ខេត្តព្រៃវែង ៖ ស្ដ្រីម្នាក់បានស្លាប់បាត់បង់ជីវិត ក្រោយពេលដែលក្រុមគ្រួសារបញ្ជូនមកសម្រាកព្យាបាលនៅក្នុងមន្ទីរពេទ្យបង្អែកស្រុកពារាំង បានរយៈពេលជាង២ម៉ោង។
លោក សុត ផល អាយុ៥៧ឆ្នាំ ត្រូវជាប្ដីស្ដ្រីរងគ្រោះបានឲ្យដឹងថា ប្រពន្ធរបស់គាត់មានឈ្មោះណាត អាង អាយុ៥២ឆ្នាំ មានទីលំនៅក្នុងភូមិពាក់ស្បៃ ឃុំកំពង់ប្រាំង ស្រុកពារាំង ។ លោកបានបន្តថា នៅវេលាម៉ោង២ទៀបភ្លឺឈានចូលថ្ងៃទី១៦ ខែមិថុនា ឆ្នាំ២០១៧ គាត់បាននាំប្រពន្ធទៅកាន់មន្ទីរពេទ្យបង្អែកស្រុកពារាំង ដើម្បីឱ្យគ្រូពេទ្យជួយព្យាបាល ដោយសារតែប្រពន្ធរបស់គាត់ចេះតែរកក្អួតចង្អុលមិនឈប់ ព្រមទាំងមានជំងឺបេះដូងជាប់ខ្លួនផងដែរ។
បុរសដដែលនេះបានបញ្ជាក់ថា ពេលទៅដល់មន្ទីរពេទ្យ គឺមិនឃើញមានគ្រូពេទ្យណាម្នាក់ប្រចាំការសោះ ធ្វើឱ្យគាត់ និងប្រពន្ធចាប់ផ្តើមភ័យ ហើយក៏នាំគ្នា៣នាក់ដើររកពេញមន្ទីរពេទ្យអស់រយៈពេលជាង១ម៉ោង ទើបរកឃើញគ្រូពេទ្យម្នាក់នៅអគារខាងក្រោយគេ ហើយគ្រូពេទ្យក៏មកពិនិត្យប្រពន្ធរបស់គាត់ និងឲ្យថ្នាំប្រពន្ធគាត់ហូបចំនួន២គ្រាប់ ព្រមទាំងបានដាក់សេរ៉ូមឱ្យ១កំប្លោក។ លុះឃើញអការៈប្រពន្ធគាត់កាន់តែធ្ងន់ធ្ងរទៅ ស្រាប់តែគ្រូពេទ្យហៅគាត់ជាប្តីឲ្យផ្ដិតមេដៃធ្វើកិច្ចសន្យាមិនឱ្យប្តឹងផ្តល់ខាងមន្ទីរពេទ្យទេ បើមានរឿងអ្វីកើតឡើង លុះក្រោយពីផ្តិតមេដៃហើយបានតែជាង២ម៉ោង ស្រាប់តែប្រពន្ធគាត់ដាច់ខ្យល់ស្លាប់តែម្ដងទៅ។
លោក អឹម ជឿន ជាប្រជាពលរដ្ឋដែលរស់នៅក្នុងភូមិជាមួយស្រី្តរងគ្រោះបានឲ្យដឹងថា នៅរសៀលថ្ងៃទី១៥ មិថុនា គាត់ឃើញស្ដ្រីរងគ្រោះដើរធ្វើការដូចធម្មតា ហាក់គ្មានជំងឺអ្វីសោះ លុះដល់យប់ឡើងស្រាប់តែឃើញក្រុមគ្រួសារនាំយកទៅសង្គ្រោះនៅមន្ទីរពេទ្យ តែពេលព្រឹកព្រលឹមឡើងស្រាប់តែឮថា គាត់ស្លាប់បាត់ហើយ ធ្វើឱ្យពួកគាត់ និងអ្នកស្រុកផ្សេងៗទៀតមានចម្ងល់យ៉ាងខ្លាំង ។
ព័ត៌មានពិស្តារមានផ្សាយក្នុងសារព័ត៌មានកោះសន្តិភាព
ចែករំលែកព័តមាននេះ