រាជធានីភ្នំពេញ ៖ កញ្ញាមាស អាលីសកំពុងតែធ្វើឲ្យស្ថានីយទូរទស្សន៍នានាពេញចិត្តទេពកោសល្យរបស់នាង គឺនាងមានទឹកដមសំឡេងពីរោះ ។ បទចម្រៀងសម័យមុនជិត១០០បទ ដែលកញ្ញាមាស អាលីសចេះចាំយ៉ាងស្ទាត់សម្រាប់ច្រៀងក្នុងកម្មវិធីនានា ។
តារាចម្រៀងមាស អាលីស ត្រូវស្ថានីយទូរទស្សន៍នានាទាក់ទងឲ្យឡើងច្រៀងជាបន្តបន្ទាប់ពីមួយសប្តាហ៍ទៅមួយសប្តាហ៍ ។ នាងចេះច្រៀងបទពីដើមច្រើនដោយសារនាងខំហាត់រៀនច្រើនឆ្នាំមកហើយ ។
កញ្ញាមាស អាលីស និយាយថា «នាងខ្ញុំមានទុនខ្លះដោយសារតែធ្លាប់ធ្វើការក្នុងវិទ្យុ និងកាន់កម្មវិធីចម្រៀងច្រៀងជាមួយប្រិយមិត្តខលចូល យូរៗទៅ ស្រាប់តែកើនចំណេះចេះច្រៀងច្រើន ស្របពេលដែលនិស្ស័យចម្រៀងនាងខ្ញុំចូលចិត្តស្រឡាញ់តាំងពីដើមមក ដោយមិនទាន់មានឱកាស ។ បន្ទាប់មកមានស្ថានីយទូរទស្សន៍ធំៗលេចធ្លោមួយចំនួនបានឃើញពីទេពកោសល្យពិសេសផ្នែកសំឡេងបានផ្តល់ឱកាសឲ្យនាងខ្ញុំបានសម្តែងជាហូរហែដូចជាក្នុងកម្មវិធី «ប្រជុំតារាតន្ត្រី» កម្មវិធី«តន្ត្រីស្រុកស្រែ» របស់ស្ថានីយទូរទស្សន៍បាយ័ន កម្មវិធី «មន្តស្នេហ៍សំនៀង» របស់ទូរទស្សន៍ស៊ីធីអិនដែលជាកម្មវិធីបងប្រុសអិុត សេដ្ឋាគាត់កាន់កាប់កាលនៅរស់ ។
ទោះជាយ៉ាងណាឆ្លងកាត់បទពិសោធន៍សិល្បៈសម្រាប់នាងខ្ញុំគិតថា បើយើងចេះចាំបទចម្រៀងពីដើមឲ្យបានច្រើននោះ មានឱកាសរកទីផ្សារជាងចម្រៀងសម័យជឿនលឿន ហើយនៅច្រៀងបានយូរ បើចម្រៀងឥឡូវគេស្តាប់តែ មួយភ្លែតៗប៉ុណ្ណោះ ក៏ដួលទៅវិញ ។ ដើម្បីជាទុននាងខ្ញុំនឹងខិតខំរិះរកចម្រៀងណា ល្អៗ នៅមិនទាន់គេរកឃើញពីសម័យដើមមកហាត់បន្ថែមទៀត ចែកជូនអ្នកគាំទ្របានស្តាប់» ។
កញ្ញាមាស អាលីស ជាកូនអ្នកក្រុងភ្នំពេញ បានបញ្ចប់ការសិក្សាថ្នាក់បរិញ្ញាបត្រនៅសាកលវិទ្យាល័យជាតិគ្រប់គ្រង ។
រៀមច្បងសិល្បៈ និងប្រិយមិត្តអ្នកស្តាប់មួយចំនួនសរសើរថា កញ្ញាមាស អាលីសមានទឹកដមសំឡេងស្រដៀងអ្នកស្រីហួយ មាស ៕
ចែករំលែកព័តមាននេះ