ខេត្តបន្ទាយមានជ័យ ៖ មន្ត្រីគយចល័តប៉ោយប៉ែតចុះត្រួតពិនិត្យទំនិញតាមស្តង់អាជីវករលក់ដូរ ដើម្បីរឹតបន្តឹងខ្លាចក្រែងទំនិញនាំចូលគ្មានការបង់ពន្ធជូនរដ្ឋឲ្យបានត្រឹមត្រូវ។
ខេត្តបន្ទាយមានជ័យ ៖ មន្ត្រីគយចល័តប៉ោយប៉ែតចុះត្រួតពិនិត្យទំនិញតាមស្តង់អាជីវករលក់ដូរ ដើម្បីរឹតបន្តឹងខ្លាចក្រែងទំនិញនាំចូលគ្មានការបង់ពន្ធជូនរដ្ឋឲ្យបានត្រឹមត្រូវ។ ប្រតិបត្តិការណ៍របស់មន្ត្រីជំនាញគយ និងរដ្ឋាករច្រកប៉ោយប៉ែតនេះបានធ្វើឡើងនៅព្រឹកថ្ងៃទី១៦ មិថុនា ២០១៧ នៅតាមស្តង់មួយចំនួនក្នុងទីប្រជុំជនក្រុងប៉ោយប៉ែត មាននៅតាមដងផ្លូវជាតិលេខ៥ ត្រង់ចំណុចផ្សាររ៉ាចាស់ និងនៅម្តុំផ្សារអគ្គថ្មីប៉ោយប៉ែតផងដែរ។ មន្ត្រីជំនាញគយចល័ត បានបង្ហើបឲ្យដឹងថា ការចុះអនុវត្តន៍ ការត្រួតពិនិត្យទំនិញតាមស្តង់លក់ដូររបស់អាជីវករ ខណៈនេះសង្ស័យមានទំនិញនាំចូលពីប្រទេសជិតខាង ដោយមិនមានការបង់ពន្ធជូនរដ្ឋឲ្យបានត្រឹមត្រូវទៅតាមច្បាប់ ដូច្នេះហើយទើបក្រុមមន្ត្រីជំនាញរបស់លោកទទួលបញ្ជាបទបញ្ជាពីថ្នាក់លើ ដើម្បីចុះមកត្រួតពិនិត្យមើលតែម្តង។
គួរកត់សម្គាល់ថា ការចុះត្រួតពិនិត្យទំនិញតាមស្តង់លក់ដូរជាច្រើនកន្លែងរបស់ក្រុមមន្ត្រីជំនាញគយចល័តប៉ោយប៉ែត តាំងពីព្រឹករហូតមកដល់ម៉ោង១រសៀលថ្ងៃដដែលនេះដែរ គេមិនទាន់ឃើញមន្ត្រីជំនាញទាំងនោះដកកម្លាំងចេញនៅឡើយទេ ដោយក្រុមមន្ត្រីជំនាញកំពុងតែបន្តត្រួតពិនិត្យនៅឡើយ ហើយក៏សង្កេតឃើញម្ចាស់ទំនិញជាអាជីវករទាំងនោះធ្វើទឹកមុខស្លេកស្លាំង ដោយសារតែខ្លាចមន្ត្រីជំនាញចាប់រឹបអូសយកទំនិញរបស់ពួកគេ ដែលដាក់តាំងលក់នោះមួយចំនួនជាទំនិញនាំចូលមកពីប្រទេសថៃ ដោយពុំបានបង់ពន្ធត្រឹមត្រូវតាមច្បាប់មួយរយភាគរយ។តាមប្រភពពីមន្ត្រីជំនាញបានបង្ហើបឲ្យដឹងថា ការចុះត្រួតពិនិត្យតាមស្តង់លក់ដូរ របស់អាជីវករ ជាច្រើនកន្លែងនៅក្នុងតំបន់ជាយដែនប៉ោយប៉ែតនេះ បានសង្កេតឃើញថា មានមុខទំនិញប្រមាណ៦០% មិនមានការបង់ពន្ធជូនឲ្យបានត្រឹមត្រូវទៅតាមផ្លូវច្បាប់នោះឡើយ។ ហើយទំនិញខុសច្បាប់ទាំងនោះ មន្ត្រីជំនាញបានបញ្ជាក់ថា ត្រូវផាកពិន័យឲ្យម្ចាស់បង់ពន្ធជូនរដ្ឋឲ្យបានត្រឹមត្រូវទៅតាមផ្លូវច្បាប់ផងដែរ។
តាមប្រភពពីក្រុមអាជីវករ ក៏ដូចជាពលរដ្ឋរស់នៅជាយដែនខ្មែរ-សៀម ប៉ោយប៉ែតបានរិះគន់ថា ហេតុអ្វីក៏មន្ត្រីជំនាញគយចល័ត ប៉ោយប៉ែត ចាំបាច់ចុះមកត្រួតពិនិត្យ ទំនិញរបស់អាជីវករដាក់តាំងលក់តាមស្តង់ធ្វើអី ប្រសិនបើនៅពេលដែលពួកគាត់បានដឹកទំនិញតាមរទេះអូសចូលមកពីប្រទេសថៃ តាមច្រកទ្វារអន្តរជាតិប៉ោយប៉ែតមក ក៏មានក្រុមមន្ត្រីគយនៅទីលានត្រួតពិនិត្យទំនិញឲ្យពួកគាត់ចូលទៅប្រកាសបង់ពន្ធ ជូនរដ្ឋឲ្យបានត្រឹមត្រូវរួចរាល់ហើយនោះ។ តើហេតុអ្វីនៅមានសេសសល់ទំនិញអត់ពន្ធបែបនេះតទៅទៀត ដូចមានការងឿងឆ្ងល់ចំពោះបញ្ហានេះខ្លាំងណាស់៕
ចែករំលែកព័តមាននេះ