អា​ហ្ស​ង់​ទី​ន ៖ ធនាគារកណ្តាល​របស់​ប្រទេស​អា​ហ្ស​ង់​ទី​ន ត្រូវ​បាន​រាយការណ៍​ថា កំពុង​ពិចារណា​ក្នុង​ការ​ដាក់​រូប​កំពូល​ខ្សែប្រយុទ្ធ Lionel Messi ដែល​ជា​វីរបុរស​បាល់ទាត់​ប្រទេស​របស់​ខ្លួន នៅ​លើ​ក្រដាសប្រាក់​១​ពាន់​ប៉េ​សូ​ថ្មី បន្ទាប់​ពី​បុរស​ដ៏​អស្ចារ្យ​រូប​នេះ បាន​រួមចំណែក​យ៉ាង​ធំធេង​ក្នុង​ការ​ជួយ​អា​ហ្ស​ង់​ទី​ន​ឈ្នះ​ពានរង្វាន់ World Cup 2022 ដែល​ធ្វើ​ឡើង​នៅ​ប្រទេស​កា​តា កាលពី​ថ្ងៃ​ទី​១៨ ខែធ្នូ កន្លង​ទៅ​ថ្មី​ៗ​នេះ​។ គួររំលឹកថា កីឡាករ​អា​ហ្ស​ង់​ទី​ន ត្រូវ​ដឹក​តាម​ឧទ្ធម្ភាគចក្រ ខណៈ​ផ្លូវ​ទាំងអស់​កកស្ទះ​ដោយ​ហ្វូង​អ្នកគាំទ្រ​ជាង​៤​លាន​នាក់​(​វី​ដេ​អូ​)

យោង​តាម​ប្រភព​ពី​កាសែត El Financiero របស់​ម៉ិ​ក​ស៊ិ​ក កាលពី​ថ្ងៃ​ទី​២១ ខែធ្នូ បាន​រាយការណ៍​ថា ស្ថាប័ន​គ្រប់គ្រង​ហិរញ្ញវត្ថុ​អា​ហ្ស​ង់​ទី​ន កំពុង​សម្លឹង​មើល​ជម្រើស ដើម្បី​សម្គាល់​អំពី​ជ័យជម្នះ​ជា​ប្រវត្តិសាស្ត្រ​របស់​ខ្លួន បន្ទាប់​ពី​បាន​ឈ្នះ​ពានរង្វាន់ World Cup 2022 ក្រោយ​ខកខាន​អស់​រយៈ​៣៦​ឆ្នាំ និង​ជា​លើក​ទី​៣ នៅ​ក្នុង​ប្រវត្តិសាស្ត្រ​នៃ​ព្រឹត្តិការណ៍​បាល់ទាត់​ដ៏​ធំ​បំផុត​លើ​ពិភពលោក​មួយ​នេះ​។

ស្ថាប័ន​គ្រប់គ្រង​ហិរញ្ញវត្ថុ​អា​ហ្ស​ង់​ទី​ន កំពុង​ពិចារណា​ក្នុង​ការ​ដាក់​រូប​ខ្សែប្រយុទ្ធ Lionel Messi នៅ​លើ​ក្រដាសប្រាក់​១​ពាន់​ប៉េ​សូ​ថ្មី ដែល​ជា​រូបិយប័ណ្ណ​ធំ​បំផុត​របស់​ប្រទេស​អា​ហ្ស​ង់​ទី​ន ដោយ​លើក​ឡើង​ថា គឺជា​ជម្រើស​ដែល​ជាទី​ពេញ​បំផុត ជាមួយនឹង​តួលេខ​ចាប់ផ្តើម​ដោយ​លេខ​១០ ដែល​ជា​លេខ​អាវ Messi វីរបុរស​បាល់ទាត់​របស់​ពួក​គេ​បាន​ពាក់​។

