ខេត្តស្វាយរៀង ៖ មានឡដុតធ្យូង៤កន្លែងនៅភូមិព្រែកពក ឃុំថ្នាធ្នង់ ស្រុករំដួល កំពុងដំណើរការដុតធ្យូងយ៉ាងរលូនដែលជាហេតុនាំឲ្យប៉ះពាល់ដល់ព្រៃឈើដែលនៅសេសសល់បន្តិចបន្តួចតាមបន្ទាត់ព្រំដែន
ខេត្តស្វាយរៀង ៖ មានឡដុតធ្យូង៤កន្លែងនៅភូមិព្រែកពក ឃុំថ្នាធ្នង់ ស្រុករំដួល កំពុងដំណើរការដុតធ្យូងយ៉ាងរលូនដែលជាហេតុនាំឲ្យប៉ះពាល់ដល់ព្រៃឈើដែលនៅសេសសល់បន្តិចបន្តួចតាមបន្ទាត់ព្រំដែន ដោយសារវៀតណាមឲ្យតម្លៃធ្យូងខ្ពស់១គីឡូក្រាម១៥០០រៀល ។ បើតាមប្រជាពលរដ្ឋប្រកបមុខរបរដុតធ្យូងនៅភូមិព្រែកពកបានឲ្យដឹងថា ធ្យូងមានហាងឆេងវៀតណាមឲ្យតម្លៃខ្ពស់ពួកគាត់បានចាប់យកអាជីពដុតធ្យូង ហើយបានទៅរៀនធ្វើឡដុតធ្យូងពីប្រជាពលរដ្ឋនៅស្រុករមាសហែករហូតបានចេះមានជំនាញដុតធ្យូងមកប្រកបមុខរបរអស់រយៈពេលជាង១០ឆ្នាំមកហើយ គឺមុខរបរដុតធ្យូងនេះកាក់កបគ្រាន់បើជាងមុខរបរកសិកម្ម ពេលទទួលផលហើយគ្មានទីផ្សារ ។
ប្រជាពលរដ្ឋដែលប្រកបមុខរបរដុតធ្យូងបានឲ្យដឹងទៀតថា នៅភូមិព្រែកពកនេះគឺជាភូមិមួយស្ថិតនៅជាប់ព្រំដែនវៀតណាម ហើយភូមិសាស្ត្រនេះសំបូរទៅដោយព្រៃឈើតាំងពីបុរាណមក ក៏ប៉ុន្តែជាង១០ឆ្នាំចុងក្រោយនេះដីស្រែមួយចំនួនបង្កបង្កើនផលមិនបានដោយជួបភាពរាំងស្ងួតក៏បានប្តូរមុខរបរមកដាំដំណាំដំឡូងមីវិញ ក៏ប៉ុន្តែគ្មានបច្ចេកទេសដាំ និងគ្មានដើមទុនក៏សម្រេចចិត្តជួលដីឲ្យប្រជាជនវៀតណាមដាំដំឡូវមី វៀតណាមឲ្យឈ្នួលក្នុង១ហិកតា១០០ដុល្លារទៅ១៥០ដុល្លារហើយពួកគាត់គ្មានមុខរបរក៏ងាកមករកមុខរបរដុតធ្យូងលក់រហូតមក ។
ហើយការដុតធ្យូងនេះដែរគឺពួកគាត់បានដើរទិញដើមឈើធម្មជាតិ និងដើមអាកាស្យា ដើមប្រេងខ្យល់ ពីអ្នកភូមិដើម្បីយកមកដុតធ្យូងនេះ ហើយបានដឹកឆ្លងដែនទៅលក់នៅប្រទេសវៀតណាមក្នុង១គីឡូក្រាមតម្លៃ១៥០០រៀលដែលគេទទួលយកទៅលក់បន្ត ។ ទាក់ទិនករណីឡដុតធ្យូងនេះដែរមិនអាចសុំការបំភ្លឺពីសមត្ថកិច្ចរដ្ឋបាលព្រៃឈើបានទេរហូតមកដល់ព្រឹកថ្ងៃទី១៩នេះ ៕
ចែករំលែកព័តមាននេះ