រាជធានីភ្នំពេញ ៖ ខណៈដែលជ្រូកនាំចូលពីវៀតណាមរាប់រយក្បាលក្នុង១ថ្ងៃៗ ធ្វើឲ្យកសិករ និងម្ចាស់កសិដ្ឋានចិញ្ចឹមជ្រូកកំពុងតែប្រឈមនឹងបញ្ហាតម្លៃធ្លាក់ចុះ ហើយបញ្ហានេះ ពុំទាន់មានដំណោះស្រាយណាមួយសមស្របនៅឡើយ ។ យ៉ាងណាក៏ដោយ ជាបណ្ដោះអាសន្ន សមគមអ្នកចិញ្ចឹមជ្រូកបានអំពាវនាវឲ្យកសិករឬម្ចាស់កសិដ្ឋានផ្អាកការចិញ្ចឹមមួយរយៈសិន រង់ចាំជ្រូកវៀតណាមដែលចិនមិនទិញនោះអស់ពីស្ដុក នោះតម្លៃជ្រូកលើទីផ្សារនឹងឡើងថ្លៃវិញ ។
កាលពីពេលថ្មីៗនេះ ក្រសួងកសិកម្ម រុក្ខាប្រមាញ់និងនេសាទ និងភាគីអ្នកចិញ្ចឹមជ្រូក រួមទាំងអ្នកកាប់ជ្រូកផ្គត់ផ្គង់លើទីផ្សារផងនោះ បានជួបប្រជុំគ្នាមួយដើម្បីស្វែងរកដំណោះស្រាយលើបញ្ហាជ្រូក ធ្វើយ៉ាងណាឱ្យកសិករ និងម្ចាស់កសិដ្ឋានចិញ្ចឹមជ្រូកមានភាពប្រសើរឡើងវិញ ។
នៅក្នុងកិច្ចប្រជុំ តំណាងកុងស៊ីកាប់ជ្រូកអះអាងថា នឹងទទួលយកជ្រូកក្នុងស្រុកមកកាប់ដើម្បីផ្គត់ផ្គង់ទីផ្សារ តែក្នុងតម្លៃពី៥.៨០០ទៅ៦ពាន់រៀល ក្នុង១គីឡូក្រាមប៉ុណ្ណោះ គឺដូចគ្នានឹងតម្លៃជ្រូករស់នាំចូលពីវៀតណាមដែរ ប៉ុន្ដែភាគីអ្នកចិញ្ចឹមវិញថា តម្លៃប៉ុណ្ណេះមិនអាចទទួលយកបានទេ ខណៈការចំណាយថ្លៃដើមលើការចិញ្ចឹមជ្រូកអស់ប្រមាណ៧.២០០រៀលទៅហើយក្នុង១គីឡូក្រាម ហើយពួកគេបានស្នើសុំឲ្យមានការទប់ស្កាត់ ឬកាត់បន្ថយការនាំចូល ។
យ៉ាងណាក៏ដោយស្នើសុំនេះ ប្រហែលជាមិនអាចទៅរួចឡើយ ដោយសារតែកម្ពុជាជាប្រទេសប្រកាន់ទីផ្សារសេរី ។ នេះបើតាមសមាគមអ្នកចិញ្ចឹមជ្រូកកម្ពុជា ។
លោក លី ឡាវីល ប្រធានក្រុមប្រឹក្សាភិបាលសមាគមអ្នកចិញ្ចឹមជ្រូកកម្ពុជា និងជាអ្នកគ្រប់គ្រងទូទៅនៃក្រុមហ៊ុនM’s Pig បានឲ្យដឹងថា ពេលនេះ អ្នកចិញ្ចឹមជ្រូកក្នុងស្រុកគ្មានវិធានការណាមួយដើម្បីឱ្យតម្លៃជ្រូកឡើងបាននោះទេ ខណៈដែលជ្រូកពីវៀតណាមមានតម្លៃទាប។ ម្យ៉ាងទៀត កម្ពុជាជាប្រទេសទីផ្សារសេរី ដូចនេះមិនអាចទៅហាមឃាត់វៀតណាមមិនឲ្យនាំចូលមកបាននោះទេ។
