ប្រទេសរុស្ស៊ីប្រកាសនាថ្ងៃទី១៩ មិថុនា ពីបំណងតម្រង់មីស៊ីលលើគ្រប់យន្តហោះរបស់ក្រុមចម្រុះអន្តរជាតិនាំមុខដោយអាមេរិក ដែលហោះហើរពីលើដែនអាកាសស៊ីរី ហើយផ្អាកខ្សែទាក់ទងយោធាជាមួយក្រុងវ៉ាស៊ីនតោន ក្រោយពី
ប្រទេសរុស្ស៊ីប្រកាសនាថ្ងៃទី១៩ មិថុនា ពីបំណងតម្រង់មីស៊ីលលើគ្រប់យន្តហោះរបស់ក្រុមចម្រុះអន្តរជាតិនាំមុខដោយអាមេរិក ដែលហោះហើរពីលើដែនអាកាសស៊ីរី ហើយផ្អាកខ្សែទាក់ទងយោធាជាមួយក្រុងវ៉ាស៊ីនតោន ក្រោយពីយន្តហោះអាមេរិកមួយគ្រឿងបាញ់ទម្លាក់យន្តហោះប្រដេញស៊ីរីមួយគ្រឿងមក ។
រុស្ស៊ីចូលរួមខាងយោធាជួយដល់របបប្រធានាធិបតី លោកបាចា អាល់អាសាដ ក្នុងសង្គ្រាមនៅស៊ីរី ខណៈសហរដ្ឋអាមេរិកជួយទ្រទ្រង់ ហើយបំពាក់អាវុធដល់សម្ព័ន្ធភាពអារ៉ាប់-ឃើត ជាគូប្រជែង និងពួកឧទ្ទាមស៊ីរី ។
រឿងបែបនេះកំណត់ពីការកើនកំដៅថ្មីក្នុងជម្លោះចូលរួមដោយតួអង្គតំបន់ និងអន្តរជាតិផ្សេងៗ ព្រមទាំងបណ្តាក្រុមជីហាដ ខណៈជម្លោះនេះកំពុងចាកឃ្លាតចេញពីទស្សនវិស័យនៃដំណោះស្រាយតាមរយៈការចរចាមួយ ព្រោះតែការដណ្តើមឥទ្ធិពលគ្នារបស់ពួកមហាអំណាចផ្តើមចេញពីការបែកបាក់ជាតិរបស់ស៊ីរី ។
លើសពីឧប្បត្តិហេតុអាមេរិក-ស៊ីរី ប្រទេសអីុរ៉ង់ជាសម្ព័ន្ធមិត្តមួយទៀតនៃរបបលោកអាសាដ បានបាញ់ជាលើកដំបូងកាលពីថ្ងៃទី១៨ មិថុនា បណ្តាមីស៊ីលរយៈមធ្យមប្រឆាំងបណ្តាទីតាំងរបស់ក្រុមជីហាដរដ្ឋអ៊ិស្លាមនៅស៊ីរី ។
ជាមួយការប្រកាសផ្តាច់ខ្សែទាក់ទងយោធាជាមួយអាមរិក រុស្ស៊ី បានបោះជំហានទៅមុខមួយទៀតក្នុងការប្រឈមមុខដាក់គ្នាជាមួយសហរដ្ឋអាមេរិក ។ ក្រសួងការពារប្រទេសរុស្ស៊ីគូសបញ្ជាក់ថា បណ្តាយន្តហោះ និងយន្តហោះគ្មានមនុស្សបើករបស់ក្រុមចម្រុះអន្តរជាតិ ដែលកំណត់ឃើញនៅភាគខាងលិចទន្លេ EUPHRATE នឹងត្រូវតាមដាន ហើយចាត់ទុកជាគោលដៅវាយប្រហារតាមមធ្យោបាយការពារអាកាសតាមជើងគោក និងតាមមធ្យោបាយអាកាស ។
នៅស៊ីរី រុស្ស៊ីមានប្រព័ន្ធការពារអាកាស S-300 និង S-400 ព្រមទាំងយន្តហោះប្រដេញ និងទម្លាក់គ្រាប់បែកជាច្រើនសិបគ្រឿងដែលធ្វើប្រតិបត្តិការជួយទ្រទ្រង់ដល់កងទ័ពស៊ីរី ។
