកញ្ចក់រថយន្តរបស់គាត់ បណ្តាលឱ្យបែកកញ្ចក់ខាងឆ្វេងផ្នែកខាងមុខតែម្តងទៅ ។ ចំណែកភាគីខាងបង្កមិនស្គាល់ឈ្មោះបាននិយាយទាំងស្ថានស្រវឹងជោកជាំឱ្យដឹងថា មុនពេលកើតហេតុគាត់បានបើកម៉ូតូតាមបណ្តោយផ្លូវខាងលើជ្រុលទៅបុករថយន្តរងគ្រោះហើយរថយន្តបានបើកកិនម៉ូតូរបស់គាត់ទើបប្រជាពលរដ្ឋវាយកញ្ចក់រថយន្តរបសគាត់បណ្តាលឱ្យបែកតែម្តងទៅ ។ ក្រោយពេលកើតហេតុក៏មានតំណាងខាងភាគីម៉ូតូចេញមុខមកដោះស្រាយដោយចេញថ្លៃជួសជុលទៅភាគីរថយន្តដើម្បីបញ្ចប់រឿងនៅនឹងកន្លែងកើតហេតុ ៕
ចែករំលែកព័តមាននេះ