លោកនិយាយ ៖« យើងមិនអាចប្រកួតប្រជែងទីផ្សារជ្រូកជាមួយវៀតណាមដែលសល់ច្រើននោះទេ ពីព្រោះជ្រូកដែលវៀតណាមត្រូវផ្គត់ផ្គង់ទៅចិនមានចំនួនច្រើន ហើយនៅពេលចិនបិទទីផ្សារមិនឲ្យនាំចូលនោះ ក៏បានធ្វើទីផ្សារជ្រូកវៀតណាមនៅសល់លើសលប់ ដូច្នេះទោះក្នុងតម្លៃណាក៏ដោយ ក៏ឈ្មួញវៀតណាមត្រូវតែលក់ឱ្យកម្ពុជាដែរ » ។
ដើម្បីដំណោះស្រាយជាបណ្ដោះអាសន្ន ប្រធានក្រុមប្រឹក្សាភិបាលសមាគមអ្នកចិញ្ចឹមជ្រូកកម្ពុជារូបនេះ បានអំពាវនាវសុំឲ្យកសិករ និងម្ចាស់កសិដ្ឋានចិញ្ចឹមជ្រូកទាំងអស់ ផ្កាកការចិញ្ចឹមមួយរយៈសិន ដើម្បីបញ្ជៀសការខាតបង់បន្ដទៀត ។
លោកលី ឡាវីល បាននិយាយថា បើមិនចង់បន្តការខាតបង់ច្រើនទៀត កសិករឬម្ចាស់កសិដ្ឋានចិញ្ចឹមជ្រូកខ្នាតតូច សូមផ្អាកការចិញ្ចឹមជ្រូកសិន ។ ការផ្អាកនេះប្រហែលមិនមែនមួយខែ ពីរឬបីខែទេ តែអាចអូសបន្លាយដល់១ឬ២ឆ្នាំ រង់ចាំដល់ពេលជ្រូកវៀតណាមដែលចិនមិនទទួលទិញនោះអស់ពីស្តុក ទើបវាឡើងថ្លៃវិញ ។
ជាមួយគ្នានេះ លោកថា ៖« បច្ចុប្បន្ន មានកសិករ និងកសិដ្ឋានមួយចំនួនហើយនៅទូទាំងប្រទេសបានបោះបង់ការចិញ្ចឹមជ្រូក ព្រោះតែមិនអាចទប់ទល់នឹងការខាតបង់បាន ហើយខ្ញុំសូមអំពាវនាវឲ្យផ្អាកការចិញ្ចឹមមួយរយៈសិន ទំរាំឲ្យជ្រូកវៀតណាមវាអស់ពីស្តុក យើងអាចមានទីផ្សារ និងឡើងថ្លៃវិញ » ។
ដោយឡែកពាក់ព័ន្ធនឹងសុវត្ថិភាពទៅលើសត្វជ្រូក សមាគមមិនមានតួនាទីឆែកឬពិនិត្យសុខភាពមុននាំចូលនោះទេ មានតែមន្ត្រីគយប៉ុណ្ណោះ ប៉ុន្ដែកន្លងមក គយបានបញ្ជាក់ថា ជ្រូកដែលនាំចូលមកកម្ពុជា មានការបញ្ជាក់ច្បាស់ពីពេទ្យសត្វជំនាញវៀតណាមថា ជ្រូកទាំងនោះជាជ្រូកល្អ មិនប៉ះពាល់ដល់អ្នកបរិភោគទេ ។
លោកឡាវីលនិយាយថា ៖« ខាងវៀតណាមបានបង្ហាញឯកសារថា ជ្រូកទាំងនោះជាជ្រូកល្អ ហើយមកដល់កម្ពុជា ក៏ថាល្អដែរទៅ មិនមានការត្រួតពិនិត្យបន្ថែមទេ ។ ម្យ៉ាងទៀត នៅកម្ពុជាមិនមានកន្លែង ដើម្បីទៅពិនិត្យសុខភាពសត្វ មុននាំចូលនោះទេ។ សព្វថ្ងៃពេលឈ្មួញទៅទិញជ្រូកពីវៀតណាម គឺខាងវៀតណាមជាអ្នកពិនិត្យឲ្យ និងចេញឯកសារបញ្ជាក់ជូនថា ល្អឬមិនល្អ ហើយមកដល់ខ្មែរ អត់មានពិនិត្យបន្ថែមនោះទេ » ៕
ចែករំលែកព័តមាននេះ