យន្តហោះប្រយុទ្ធមួយគ្រឿងរបស់អាមេរិកកាលពីថ្ងៃទី២០ មិថុនា បានបាញ់ទម្លាក់យន្តហោះគ្មានមនុស្សបើកមួយគ្រឿងរបស់កងទ័ពស៊ីរីនៅប្រទេសនេះ ដែលញ៉ាំងឱ្យរុស្ស៊ីផ្ទុះកំហឹងយ៉ាងខ្លាំង ហើយចោទប្រកាន់ក្រុមចម្រុះអន្តរជាតិនាំមុខដោយអាេមរិកថា ផ្សំគំនិតជាមួយភេរវកម្ម ។
នេះជាឧប្បត្តិហេតុថ្មីមួយរវាងកងទ័ពស៊ីរី និងសហរដ្ឋអាមេរិកដែលដឹកនាំក្រុមចម្រុះអន្តរជាតិដែលទិសដៅសំខាន់គឺតស៊ូប្រឆាំងក្រុមជីហាដរដ្ឋអ៊ិស្លាមនៅស៊ីរី និងនៅអីុរ៉ាក់ ។
ក្រុងមូស្គូជាអ្នកជួយខាងយោធាដល់របបលោកបាចា អាល់អាសាដ ក្នុងសង្គ្រាមស៊ីរី ខណៈក្រុងវ៉ាស៊ីនតោនជួយទ្រទ្រង់ និងផ្តល់អាវុធដល់ក្រុមចម្រុះអារ៉ាប់-ឃើតមួយ ព្រមទាំងបណ្តាក្រុមឧទ្ទាមស៊ីរីឯទៀតៗ រួចអាវុធជាច្រើនរបស់អាមេរិកត្រូវបានគេឃើញពួកជីហាដក្រុមរដ្ឋអ៊ិស្លាមប្រើ ។
ឧប្បត្តិហេតុថ្មីនេះកើតមានមិនដល់៤៨ម៉ោងផង ក្រោយពីការបាញ់ទម្លាក់យន្តហោះប្រដេញមួយគ្រឿងរបស់កងទ័ពស៊ីរី ដោយយន្តហោះប្រដេញអាមេរិកមួយគ្រឿងនៅតំបន់រ៉ាកាភាគខាងជើងស៊ីរី ។
ក្នុងសេចក្តីប្រកាសមួយក្រុមចម្រុះអន្តរជាតិគូសបញ្ជាក់ថា នាព្រឹកព្រលឹមថ្ងៃទី២០ មិថុនា យន្តហោះធុន F-15 STRIKE EAGLE មួយគ្រឿងរបស់អាមេរិកបានបាញ់ទម្លាក់យន្តហោះគ្មានមនុស្សបើកមួយគ្រឿងផលិតនៅអីុរ៉ង់ធុន SHAHEED 129 ជិតតំបន់ AL TANAF ភាគខាងត្បូងស៊ីរី ក្រោយពីយន្តហោះគ្មានមនុស្សបើកនេះមានចេតនាប្រទូស្តរ៉ាយ ។ អាមេរិកធ្លាប់បាញ់ទម្លាក់យន្តហោះគ្មានមនុស្សបើកស៊ីរីមួយគ្រឿង កាលពី២សប្តាហ៍មុននៅ AL TANAF ជិតព្រំដែនអីុរ៉ាក់ ។ អាមេរិកក៏ទម្លាក់គ្រាប់បែកដែរលើកងទាហានស៊ីរី ដែលរំកិលទៅជិតក្រុង AL TANAF មានទីតាំងរបស់កងកម្លាំងពិសេសអាមេរិក ។
ចំពោះការបាញ់ធ្លាក់យន្តហោះចម្បាំងស៊ីរីនៅខេត្តរ៉ាការុស្ស៊ីប្រកាសផ្អាកខ្សែទាក់ទងយោធាជាមួយអាមេរិកនៅស៊ីរី ហើយអះអាងថា ពីពេលនេះតទៅ ខ្លួននឹងតម្រង់បណ្តាមីស៊ីលឆ្ពោះទៅបណ្តាយន្តហោះក្រុមចម្រុះដែលកំណត់ឃើញនៅភាគខាងលិចទន្លេ EUPHRATE ដែលបែបនេះញ៉ាំងឱ្យអូស្ត្រាលីសម្រេចលែងបញ្ជូនយន្តហោះចម្បាំងរបស់ខ្លួនចូលរួមជាមួយក្រុមចម្រុះអន្តរជាតិ ៕
ចែករំលែកព័តមាននេះ