រាជធានីភ្នំពេញ ៖ ការប្រកួតប្រដាល់កាលពីយប់ថ្ងៃទី១៨ មិថុនា នៅលើសង្វៀនទូរទស្សន៍អាស៊ីអាគ្នេយ៍ អ្នកទស្សនាផ្ទាល់ជាងពាក់កណ្ដាលចាប់អារម្មណ៍តែការប្រកួតរវាងកីឡាករវ័យក្មេងចាន់ សច្ចា និងកីឡាករជើងចាស់ សេក គឹមភាព ប៉ុណ្ណោះដោយសារតែកីឡាករទាំងពីរជាពិសេសកីឡាករសេក គឹមភាពបានធ្វើឱ្យអ្នកគាំទ្រខ្លួនបាក់ចង្កេះនិងសម្តែងការហួសចិត្តយ៉ាងខ្លាំងចំពោះទង្វើរបស់កីឡាកររូបនេះដែលផ្ទុយពីការគិតរបស់ពួកគេ ។ រឿងហួសចិត្តកើតឡើងនៅពេលគណៈកម្មការប្រកាសលទ្ធផលឱ្យគេចាញ់ភ្លាម អ្នកទស្សនាបានស្រែកឆោឡោថាមិនយុត្តិធម៌ និងជាលទ្ធផលដែលពួកគេមិនអាចទទួលយកបាន ប៉ុន្តែបើក្រឡេកមើលកីឡាករ សេក គឹមភាព ឯណេះវិញ បែរជាសប្បាយចិត្តស្ទុះទៅចាប់ដៃកីឡាករចាន់ សច្ចាបង្ហាញពីការយល់ព្រមទទួលយកលទ្ធផលនោះដោយមិនឡាំប៉ាតាមអ្នកគាំទ្ររបស់ខ្លួនទៅវិញ ។
ខុសពីការប្រកួតនាពេលកន្លងមក ពេលដែលអ្នកទស្សនាបញ្ចេញប្រតិកម្មមិនពេញចិត្តនឹងលទ្ធផលដែលគណៈកម្មការប្រកាសឡើងគឺកីឡាករដែលចាញ់រមែងមានមោទនភាព ហើយស្រែកបន្ទរថា ខ្លួនប្រឹងវាយចង់ងាប់បែរជាឱ្យចាញ់ សម្រាប់កីឡាករ សេក គឹមភាព ដែលចាញ់ហើយអ្នកទស្សនាចង់មួយចំហៀងសង្វៀនខំស្រែកឡូឡាថាមិនយុត្តិធម៌គេបែរជាញញឹមទទួលយកលទ្ធផលនោះទៅវិញ ។ សេក គឹម ភាព និយាយថា ក្នុងនាមជាអ្នកប្រកួតលោកមិនអាចដឹងថា អ្នកណាត្រូវឈ្នះអ្នកណានោះទេ ដោយសារតែពេលកំពុងប្រកួតលោកប្រឹងតែវាយនិងទប់មិនឱ្យគូប្រកួតវាយចូលប៉ុណ្ណោះ ។
លោកថា អ្នកគាំទ្រស្រែកថា លោកគួរឈ្នះ ប៉ុន្តែបើគេឱ្យលោកចាញ់ គឺមានន័យថាលោកប្រហែលជាចាញ់មែនហើយ គឺមិនអាចយល់ស្របតាមសំឡេងប្រតិកម្មរបស់អ្នកទស្សនាដែលគ្មានជំនាញកាត់ក្ដីលើការប្រកួតកើតទេ ។
