រាជធានីភ្នំពេញ ៖ អាជីពជាភ្នាក់ ងារអចលនទ្រព្យ ជាអាជីពថ្មីមួយនៅកម្ពុជា ដែលបាននិងកំពុងទទួលបានការចាប់អារម្មណ៍ច្រើន ព្រោះអាជីពនេះអាចឲ្យអ្នកមានឱកាសក្លាយជាអ្នកមានយ៉ាងឆាប់ រហ័ស ប៉ុន្តែ
រាជធានីភ្នំពេញ ៖ អាជីពជាភ្នាក់ ងារអចលនទ្រព្យ ជាអាជីពថ្មីមួយនៅកម្ពុជា ដែលបាននិងកំពុងទទួលបានការចាប់អារម្មណ៍ច្រើន ព្រោះអាជីពនេះអាចឲ្យអ្នកមានឱកាសក្លាយជាអ្នកមានយ៉ាងឆាប់ រហ័ស ប៉ុន្តែមិនមែនគ្រប់គ្នាសុទ្ធតែទទួលបានជោគជ័យនោះទេ ។ ដូច្នេះ ដើម្បីជោគជ័យក្នុងវិស័យនេះ អ្នកជំនាញអចលនទ្រព្យបានបង្ហាញបទពិសោធន៍ និងលក្ខណសម្បត្តិដែលត្រូវមានដូចខាងក្រោម ៖
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ថ្លែងថា លក្ខណសម្បត្តិដើម្បីក្លាយជាភ្នាក់ងារអចលនទ្រព្យដ៏ជោគជ័យម្នាក់ មានកត្តារួមផ្សំជាច្រើនដូចជា ៖
១-មានភាពស្មោះត្រង់ចំពោះខ្លួនឯង អតិថិជន ដៃគូអាជីវកម្ម និងសង្គមជាតិ ។
២-មានចំណេះដឹងជ្រៅជ្រះទាក់ទងនឹងតម្លៃអចលនទ្រព្យទៅតាមតំបន់ និងប្រភេទនីមួយៗ ព្រមទាំងចំណេះដឹងផ្នែកភាសាបរទេស សេដ្ឋកិច្ច ច្បាប់ សង្គម និងនយោបាយ ។
៣-ស្គាល់អតិថិជនដែលមានតម្រូវការចង់លក់ ជួល និងទិញអចលនទ្រព្យដោយផ្ទាល់ ជាពិសេស មានទំនាក់ទំនងយ៉ាងទូលំទូលាយក្នុងសង្គម ពិសេសវណ្ណៈកណ្កាល និងវណ្ណៈខ្ពស់ ដោយត្រូវស្គាល់ឲ្យបានច្បាស់ថា Who is Who ។
៤-ត្រូវតែស្រឡាញ់ និងចូលចិត្តអាជីពផ្នែកដីធ្លី ព្រោះវាមិនមែនជាការងារទេ តែជាអាជីពដែលត្រូវការពេលវេលា និងភាពអត់ធ្មត់ខ្លាំងណាស់ ប្រៀបដូចជាការដាំដើមត្នោត ។
៥-មានទេពកោសល្យ និងឧបនិស្ស័យនឹងការងារដីធ្លីថា តើព្រហ្មលិខិតព្រមអនុញ្ញាតឲ្យលោកអ្នកក្លាយជាអ្នកមានដោយសារដីធ្លីដែរឬទេ ។
អ្នកនាង ហ្គ្រេស រចនាហ្វុង នាយិកាផ្នែកបណ្តុះបណ្តាលនៃក្រុមហ៊ុន Century21 Cambodia បាននិយាយស្រដៀងគ្នាថា ដើម្បីក្លាយជាភ្នាក់ងារអចលនវត្ថុជោគជ័យ គឺត្រូវរកគុណតម្លៃឲ្យខ្លួនឯង ដែលគុណតម្លៃនោះ គឺចំណេះដឹង ជំនាញ និងមានភាពស្មោះត្រង់ ដើម្បីអាចកសាងកេរ្តិ៍ឈ្មោះ និងទំនុកចិត្តដល់អតិថិជន ព្រោះនៅពេលយើងកសាងបាននូវកេរ្តិ៍ឈ្មោះ អតិថិជននឹងរត់មករកយើងដោយខ្លួនឯង ។
អ្នកនាងនិយាយថា ៖ « ការកសាងកេរ្តិ៍ឈ្មោះ មិនមែនជាការងាយស្រួលឡើយ ប៉ុន្តែប្រសិនជាយើងមានគំនិតអវិជ្ជមាន យើងនឹងមិនអាចធ្វើបានទេ ។ ផ្ទុយទៅវិញ ប្រសិនជាយើងមានគំនិតវិជ្ជមាន និងជឿថា ខ្លួនឯងអាចធ្វើបាន យើងនឹងធ្វើបាន » ។ អ្នកនាងបន្តថា ៖ « បច្ចុប្បន្ន Century21 Cambodia កំពុងបណ្តុះបណ្តាលអ្នកជំនាញអាជីពនៅក្នុងវិស័យនេះ ដើម្បីឲ្យមានការទទួលស្គាល់ពីរាជរដ្ឋាភិបាល និងសង្គមជាតិ ដូចអាជីពដទៃទៀតដែរ » ។
លោក គុយ វ៉ាត អគ្គនាយកក្រុមហ៊ុនVTRUST GROUP ថ្លែងថា ធនធានមនុស្សពិតជាមានសារសំខាន់ណាស់ ដើម្បីធ្វើឲ្យវិស័យនេះមានការរីកចម្រើន និងទទួលបានទំនុកចិត្តពីវិនិយោគិន ព្រោះការវិនិយោគក្នុងវិស័យនេះ ជាការវិនិយោគរយៈពេលវែង ។ ហេតុនេះ ការធ្វើការងារប្រកបដោយវិជ្ជាជីវៈ ជាគុណតម្លៃមួយមិនអាចខ្វះបានសម្រាប់អ្នកពាក់ព័ន្ធក្នុងវិស័យនេះ ។
លោកបន្តថា ដោយមើលឃើញភាពចាំបាច់នេះហើយ ទើបក្រុមហ៊ុន Century21 Cambodia បានសហការជាមួយក្រសួងសេដ្ឋកិច្ច និងហិរញ្ញវត្ថុ បណ្តុះបណ្តាលលក្ខណៈអាជីព និងស្របតាមស្តង់ដាអន្តរជាតិ ដើម្បីឲ្យអ្នកធ្វើការក្នុងវិស័យនេះកាន់តែមានចំណេះដឹង ក៏ដូចជាជំនាញច្បាស់លាស់ផងដែរ ៕
ចែករំលែកព័តមាននេះ