ខេត្តកំពង់ឆ្នាំង ៖ រូបថតប៉ុន្មានសន្លឹកត្រូវបានប្រជាពលរដ្ឋ រស់នៅឃុំផ្លូវ ទូកស្រុកកំពង់លែង បានផ្ញើមកកោះសន្តិភាពដោយ បានរៀបរាប់ពីទុក្ខលំបាកនិងក្តីកង្វល់របស់ពួកគាត់ ចំពោះដំណាំល្ង ដែលឆ្នាំនេះធ្វើបានផលច្រើន ហើយតែគ្មានទីផ្សារ ធ្វើឲ្យតម្លៃថោកហួសការស្មាន និងស្នើសុំប្រមុខរាជរដ្ឋាភិបាលជួយរកទីផ្សារផង ព្រោះអ្នកចម្ការស្ទើរស្រែកយំគ្រប់គ្នា។ ស្ត្រីម្នាក់ឈ្មោះ បឿន ចាន់ធី រស់នៅភូមិពាមខ្នង ឃុំផ្លូវទូក ស្រុកកំពង់លែង បានរៀបរាប់ថា ឆ្នាំនេះចម្ការល្ងគាត់បានផលច្រើនណាស់ ប៉ុន្តែតម្លៃល្ងបានចុះថោកហួសការស្មាន ដោយក្នុង១គីឡូក្រាមលក់បានតែ២៥០០រៀលប៉ុណ្ណោះ ខុសពីឆ្នាំមុនលក់បាន៧ទៅ៨ពាន់រៀល។
គាត់ថា ឆ្នាំនេះគាត់យកប្រាក់ពីធនាគារផង មីក្រូហិរញ្ញវត្ថុផង មានទឹកប្រាក់ច្រើនណាស់ មិនដឹងសង្ឃឹមអ្វី យកប្រាក់សងគេទេ បើល្ងថោកម្លឹងៗ ម្នាក់ៗស្ទើរស្រែកយំហើយ។ រួបគាត់ក៏ដូចជាប្រជាពលរដ្ឋទាំងអស់ក្នុងឃុំផ្លូវទូក សូមអំពាវនាវដល់គ្រប់ស្ថាប័ន ពិសេសប្រមុខរាជរដ្ឋាភិបាល សូមមេត្តជួយរកទីផ្សារល្ងឲ្យពួកគាត់ផង ព្រោះពេលនេះម្នាក់ៗបានជំពាក់គេគ្រប់ៗគ្នា។
ជុំវិញបញ្ហានេះដែរ លោក ងិន ហ៊ុន ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តកំពង់ឆ្នាំង បានឲ្យដឹងថា ទីផ្សារសព្វថ្ងៃពិតជាជួបការលំបាកខ្លាំង មិនថាតែនៅកម្ពុជាទេ វាទូទាំងសកលលោកហើយ។ ក្រសួងកសិកម្មបានបង្កើតឲ្យមានគណៈកម្មការថ្នាក់ខេត្ត សម្រាប់ដោះស្រាយបញ្ហាប្រជាពលរដ្ឋ លោកលំបាក រកទីផ្សារមានស្រូវ អង្ករ និងដំណាំផ្សេងៗជាច្រើន ហើយបើតាមគម្រោងនេះនឹងប្រើថវិការហូតដល់ជាង៦០លានដុល្លាឯណោះ តែធ្វើម៉េចបើពេលនេះមិនទាន់ដំណើរការ។
សូមបញ្ជាក់ដែរថា តាមប្រជាពលរដ្ឋ នៅភូមិឃុំខាងលើបានឲ្យដំណឹងបន្ថែមថា ពេលនេះទឹកទន្លេបានឡើងលិចខ្នងកោះជាបណ្តើរៗហើយ ចំណែកដើមល្ង ខ្លះបានលិចទឹកស្អុយរលួយប្រមូលផលលែងបាន ខ្លះទៀតទឹកមិនទាន់លិចដល់មែន តែវាបានទុំជ្រុលផ្ទុះបែកផ្លែធ្លាក់គ្រាប់ទៅដីអស់ហើយ នេះដោយសារតែតម្លៃល្ងថោកពេក កសិករអស់កម្លាំងចិត្តច្រូតកាត់ប្រមូលផល និងមួយផ្នែកទៀត លំបាកក្នុងការដឹកជញ្ជូន។ ពួកគាត់បានសង្កត់ធ្ងន់ថា អ្នកចម្ការឆ្នាំនេះពិតជាលំបាកហើយជំពាក់គេវ័ណ្ឌកទៀត៕
ចែករំលែកព័តមាននេះ