រាជធានីភ្នំពេញ ៖ ដើម្បីពង្រឹងឧស្សាហកម្មធានារ៉ាប់រង កែលម្អការប្រកួតប្រជែង និងកិច្ចការពារអ្នកប្រើប្រាស់ និងម្ចាស់ទុន រាជរដ្ឋាភិបាលកម្ពុជាបានដាក់ចេញនូវយុទ្ធសាស្ត្រ និងផែនការអនាគតសំខាន់ចំនួន៨ចំណុច ។ នេះបើយោងតាមឯកសារយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០១៦-២០២៥របស់រាជរដ្ឋាភិបាល ។ យុទ្ធសាស្ត្រនិងផែនការអនាគតទាំង៨ចំណុចរួមមាន ៖
១-ធានាឱ្យមានអនុលោមភាពតាមការអនុវត្តសមស្រប ដែលអាចទទួលយកបាននៃកម្រិតសោធនភាព ការវិនិយោគ ការធានារ៉ាប់រងបន្តទុនបម្រុង គណនេយ្យភាព និងស្តង់ដារបាយការណ៍ ។
២-ការកម្រិតស្តង់ដា និងរៀបចំបញ្ចូលក្នុង ការប្រព័ន្ធអេឡិចត្រូនិក នូវព័ត៌មានដែលបង្ហាញអំពីស្ថិតិ និងហិរញ្ញវត្ថុនៅត្រឹមឆ្នាំ២០១៩ ។
៣-ការបោះពុម្ពផ្សាយនូវរបាយការណ៍អំពីហិរញ្ញវត្ថុ និងរបាយការណ៍ត្រួតពិនិត្យគ្រឹះស្ថានធានារ៉ាប់រងលើកគេហទំព័ររបស់នាយកដ្ឋាន ធានារ៉ាប់រង និងសោធនត្រឹមឆ្នាំ២០១៩ ។
៤-បង្កើនសមត្ថភាពនៃអ្នកត្រួតពិនិត្យដល់ទីកន្លែងតាមបច្ចេកទេសត្រួតពិនិត្យដែលត្រូវបានកែលម្អ ដោយស្របទៅនឹងការអនុវត្តជាក់ស្តែងក្នុងឧស្សាហកម្មធានារ៉ាប់រងនៅត្រឹមឆ្នាំ២០១៩។
៥-ការបង្កើនទំនុកចិត្តរបស់អតិថិជននៅក្នុងឧស្សាហកម្មធានារ៉ាប់រង ដោយរៀបចំ និងពិនិត្យឡើងវិញលើបទប្បញ្ញត្តិពាក់ព័ន្ធនឹងការអនុវត្តក្នុងទីផ្សារ និងកិច្ចការពារអ្នកប្រើប្រាស់ រួមជាមួយកម្មវិធីផ្សះផ្សារវិវាទ ធានារ៉ាប់រង ដំណើរការស៊ើបអង្កេត និងពាក្យបណ្តឹង ។
៦-បង្កើនការចូលរួមក្នុងទីផ្សារធានារ៉ាប់រង និងដង់ស៊ីតេធានារ៉ាប់រង ដោយកម្មវិធីអប់រំអតិថិជនតាមរយៈគេហទំព័រ និងបណ្តាញសង្គមរបស់នាយកដ្ឋានធានារ៉ាប់រង និងសោធន ។
៧-កំណត់ស្តង់ដា និងពង្រឹងដំណើរការទទួល និងអនុម័តផលិតផលធានារ៉ាប់រងទម្រង់បែបបទ និងអត្រា ដើម្បីធានាការប្រព្រឹត្តដោយត្រឹមត្រូវចំពោះអតិថិជននៅត្រឹមឆ្នាំ២០២០ ។
៨-បង្កើតអង្កត់ភាពគោលនយោបាយមួយនៅក្នុងនាយកដ្ឋានធានារ៉ាប់រង និងសោធន ដែលនឹងទទួលខុសត្រូវចំពោះការតាក់តែងគោលនយោបាយសម្រាប់វិស័យធានារ៉ាប់រងនៅកម្ពុជា ។
ទាក់ទងនិងការដាក់ចេញនូវយុទ្ធសាស្ត្ររបស់រាជរដ្ឋាភិបាល ប្រធានសមាគមធានារ៉ាប់រងកម្ពុជាបានលើកឡើងថា សម្រាប់ប្រតិបត្តិករចាំតែអនុវត្តតាមទេ ហើយយុទ្ធសាស្ត្រនេះ មុននឹងដាក់ចេញ រាជរដ្ឋាភិបាលបានវាយតម្លៃត្រឹមត្រូវ ។
លោកហ៊ុយ វ៉ាថារ៉ូ មានប្រសាសន៍ថា ប្រតិបត្តិករចាំតែអនុវត្តតាម ហើយបើនិយាយរឿងរបាយការណ៍សព្វថ្ងៃនេះ មានការផ្សព្វផ្សាយទូលំទូលាយទៅហើយ ។
លោក ហ៊ុយ វ៉ាថារ៉ូ បន្ដថា ៖ « ខ្ញុំគិតថា ការដាក់នូវយុទ្ធសាស្ត្រនេះមក មិនមែនមានមហិច្ឆតាខ្ពស់ពេក ធ្វើឱ្យទីផ្សារអនុវត្តមិនបាននោះទេ ។ រាជរដ្ឋាភិបាលមានការវាយតម្លៃបានត្រឹមត្រូវមុននឹងដាក់ចេញនូវយុទ្ធសាស្ត្រ។ យុទ្ធសាស្ត្រនេះមានគោលបំណងពង្រឹងទីផ្សារធានារ៉ាប់រងឱ្យកាន់តែមានប្រសិទ្ធភាពដើម្បីការពារអតិថិជន » ៕
ចែករំលែកព័តមាននេះ