រាជធានីភ្នំពេញ ៖ បុរសជាជនសង្ស័យម្នាក់ ត្រូវបានកម្លាំងនគរបាលប៉ុស្តិ៍បឹងត្របែកធ្វើការចាប់ឃាត់ខ្លួន ក្រោយពីរូបគេបានធ្វើសកម្មភាពលួចយកអាគុយពីរថយន្តកូរ៉េមួយគ្រឿង ដែលម្ចាស់ចតទុកនៅកន្លែងលាងរថយន្ត ហើយម្ចាស់គេទាន់ ចាប់យកមកប្រគល់ឲ្យនគរបាលប៉ុស្តិ៍បឹងត្របែក ដោយសារតែគ្មានលុយជិះរថយន្តទៅស្រុកកំណើត ។
រាជធានីភ្នំពេញ ៖ បុរសជាជនសង្ស័យម្នាក់ ត្រូវបានកម្លាំងនគរបាលប៉ុស្តិ៍បឹងត្របែកធ្វើការចាប់ឃាត់ខ្លួន ក្រោយពីរូបគេបានធ្វើសកម្មភាពលួចយកអាគុយពីរថយន្តកូរ៉េមួយគ្រឿង ដែលម្ចាស់ចតទុកនៅកន្លែងលាងរថយន្ត ហើយម្ចាស់គេទាន់ ចាប់យកមកប្រគល់ឲ្យនគរបាលប៉ុស្តិ៍បឹងត្របែក ដោយសារតែគ្មានលុយជិះរថយន្តទៅស្រុកកំណើត ។ ហេតុការណ៍នេះដែរ បានបង្កឲ្យមានការភ្ញាក់ផ្អើលកើតឡើងកាលពីវេលាម៉ោង០៥និង១៥នាទីទាបភ្លឺ ថ្ងៃទី២១ ខែមិថុនា ឆ្នាំ២០១៧ នៅចំណុចកន្លែងលាងរថយន្តមួយកន្លែង ផ្លូវលេខ៤៨៤ កែងនឹងផ្លូវលេខ១០១ ក្នុងសង្កាត់បឹងត្របែក ខណ្ឌចំការមន ។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសជនសង្ស័យដែលបានឃាត់ខ្លួនមានឈ្មោះ ឌិន ម៉ៃ អាយុ៣៥ឆ្នាំ មុខរបរ និងទីលំនៅមិនពិតប្រាកដ មានស្រុកកំណើតនៅភូមិថ្នល់កែង ឃុំជោ ស្រុកកំចាយមា ខេត្តព្រៃវែង ។ ជនរងគ្រោះឈ្មោះ ងួន ប៉រ៉ា ភេទប្រុស អាយុ៣៣ឆ្នាំ មុខរបរបុគ្គលិកលាងរថយន្តនៅកន្លែងលាងរថយន្តកន្លែងកើតហេតុខាងលើ ។ តាមប្រភពដដែលបានប្រាប់បន្តទៀតថា មុនពេលកើតហេតុ បុរសជនរងគ្រោះ បានយករថយន្តម៉ាក ហ៊ីយន់ដាយកូរ៉េ ធុនមួយតោនកន្លះមួយគ្រឿង យកទៅចតទុកនៅក្នុងកន្លែងលាងរថយន្តខាងលើ ហើយក៏ស្រាប់តែមានជនសង្ស័យម្នាក់ខាងលើ បានចូលមកធ្វើសកម្មភាពលួចដោះយកអាគុយពីរថយន្តរបស់គាត់ ហើយពួកគាត់បានឃើញទាន់ និងស្រែកឆោឡោឡើង និងបាននាំគ្នាដេញចាប់បាន ប្រគល់ឲ្យកម្លាំងមានសម្ថកិច្ចមូលដ្ឋានតែម្តង ។ ពេលពីប្រជាពលរដ្ឋ និងម្ចាស់រថយន្តចាប់ខ្លួនបុរសជនសង្ស័យម្នាក់ប្រគល់ឲ្យនគរបាលប៉ុស្តិ៍បឹងត្របែករួចហើយ រូបគេបានឆ្លើយសារភាពថា << មូលហេតុដែលធ្វើឲ្យរូបគេដាច់ចិត្តលួចដោះអាគុយពីរថយន្តកូរ៉េខាងលើ ដោយសារតែរូបគេគ្មានលុយធ្វើដំណើរទៅស្រុកំណើតវិញ ទើបដាច់ចិត្តធ្វើបែបនេះ >> ។
ក្រោយពេលកើតហេតុ ដោយមានចិត្តអាណិតអាសូរ និងមិនចង់ឲ្យមានរឿងវែងឆ្ងាយនោះ បុរសរងគ្រោះ ជាម្ចាស់រថយន្តមិនបានដាក់ពាក្យបណ្តឹងឡើយ ដោយសុំឲ្យតែកម្លាំងមានសម្ថកិច្ចធ្វើកិច្ចសន្យា និងរកមនុស្សឲ្យមកធានា និងបានដោះលែងទៅវិញ ។
ចែករំលែកព័តមាននេះ