លោកបញ្ជាក់ទាំងញញឹមថា៖«ខ្ញុំមិនដឹងថា ពេលប្រកួតអ្នកណាឈ្នះអ្នកណាចាញ់ទេ តែបងឃើញហើយបើគេឱ្យចាញ់គឺមានន័យថាខ្ញុំចាញ់មែនហើយ បើពេលឡើងវាយយើងខ្វល់តែរឿងការពារខ្លួន និងវាយសម្រុកហ្នឹង មានពេលឯណាទៅរាប់ពិន្ទុថាយើងវាយបានប៉ុន្មានៗនោះ!»។ នេះជាការលើកឡើងដ៏កម្រមួយដែលគេមិនដែលឮកីឡាករប្រកួតចាញ់និយាយចេញពីមាត់ទាល់តែសោះនៅពេលមានការតវ៉ាពីអ្នកទស្សនាយ៉ាងកងរំពងបន្ទាប់ពីគណៈកម្មការប្រកាសឱ្យគេចាញ់ពិន្ទុកីឡាករវ័យក្មេង ចាន់ សច្ចា ។ ពួកអ្នកគាំទ្រស្រែកថា អ្នកត្រូវឈ្នះពិន្ទុគឺកីឡាករ សេក គឹមភាព ទៅវិញទេ ដោយសារតែក្នុងពេលប្រកួតគឺកីឡាកររូបនេះវាយត្រូវគោលដៅសំខាន់ៗ ថែមទាំងវាយឱ្យ ចាន់ សច្ចា បែកលើផ្ទៃមុខ និងដួលដោយអន្លើផង ។ កីឡាករ សេក គឹមភាព ហាក់មិនចាប់អារម្មណ៍ចំពោះសំឡេងតវ៉ាជួយដល់លោកនោះទេ ផ្ទុយទៅវិញលោកបែរជាញញឹមពេញចិត្តចំពោះលទ្ធផលនោះ និងបាននិយាយរាក់ទាក់ទៅកាន់គូប្រកួតនៅខាងក្រោយសង្វៀននោះផង ។
ចំណែកចាន់ សច្ចា បាននិយាយទៅកាន់កីឡាករសេក គឹមភាពថា ៖«បងឯងវាយខ្ញុំប៉ុន្មានដៃហ្នឹងធ្ងន់មែនទែន មិនដឹងយ៉ាងម៉េចទេខ្ញុំ» ។ សេក គឹមភាព បានឆ្លើយតបទាំងទឹកមុខញញឹមទៅកាន់សិស្សប្អូនវិញថា៖«ធ្ងន់ឯណាទេស្រាលហ្នឹង ឯងនេះដាក់អញប៉ុន្មានដៃចុងក្រោយចង់យ៉ាប់!» ។ បន្ថែមពីលើការឆ្លើយឆ្លងដោយសំឡេងរាក់ទាក់ អ្នកទាំងពីរក៏បានសួរគ្នាពីរបួសលើផ្ទៃមុខទៀតផង ខុសពីគូប្រកួតភាគច្រើនដែលមានសំឡេងតវ៉ាពីអ្នកទស្សនាបែបនេះ ច្បាស់ជាពាក់មុខយក្សដាក់គ្នា និងបញ្ចេញអំនួតមិនទទួលស្គាល់លទ្ធផលដែលបានប្រកាសឡើងនោះផង ។ អ្នកទស្សនាភាគច្រើនមិនបានដឹងថា កីឡាករទាំងពីរញញឹមរាក់ទាក់ដាក់គ្នានៅខាងក្រោយសង្វៀននោះទេ ពួកគេម្នាក់ៗបានទាំងស្រែកជេរអ្នកផ្ដល់ពិន្ទុថាមិនចេះមើលការប្រកួតទើបឱ្យ ចាន់ សច្ចា ឈ្នះពិន្ទុនោះផង ។ ធៀបសភាពខាងក្នុង និងខាងក្រៅសង្វៀន ម្នាក់ៗធ្លាក់ថ្លើមក្ដុក ដោយសារតែអ្នកខាងក្នុងឈ្លោះគ្នា តែកីឡាករដែលនៅខាងក្រៅញញឹមដាក់គ្នា និងថាលទ្ធផលដែលបានប្រកាសឡើងគឺគ្មានអ្វីដែលត្រូវតវ៉ាទេ ។ អ្នកបានឃើញសភាពខាងក្រៅសង្វៀនរបស់សេក គឹមភាព និងចាន់ សច្ចា សុទ្ធតែយល់ឃើញថា នេះបានហៅថាទឹកចិត្តអ្នកកីឡា ដោយមិនមែនសំអាងថាអ្នកគាំទ្រមិនពេញចិត្ត ក៏បញ្ចេញអំនួតហើយពាក់មុខយក្សដាក់កីឡាករឈ្នះ ដើម្បីថាខ្លួនបរាជ័យដោយសារតែការដាក់ពិន្ទុលម្អៀងនោះទេ ។
