រាជធានីភ្នំពេញ ៖ ក្រុមបាល់ទាត់ជម្រើសជាតិក្រោមអាយុ១៧ឆ្នាំ (U17) កម្ពុជា បានត្រៀមខ្លួនរួចរាល់ហើយដើម្បីទទួលភ្ញៀវក្រុមបាល់ទាត់ជម្រើសជាតិក្រោមអាយុ១៧ឆ្នាំ(U17)វៀតណាម
រាជធានីភ្នំពេញ ៖ ក្រុមបាល់ទាត់ជម្រើសជាតិក្រោមអាយុ១៧ឆ្នាំ (U17) កម្ពុជា បានត្រៀមខ្លួនរួចរាល់ហើយដើម្បីទទួលភ្ញៀវក្រុមបាល់ទាត់ជម្រើសជាតិក្រោមអាយុ១៧ឆ្នាំ(U17)វៀតណាមក្នុងជំនួបមិត្តភាពអន្តរជាតិនៅពហុកីឡដ្ឋានជាតិអូឡាំពិកវេលាម៉ោង៦និង៣០នាទីល្ងាច ថ្ងៃទី២១ មិថុនា នេះ ដោយមានផ្សាយផ្ទាល់តាមកញ្ចក់ទូរទស្សន៍បាយ័នព័ត៌មាន (BTV News)ខណៈប្រទេសទាំង២បានយកការប្រកួតមិត្តភាពនេះដើម្បីរំលឹកដល់ខួបទំនាក់ទំនងការទូត៥០ឆ្នាំរបស់ខ្លួន ។
តាមប្រភពព័ត៌មានពីបញ្ជរលក់សំបុត្រនៅមុខពហុកីឡដ្ឋានជាតិអូឡាំពិកកាលពីព្រឹកថ្ងៃទី២០ មិថុនា ឱ្យដឹងថា សម្រាប់សំបុត្រដែលចាប់ផ្តើមលក់តាំងពីថ្ងៃទី១៦ មិថុនា ទាំងប្រភេទ១តម្លៃ១០.០០០រៀល និងប្រភេទ២តម្លៃ៥.០០០រៀល រហូតមកដល់ពេលនេះបានប្រមាណតែ៥០ភាគរយប៉ុណ្ណោះដោយសារការប្រកួតរបស់ក្រុមឈុតតូចមិនសូវមានការចាប់អារម្មណ៍ដូចក្រុមឈុតធំ ។ ដូច្នេះសូមរួសរាន់ទៅទិញសំបុត្រចូលទស្សនាផ្ទាល់ទាំងអស់គ្នាដើម្បីជួយលើកទឹកចិត្តដល់ក្រុមU17កម្ពុជាក្រោមការដឹកនាំរបស់លោកKazunori Inoue ដែលជាគ្រូបង្វឹកជនជាតិជប៉ុនឱ្យកាន់តែមានកម្លាំងតតាំងនឹងក្រុមU17វៀតណាមដែលជាក្រុមខ្លាំងមួយនៅក្នុងតំបន់អាស៊ាន ។
លោក ឆាំង ពិសិដ្ឋ មន្ត្រីសហព័ន្ធកីឡាបាល់ ទាត់កម្ពុជាបានឱ្យដឹងថា នេះគឺជាលើកទី១ដែលប្រទេសទាំង២មានការព្រមព្រៀងគ្នាបង្កើតឱ្យមានព្រឹត្តិការណ៍នៃការប្រកួតបែបនេះឡើង។ កន្លងមក ក្រុមឈុតតូចប្រទេសទាំងពីរគឺក្រុមU16កម្ពុជា ធ្លាប់ប្រកួតមិត្តភាពធម្មតាជាមួយក្រុមU16វៀតណាម ប៉ុន្តែកម្ពុជាយើងមិនដែលឈ្នះទេ ដូច្នេះចាំមើលលើកនេះតើក្រុមU17កម្ពុជាអាចគេចផុតពីគន្លងរបស់ក្រុមសិស្សប្អូនខ្លួនឬយ៉ាងណា សូមរង់ចាំមើលទាំងអស់គ្នា។ លោក Phan The Hieu គ្រូបង្វឹកក្រុមU17វៀតណាមបានឱ្យដឹងនៅក្នុងសន្និសីទសារព័ត៌មានកាលពីព្រឹកថ្ងៃទី២០ មិថុនា ថា ការប្រកួតលើកនេះចាញ់-ឈ្នះមិនសំខាន់ទេ អ្វីដែលសំខាន់គឺធ្វើយ៉ាងណាឱ្យអ្នកទស្សនាសប្បាយ ចិត្ត ។ លោកបញ្ជាក់ថា ក្រុមវៀតណាមបានចម្រាញ់សុទ្ធតែកីឡាករល្អទាំងអស់ តែលោកក៏សូមកោតសរសើរដល់ក្រុមកីឡាករកម្ពុជាដែរ ដែលរយៈពេល២ឆ្នាំចុងក្រោយនេះមានការរីកចម្រើនច្រើន ។
លោក Kazunori Inoueគ្រូបង្វឹកក្រុមU17កម្ពុជាបានថ្លែងថា ក្រុមវៀតណាមនឹងដាក់កីឡាករចូលលេង១១នាក់ដំបូងសុទ្ធតែជាជើងខ្លាំង ដូច្នេះក្រុមលោកនឹងខិតខំលេងឱ្យអស់ពីសមត្ថភាពមិនឱ្យអ្នកគាំទ្រអស់សង្ឃឹមឡើយ ។ លោករំពឹងថា ការប្រកួតរវាងក្រុមទាំងពីរល្ងាចនេះពិតជាធ្វើឱ្យអ្នកគាំទ្រជក់ចិត្តមិនខាន ព្រោះក្រុមវៀតណាមជាក្រុមខ្លាំងមួយនៅក្នុងតំបន់អាស៊ាន ចំណែកក្រុមកម្ពុជាក៏បានត្រៀមខ្លួនរួចរាល់ហើយដែរដើម្បីយកឈ្នះការប្រកួតនេះ ។ តាមរយៈការប្រកួតនេះលោកសង្ឃឹមថា នឹងទទួលបានបទពិសោធន៍បន្ថែមទៀតដើម្បីអភិវឌ្ឍក្រុមកម្ពុជាត្រៀមប្រកួតជាមួយក្រុមផ្សេងទៀតនាពេលខាងមុខ ជាពិសេសនៅពេលកម្ពុជាទទួលធ្វើជាម្ចាស់ផ្ទះកីឡាស៊ីហ្គេមនៅឆ្នាំ២០២៣ ៕
ចែករំលែកព័តមាននេះ