ប្រទេសថៃ ៖ រដ្ឋាភិបាល និងមន្ត្រីឧស្សាហកម្មថៃនិយាយថា ដោយអង្ករស្តុកទុករបស់រដ្ឋជិតលក់ចេញអស់ ហើយប្រទេសផលិតអង្ករធំៗជួបប្រទះនឹងអាកាសធាតុមិនល្អ ការនាំចេញអង្ករថៃនឹងកើនឡើងខ្ពស់ក្នុងឆ្នាំនេះ ។
ការនាំចេញអង្ករថៃក្នុងឆ្នាំ២០១៧ អាចនឹងកើនដល់១១លានតោន ដែលជាចំនួនខ្ពស់ជាងគេ ព្រោះតែតម្រូវការកើនឡើងក្នុងប្រទេសនាំចូលអង្ករ ខណៈទិន្នផលក្នុងប្រទេសផលិតអង្ករធ្លាក់ចុះ ។
លោកស្រី Duangporn Rodphaya ប្រធាននាយកដ្ឋានពាណិជ្ជកម្មបរទេសក្នុងក្រសួងពាណិជ្ជកម្មថៃ និយាយថា ប្រទេសនាំចូលអង្ករជាច្រើនបានងាកមកកាន់ប្រទេសថៃ ដើម្បីទិញអង្ករបន្ថែម ។
លោកស្រីនិយាយថា អង្ករក្នុងស្តុករបស់រដ្ឋធ្លាក់ចុះអាចនឹងបង្កការព្រួយបារម្ភថា ការផ្គត់ផ្គង់ក្នុងប្រទេសនាំចេញអង្ករកំពុងតែធ្លាក់ចុះ ធ្វើឲ្យអតិថិជនប្រញាប់ទិញទុក ។
លោកស្រី Duangporn បន្តថា ៖ « ការធ្លាក់ចុះនៃអង្ករស្តុកទុករបស់រដ្ឋក្នុងប្រទេសថៃ បានជួយកាត់បន្ថយសម្ពាធលើតម្លៃអង្ករពិភពលោក ដែលអាចនឹងអនុញ្ញាតឲ្យតម្លៃអង្ករកើនឡើងក្នុងឆ្នាំនេះ » ។
អង្ករស្តុកទុករបស់រដ្ឋបានកើនឡើងយ៉ាងខ្ពស់ដល់១៨,៩លានតោនមុនឆ្នាំ២០១៤ បន្ទាប់ពីមានការផ្តល់ឧបត្ថម្ភធនយ៉ាងច្រើន ដោយរដ្ឋបានទិញអង្ករពីកសិករផ្ទាល់ក្នុងតម្លៃខ្ពស់ជាងតម្លៃទីផ្សារ ប៉ុន្តែអង្ករក្នុងស្តុកនេះបានធ្លាក់ចុះយ៉ាងច្រើនមកត្រឹម២,១លានតោន ។
អ្នកនាំចេញអង្ករនិយាយថា ចំនួនអង្ករក្នុងស្តុកធ្លាក់ចុះនេះ បានជួយកាត់បន្ថយសម្ពាធតម្លៃអង្ករពិភពលោក ហើយតម្លៃនឹងកើនឡើងក្នុងរយៈពេលប៉ុន្មានខែខាងមុខទៀត ដោយប្រទេសនាំចូលអង្ករងាកមកកាន់ប្រទេសថៃ ។
លោក Charoen Laothamatas ប្រធានសមាគមអ្នកនាំចេញអង្ករថៃ និយាយថា ប្រទេសទាំងនោះរួមមាន អីុរ៉ង់, អីុរ៉ាក់, បង់ក្លាដែស និងហ្វ៊ីលីពីន ។
ប៉ុន្តែការផ្គត់ផ្គង់អង្ករក្នុងប្រទេសថៃក៏នៅមានកម្រិតដែរ ព្រោះតែគ្រោះរាំងស្ងួតក្នុងឆ្នាំ២០១៦ និងគោលនយោបាយរបស់រដ្ឋាភិបាលជំរុញដល់កសិករឲ្យងាកទៅដាំដុះដំណាំដែលចំណេញផលច្រើនវិញ ៕
ចែករំលែកព័តមាននេះ