ខេត្តបាត់ដំបង ៖ សេចក្តីរាយការណ៍បឋមឱ្យដឹងថា មានករណីគ្រោះថ្នាក់ចរាចរណ៍មួយ កើតឡើងលើផ្លូវក្រួសក្រហម បង្កឡើងដោយខ្លួនឯង បណ្តាលឱ្យដួលបោកក្បាលស្លាប់យ៉ាងអាណោចអាធ័ម កាលពីវេលាម៉ោង១២ថ្ងៃត្រង់ថ្ងៃទី២០ មិថុនា ស្ថិតត្រង់ចំណុចបឹង.គ ក្នុងភូមិឆាយរំពាត់ ឃុំកន្ទឺ២ ស្រុកបាណន់ ។
ជនរងគ្រោះខាងលើ ឈ្មោះសោង ឆាត អាយុ៦៣ឆ្នាំ រស់នៅផ្ទះលេខ២៩៣ ក្រុមទី០៣ ក្នុងភូមិព្រែកក្រូច ឃុំព្រែកនរិន្ទ ស្រុកឯកភ្នំ ខេត្តបាត់ដំបង ជិះម៉ូតូម៉ាកអាយខន ពាក់ផ្លាកលេខ1- AX5099ភ្នំពេញ ។
ប្រភពបន្តថា ជនរងគ្រោះរូបនេះត្រូវគេដឹងថា ទើបជិះម៉ូតូត្រឡប់មកពីហូបការគេនៅឯអណ្តូងស្វាយ ភូមិកំប៉ង់កើត ឃុំកន្ទឺ២ ស្រុកបាណន់ ។ លុះពេលជិះដល់ចំណុចកើតហេតុ ក៏ជ្រុលចង្កូតធ្លាក់ប្រឡាយ បណ្តាលឱ្យដួលបោកក្បាលស្លាប់តែម្តង ។ បច្ចុប្បន្ន សាកសពបានប្រគល់ទៅឱ្យក្រុមគ្រូសារ ធ្វើបុណ្យតាមប្រពៃណី ។
ចែករំលែកព័តមាននេះ