លើស​ពី​នេះ​ទៅ​ទៀត នៅ​ផ្នែក​ខាងក្រោយ​នៃ​ប្រកាស​ប្រាក់​១​ពាន់​ប៉េ​សូ​ថ្មី ដែល​ត្រូវ​បាន​ស្នើ​ឡើង ដោយ​ណែនាំ​ថា ពាក្យ «La Scaloneta» ដែល​ជា​ឈ្មោះ​ហៅ​ក្រៅ​របស់​លោក Lionel Scaloni គ្រូបង្វឹក​ក្រុម​ជម្រើសជាតិ​អា​ហ្ស​ង់​ទី​ន នឹង​ត្រូវ​ចារឹក​នៅ​លើ​ក្រដាសប្រាក់​ថ្មី​នេះ​ផង​ដែរ ដែល​នេះ​បង្ហាញ​ពី​ការ​គោរព​ដល់​ស្នាដៃ​បុរស​ដ៏​អស្ចារ្យ​ទាំង​២​រូប​នេះ ក្នុង​ការ​ជួយ​ប្រទេស​ជាតិ​ឈ្នះ​ពានរង្វាន់ Copa America 2021 ពានរង្វាន់ Finalissima 2022 និង​ធំ​បំផុត​គឺ​ការ​ឈ្នះ​ពានរង្វាន់ FIFA World Cup 2022 នៅ​ប្រទេស​កា​តា​។

ប៉ុន្តែ​ទោះបីជា​យ៉ាងណា រហូត​មក​ទល់​ពេល​នេះ នៅ​មិន​ទាន់​មានការ​សម្រេច​ណាមួយ ត្រូវ​បាន​ធ្វើ​ឡើង​ជុំវិញ​រឿង​នេះ នៅឡើយ​ទេ ដោយ​វា​នេះ​គ្រាន់តែ​ជា​ចេតនា​មួយ​ប៉ុណ្ណោះ​។

គួរ​រំលឹក​ថា ក្រុម​មេឃ​ខៀវ​អា​ហ្ស​ង់​ទី​ន បាន​ក្លាយជា​ម្ចាស់​ពានរង្វាន់ FIFA World Cup 2022 បន្ទាប់​ពី​យកឈ្នះ​លើ​ក្រុម​មាន់គក​បារាំង ដែល​ជា​ក្រុម​ការពារ​តំណែង​ជើងឯក ដោយ​ការ​ទាត់​បាល់​ប៉េ​ណា​ល់​ទី​កាត់សេចក្តី នៅ​ក្នុង​លទ្ធផល ៤-២ ក្រោយ​បញ្ចប់​ការ​ប្រកួត​១២០​នាទី បាន​ត្រឹម​ស្មើគ្នា ដោយ​លទ្ធ​ផល ៣-៣ នៅ​ឯ​កីឡដ្ឋាន Lusail​។

នៅ​ក្នុង​ជំនួប​ជា​ប្រវត្តិសាស្ត្រ​នេះ ប្រធាន​ក្រុម Lionel Messi រកបាន​៣​គ្រាប់​ផង​ដែរ ២​គ្រាប់​នៅ​ក្នុង​ការ​ប្រកួត ១២០​នាទី និង​១​គ្រាប់ នៅ​ការ​ទាត់​បាល់​ប៉េ​ណា​ល់​ទី​កាត់សេចក្តី​។ បច្ចុប្បន្ន Messi កំពុង​តែ​រីករាយ​សោយសុខ​ជាមួយនឹង​ការ​ឈ្នះ​ពានមាស World Cup ជា​លើក​ដំបូង​ក្នុង​អាជីព​របស់​ខ្លួន រួម​និង​ការ​ឈ្នះ​ពានរង្វាន់ កីឡាករ​ល្អ​បំផុត​ប្រចាំ​ព្រឹត្តិការណ៍ World Cup 2022 ផង​ដែរ (Golden Ball)៕ (​ដកស្រង់​ចេញពី SPORTbible និង The Sun)