ក្រសួងការពារប្រទេសរុស្ស៊ីប្រកាសម្យ៉ាងទៀតផ្អាកបណ្តាញគមនាគមន៍ដែលមានជាមួយសហរដ្ឋអាេមរិកក្នុងក្របខណ្ឌនៃអនុស្សរណៈស្តីពីការបង្ការបណ្តាឧប្បត្តិហេតុតាមអាកាសនៅស៊ីរី ។
ក្រុងមូស្គូចាត់ទុកសកម្មភាពរបស់ក្រុងវ៉ាស៊ីនតោនថាជាការមិនគោរពកិច្ចព្រមព្រៀងដែលចុះហត្ថលេខាកាលពីឆ្នាំ២០១៥ ។ ក្រុងមូស្គូចោទប្រកាន់ក្រុងវ៉ាស៊ីនតោនថា ពុំបានប្រាប់កងទ័ពរុស្ស៊ីឱ្យដឹងមុនថា ខ្លួននឹងបាញ់ទម្លាក់យន្តហោះ ហើយទាមទារឱ្យមានការស៊ើបអង្កេតមួយលើឧប្បត្តិហេតុនេះ ។
ដែនអាកាសស៊ីរីហោះហើរទាំងដោយបណ្តាយន្តហោះនៃរបបក្រុងដាម៉ាស់ ទាំងបណ្តាយន្តហោះរុស្ស៊ី ទាំងបណ្តាយន្តហោះ ក្រុមចម្រុះអន្តរជាតិ ហើយទាំងបណ្តាយន្តហោះចម្បាំងរបស់តួកគីផងដែរ ។
កាលពីថ្ងៃទី១៨ មិថុនា ក្រុងដាម៉ាស់ និងក្រុងវ៉ាស៊ីនតោនបានចោទប្រកាន់គ្នាទៅវិញទៅមក ពីការបង្កហេតុក្នុងឧប្បត្តិហេតុលើអាកាស ។ កងទ័ពស៊ីរីប្រកាសថា យន្តហោះមួយគ្រឿងរបស់ក្រុមចម្រុះអន្តរជាតិបានបាញ់ទម្លាក់យន្តហោះប្រយុទ្ធរបស់ខ្លួនមួយគ្រឿង ខណៈយន្តហោះនេះកំពុងបំពេញបេសកកម្មប្រឆាំងក្រុមរដ្ឋអ៊ិស្លាមក្នុងខេត្តរ៉ាកា ។ ក្រុមចម្រុះនិយាយថា នេះជាការតបតចំពោះការវាយប្រហារតាមអាកាសលើកងកម្លាំងប្រជាធិបតេយ្យស៊ីរី FDS ជាក្រុមចម្រុះអារ៉ាប់-ឃើតជួយទ្រទ្រង់ដោយសហរដ្ឋអាមេរិក ។ ឧប្បត្តិហេតុនេះកើតមាននៅកន្លែងមួយចម្ងាយប្រមាណជា៤០គីឡូម៉ែត្រ ភាគនិរតីក្រុងរ៉ាការដ្ឋធានីក្រុមរដ្ឋអ៊ិស្លាមនៅស៊ីរី ដែលកងកម្លាំង FDS កំពុងវាយលុកប៉ុនប៉ងដណ្តើមយកដោយមានការជួយទ្រទ្រង់របស់កងទ័ពអាេមរិក និងការជួយទ្រទ្រង់តាមអាកាសរបស់ក្រុមចម្រុះអន្តរជាតិ ។
ការប្រឈមមុខដាក់គ្នាខ្លាំងនេះ ក៏កើតមានដែរពេលកងទ័ពស៊ីរីរុលមកកៀក បណ្តាតំបន់ត្រួតត្រាដោយកងកម្លាំងដែលអាមេរិកជួយទ្រទ្រង់ ព្រមទាំងកំពុងរុលទៅភាគខាងជើង និងភាគអាគ្នេយ៍ស៊ីរី ។
អាមេរិកចង់ឱ្យស្តារឡើងវិញគមនាគមន៍យោធាជាមួយក្រុងមូស្គូ ក្រោយការបាញ់ទម្លាក់យន្តហោះចម្បាំងស៊ីរីធុន SU-22 មួយគ្រឿង ដែលអ្នកបើកលោតចេញទាន់តាមឆត្រយោង ហើយជួយសង្គ្រោះដោយកងទ័ពស៊ីរី ៕
ចែករំលែកព័តមាននេះ