ខេត្តប៉ៃលិន ៖ សេចក្តីរាយការណ៍បានឱ្យដឹងថា មានសិស្សានុសិស្សចំនួន២ក្រុមបានឈ្លោះប្រកែកគ្នារហូតដល់ប្រើអំពើហិង្សាវាយតប់ទៅវិញទៅមកបណ្តាលឱ្យរងរបួសស្រាល ខណៈសិស្សដទៃទៀតកំពុងតែនាំគ្នាសិក្សារៀនសូត្រនៅក្នុងថ្នាក់រៀន ។ ការឈ្លោះគ្នារហូតដល់ប្រើអំពើហិង្សានេះដោយសារទាស់ពាក្យសម្តីបន្តិចបន្តួចរវាងគ្នានឹងគ្នា ទើបឈានដល់វាយគ្នារហូតបណ្តាលឱ្យមានការភ្ញាក់ផ្អើលដល់គ្រូ និងសិស្សពេញសាលាតែម្តង ។ ហេតុការណ៍វាយតប់គ្នារវាងសិស្សនឹងសិស្សនេះបានកើតឡើងនៅវេលាម៉ោង៨និង៤៥នាទីព្រឹក ថ្ងៃទី២១ ខែមិថុនា ឆ្នាំ២០១៧ ស្ថិតនៅក្នុងបរិវេណវិទ្យាល័យ ហ៊ុន សែន ក្រុងទេពនិម្មិត ក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន ។
ប្រភពព័ត៌មានពីលោក សឿ ឡងឌី នាយប៉ុស្តិ៍នគរបាលសង្កាត់ទួលល្វាបានឱ្យដឹងថា ដោយមានកិច្ចសហការពីគ្រូវិទ្យាល័យហ៊ុនសែនក្រុងទេពនិម្មិត ទើបខាងលោកធ្វើការនាំខ្លួនសិស្សចំនួន៣នាក់ដើម្បីហៅទៅសាកសួរ ទី១-ឈ្មោះ ហេង កំសត់ ភេទប្រុស អាយុ១៦ឆ្នាំ រស់នៅភូមិសួនអំពៅលិច សង្កាត់ប៉ៃលិន ក្រុងប៉ៃលិន ជាជនដៃដល់, ទី២-ឈ្មោះ សួន យី ភេទប្រុស អាយុ១៧ឆ្នាំ រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ជាសាក្សីឃើញហេតុការណ៍ និងទី៣-ឈ្មោះ អឿ ប៊ុនឡេង ភេទប្រុស អាយុ១៧ឆ្នាំ រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ជាសាក្សីឃើញហេតុការណ៍ ។ ចំណែកឯសិស្សរងគ្រោះម្នាក់ឈ្មោះ វ៉ាន់ ពិសិដ្ឋ ភេទប្រុស អាយុ១៦ឆ្នាំ រងរបួសហើមបបូរមាត់ខាងស្តាំស្រាល រស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ។
បើតាមប្រភពពីសិស្សសាលាមួយចំនួនបានបង្ហើបឱ្យដឹងថា នៅក្នុងវិទ្យាល័យមួយនេះគេឧស្សាហ៍ឃើញមានសិស្សប្រុសស្រីឈ្លោះទាស់ទែងគ្នា និងវាយតប់គ្នាជាញឹកញាប់ហើយក៏ត្រូវនគរបាលយកទៅអប់រំជាញឹកញយផងដែរ ។ តែហាក់ដូចជាអត់មានការរាងចាលអ្វីនោះឡើយ ខណៈសាលារៀនជាថ្នាលដ៏ល្អសម្រាប់សិក្សាអប់រំ គួរតែមានចរឹតស្លូតបូត សុភាពរាបសារ ជាគំរូដល់អ្នកដទៃ ជាទំពាំងស្នងឫស្សី ហើយខំប្រឹងប្រែងរៀនសូត្រ ដើម្បីអនាគតខ្លួនឯង និងក្រុមគ្រួសារ នោះទើបល្អប្រសើរជាង ៕
ចែករំលែកព័តមាននេះ