លោក ញាណ សុធី អ្នករៀបចំកម្មវិធីប្រដាល់ប្រចាំសង្វៀនទូរទស្សន៍ខាងលើបាននិយាយថា ការប្រកួតរវាងកីឡាករសេក គឹមភាព និងចាន់ សច្ចា មានការតវ៉ាដោយសារតែអ្នកទស្សនាភាគច្រើនចាក់ភ្នាល់ថាសេក គឹម ភាព ឈ្នះ លុះដល់លទ្ធផលមិនដូចបំណងក៏មានអារម្មណ៍ក្ដៅក្រហាយ ។ លោកថា ការប្រកួតមិនអាចធ្វើតាមការចង់បានរបស់អ្នកចូលចិត្តចាក់ភ្នាល់បានទេ ដោយត្រូវផ្អែកលើលទ្ធផលពិន្ទុ និងកម្រិតវាយចេញជាក់ស្ដែងរបស់គូប្រកួតក្នុងរយៈពេល៥ទឹក បើគ្មានបញ្ហាសន្លប់ ។ លោកថា ចាន់ សច្ចា មានប្រៀបល្អជាងជាពិសេសក្នុងទឹកទី២ និងទឹកទី៣ ឯកីឡាករសេក គឹមភាព ធ្វើបានល្អតែក្នុងទឹកទី៤បន្តិចប៉ុណ្ណោះ ទើបលោកយល់ថា លទ្ធផលដែលឱ្យកីឡាករវ័យក្មេងបង្គោលក្រហមឈ្នះពិន្ទុគឺជារឿងត្រឹមត្រូវ ។ ជាមួយគ្នានេះលោកសរសើរចំពោះការទទួលខុសត្រូវរបស់កីឡាករ សេក គឹមភាព ដោយបានចាត់ទុកថាកីឡាកររូបនេះ ទទួលស្គាល់ចំពោះការកាត់ក្ដីរបស់ចៅក្រម ដែលផ្ទុយពីអ្នកតវ៉ានោះគឺជាទង្វើគួរឱ្យយកគំរូតាម ។ លោកថា កីឡាករម្នាក់មិនអាចយកសំឡេងឈ្នះភ្នាល់មកឆ្លុះខ្លួនឯងបានទេ ដោយសារតែការផ្ដល់ពិន្ទុគេវិនិច្ឆ័យផ្អែកលើបច្ចេកទេស និងភាពរហ័សរបស់កីឡាករ ។ លោកថា សេក គឹមភាព គឺជាកីឡាករល្អម្នាក់ទោះបីមានការជំទាស់នឹងលទ្ធផលដែលឱ្យគេចាញ់ពីសំណាក់អ្នកទស្សនាក្ដី គេមិនត្រឹមតែមិនឡាំប៉ាតាមទេថែមទាំងបង្ហាញកាយវិការពេញចិត្តទទួលយកលទ្ធផលនេះទៀតផង ។
កីឡាកររូបនេះបានអះអាងថា អ្វីដែលអ្នកតវ៉ាបានបង្កគឺជាសិទ្ធិរបស់ពួកគេ ចំណែកលោកគឺពេញចិត្តចំពោះការកាត់ក្ដីរបស់គណៈកម្មការ ។ លោក ញាណ សុធី ថា បើកីឡាករគ្រប់រូបសុទ្ធតែមានទស្សនៈបែបនោះ គឺមានន័យថា វិស័យប្រដាល់នៅក្នុងប្រទេសកម្ពុជានឹងកាន់តែប្រសើរឡើងហើយ ដើម្បីកែទម្លាប់អ្នកប្រកួតចាញ់តវ៉ាទាំងទទឹង ទិស ៕
ចែករំលែកព័តមាននេះ