ខេត្ដរតនគីរី ៖ ទេសភាពបឹងកន្សែងបញ្ចេញនូវសម្រស់ស្រស់ត្រកាលល្អណាស់ ប្រៀបដូចជាស្ដ្រីក្រមុំព្រហ្មចារីដ៏ល្អផូរផង់ ។ ផ្ទៃទឹកថ្លាយង់ដូចកញ្ចក់ស្ទើរឃើញដល់បាតដីបានលំអដោយសារាយលំចង់បញ្ចេញផ្កាពណ៌ចំរុះប្រជែងជាមួយផ្កាឈូកឈ្ងុយឈ្ងប់រីកស្គុសស្គាយស្ទើរមួយចំហៀងបឹង។ រួមផ្សំ ជាមួយនឹងទេសភាពកោះជាច្រើនមើលទៅដូចអណ្ដែតលើផ្ទៃទឹក ដោយមានដើមឈើដុះប្រជ្រៀតគ្នាគ្របពីលើត្រឈឹងត្រឈៃ ។
ផ្ទៃបឹងដ៏ល្វឹងល្វើយមើលពីត្រើយម្ខាងទៅត្រើយម្ខាង ឆ្ងាយសន្លឹមឃើញតែសត្វស្លាបមានទាទឹក ប្រវឹក មាន់ទឹក ទាហែល លេងទាំងហ្វូងៗដែលបង្កើតបានជាតំបន់រមណីយដ្ឋានធម្មជាតិមួយទាក់ទាញភ្ញៀវទេសចរទាំងក្នុងស្រុក និងក្រៅស្រុកឱ្យមកកំសាន្ដលំហែកាយនាពេលថ្ងៃរៀបលិចជិតអស់ពន្លឺរស្មី ពិតជាសោភ័ណលោកិយដ៏ត្រកាលមួយ ។
នៅជុំវិញមាត់បឹងទាំងសងខាងលំអ ដោយសួនច្បារ និងនៅតាមដងផ្លូវមានអាហារដ្ឋានជាច្រើនដែលបានដាក់តាំងលក់ម្ហូបអាហារនិងភេសជ្ជៈគ្រប់មុខចំរុះ រួមទាំងវត្ថុអនុស្សាវរីយ៍ទៅតាមទំនៀមទំលាប់ប្រពៃណីរបស់បងប្អូនជនជាតិដើមភាគតិច។ អ្វីដែលធ្វើឱ្យគ្រប់គ្នាបំភ្លេចមិនបាននោះ គឺស្រាបឺតរបស់បងប្អូនជនជាតិភាគតិចគ្រឹង ដែលមុននេះពួកគាត់ធ្វើស្រាបឺតនេះសំរាប់ តែតាមសេចក្ដីត្រូវការក្នុងជីវភាព ឬបុណ្យក្នុងភូមិម្ដងៗប៉ុណ្ណោះ ប៉ុន្ដែបច្ចុប្បន្នស្រាបឺត ឬស្រាពាងជនជាតិគ្រឹង ត្រូវបានផលិតសំរាប់អតិថិជនទូទៅ ។ កន្លែងលក់ស្រាពាងដ៏ពេញនិយមដែលយើងបានទៅដល់ ស្ថិតក្នុងសង្កាត់ឡាបានសៀក ក្រុងបានលុង។
ស្ដ្រីម្ចាស់ហាងលក់ស្រាពាង ដែលមានរាងតូចល្អិត សំបុរស្រអែម មានភាពរួសរាយរាក់ទាក់ស្រស់ស្រាយបានរៀបរាប់ទាំងទឹកមុខញញឹមញញែមថា គាត់ឈ្មោះកាលីចាន់ អាយុ៤០ឆ្នាំ ជាជនជាតិគ្រឹង បានប្រកបរបរលក់ស្រាពាងនេះជាង៤ឆ្នាំមកហើយ ។ ស្រាពាងទាំងនោះ គឺរូបគាត់ជាអ្នកផលិតដោយ ខ្លួនឯង ដែលផ្សំគ្នាជាច្រើនមុខ ដូចជាអង្ករ ដំណើប អង្កាមចំហុយលាយគ្នាបូកជាមួយមេស្រាដែលបងប្អូនជនជាតិជាអ្នកផលិត ហើយផ្សំជាមួយនឹងសំបកឫសឈើជាច្រើនទៀត ។ គាត់និយាយទៀតថា ស្រាពាងនេះដើម្បីឱ្យមានរសជាតិឈ្ងុយឆ្ងាញ់ ត្រូវរក្សានៅក្នុងពាងផ្អាប់ទុកឱ្យបានរយៈពេលចាប់ពីពីរខែ រហូតដល់៦ខែ ទើបអាចយកមកហូបបាន ប៉ុន្ដែបើយើងប្រញាប់រយៈពេលតែពីរសបា្ដហ៍ក៏អាចយកមកហូបបានដែរ គ្រាន់តែរសជាតិខ្សោយបន្ដិច ។
ស្រីរូបនេះបានបន្ដទៀតថា ស្រាពាងដែលបងប្អូនជនជាតិភាគតិចផលិតនេះ ពុំមានទឹកទេ គឺគោក ។ លុះដល់ពេលយើងត្រូវការហូប យើងត្រូវយកទឹកសុទ្ធ ឬទឹកដាំពុះចាក់បញ្ចូលទៅក្នុងពាងនោះ ។ ចំពោះស្រាពាងទាំងនោះមានសណ្ឋានធំតូចទៅតាមចំណុះរបស់ពាង ។ ពាងចំណុះចាប់ពី២លីត្រកន្លះឡើងទៅ រហូតដល់ចំណុះ២៥លីត្រ ឬអាចធំជាងនេះទៀតក៏មានដែរ ។ ចំណែកឯនៅកន្លែងហាងរបស់គាត់ គឺមានពាងចំណុះរហូតដល់៨ប្រភេទ ដែលមានរសជាតិផ្សេងៗគ្នាទៅតាមតំរូវការរបស់ភ្ញៀវដែលគេចង់បាន និងចូលចិត្ដ ។ រសជាតិលេខ១ ផ្អែមល្វីង រសជាតិលេខ២ សាប ល្វីង និងលេខ៣ រសជាតិជូរអែម តែបើមានរសជាតិជូរខ្លាំង គឺខូចគុណភាពហើយ ។ គាត់បានណែនាំថា ការចាក់ទឹកបញ្ចូលក្នុងស្រាពាងនីមួយៗក្នុងពេលហូប គឺពាងចំណុះ២លីត្រកន្លះ ចាក់ទឹកបញ្ចូលចំនួន៣លីត្រ ។ ពាងចំណុះ១០លីត្រ ប្រើទឹកចំនួន១២លីត្រ ។ បើពាងមានចំណុះ២៥លីត្រ ចាក់ទឹកបញ្ចូល ៣០លីត្រ ហើយបើយើងចាក់ទឹកលើសនេះបន្ដទៀត វានឹងមានរសជាតិកាន់តែសាប ។ ក្នុងពេលចាក់ទឹកបញ្ចូលដើម្បីបឺតនោះយើងត្រូវប្រើបំពង់ឫស្សីតូចដែលមានដុះនៅលើភ្នំធ្វើជាទុយោសំរាប់បឺត ។ ក្នុងពេលទិញស្រាពាង គឺបានភ្ជាប់ជាមួយទុយោនេះសាប់ ។
ស្ដ្រីអ្នកលក់រូបនោះក៏បានបញ្ជាក់អំពីតំលៃស្រាពាងឱ្យបានដឹងផងដែរថា ស្រាក្នុងមួយពាងចំណុះ២លីត្រកន្លះ តំលៃ១៣.០០០រៀល ៣លីត្រតំលៃ១៥.០០០រៀល រហូតដល់២០.០០០រៀល, ៣០.០០០រៀល, ៥០.០០០រៀល និង២៥លីត្រ តំលៃ៨០.០០០រៀល ។ ក្រោយពេលបឺតស្រាអស់អាចយក សំបកពាងមកលក់ឱ្យគាត់វិញក៏បានក្នុងតំលៃស្មើនឹងទីផ្សារ គឺគិតពី៥.០០០រៀល រហូតដល់៣៥.០០០រៀល ស្មើនឹងតំលៃដែលគាត់បានទិញ មកពីប្រទេសវៀតណាម ។ គាត់បាននិយាយថា ការផលិតស្រាពាងនេះ គឺជាទំនៀមទំលាប់តាំងពីដូនតាបុរមបុរាណជាយូរយារណាស់មកហើយ ។
ជាប្រពៃណីបងប្អូនជនជាតិដើមភាគតិច គេតែងតែយកស្រាពាងនេះ មកចូលរួមក្នុងពិធីសែនអារុក្ខអារក្សអ្នកតាពិធីសែនការកូនប្រុសស្រី និងពិធីជប់លៀងផ្សេងៗ ។ ស្រាពាង ឬស្រាបឺតនេះ មានគុណភាពនិងកេរ្ដិ៍ ឈ្មោះត្រូវបានគេទទួលស្គាល់ថា មានរសជាតិឈ្ងុយឆ្ងាញ់ម្យ៉ាងមិនចាញ់ស្រាផ្សេងមកពីទីក្រុងភ្នំពេញ ឬពីបរទេសឡើយ ។
ស្ដ្រីកាលីចាន់ បានបង្ហាញមោទនភាពចំពោះមុខរបស់គាត់លក់ស្រាពាងរកកំរៃផ្គត់ផ្គង់គ្រួសាររបស់គាត់មិនលំបាកលំបិនឡើយ។ នៅក្នុងហាងលក់ស្រាពាងរបស់គាត់ បន្ទាប់ពីរូបគាត់ជាអ្នកលក់ គឺនៅមានកូនស្រីដ៏ផូរផង់របស់គាត់ម្នាក់ទៀតជួយលក់ផងដែរ ពេលនាងសំរាកពីការសិក្សា ។ គាត់បានបញ្ជាក់ទៀតថា កូនស្រីរបស់គាត់ឈ្មោះ សុខ លីដា អាយុ១៦ឆ្នាំ រៀនថ្នាក់ទី៩ នៅវិទ្យាល័យភូមិថ្មី ហើយរបរផលិត និងលក់ ស្រាពាងនេះនៅក្នុងទីក្រុងបានលុង មិនមានច្រើនទេ គឺមានតែពីរកន្លែងប៉ុណ្ណោះ ដែលធំជាងគេសំរាប់បោះដុំ និងលក់រាយ ។ គាត់បន្ដថា ក្នុងរដូវវស្សាលក់មិនសូវដាច់ដូច រដូវប្រាំងទេ ។ ក្នុងរដូវប្រាំងអាចលក់បានចំនួន៥ពាងក្នុង១ថ្ងៃ ហើយរដូវវស្សាបានតែ២ពាងប៉ុណ្ណោះក្នុង១ថ្ងៃគិតជាធម្យម ។
ភ្ញៀវទេសចរណ៍ភាគច្រើនដែលមកកំសាន្ដបឹងកន្សែង ឬទីរួមក្រុងបានលុង តែងតែទិញស្រាពាងដើម្បីសាកល្បងឱ្យស្គាល់រសជាតិ ព្រោះជាស្រាផលិតឡើងដោយបងប្អូនជនជាតិដើមភាគតិចគ្រឹង ៕
ចែករំលែកព័តមាននេះ