រាជធានីភ្នំពេញ ៖ តារាកំប្លែងនាងប្រិមប្រិយនឹងភ្ជាប់ពាក្យជាមួយបុរសអាណិកជនខ្មែរវ័យក្មេងហើយជាអ្នកសិល្បៈដូចគ្នា ។ ដំណឹងនេះបែកធ្លាយចេញពីអ្នកសិល្បៈដូចគ្នា ។
ពិធីភ្ជាប់ពាក្យរបស់នាងប្រិមប្រិយនៅថ្ងៃទី១៦ មិថុនា ឆ្នាំ២០១៧នេះ ។ ភាគីខាងប្រុសគឺជាតារាចម្រៀង ដោយធ្លាប់ចូលរួមប្រឡងក្នុងកម្មវិធីប្រឡង«ចម្រៀងជាសាកល»នៅទូរទស្សន៍បាយ័នជាប់ចំណាត់ថ្នាក់ល្អ ។
ពន្លកស្នេហ៍ចាប់ផ្តើមតាំងពីនាងប្រិមប្រិយទៅសម្តែងនៅអាមេរិកកាលពីឆ្នាំមុន ហើយខាងប្រុសជាអ្នកតាមមើលថែនាង ។ នៅពេលយល់ចិត្តថ្លើមគ្នាហើយនោះ ខាងប្រុសបានមកនៅស្រុកខ្មែរជិតមួយឆ្នាំហើយដើម្បីបាននៅជិតប្រិមប្រិយ ហើយតែងតែទៅណាមកណាជាមួយគ្នាជាញឹកញាប់ ។
ព័ត៌មាននៃពិធីភ្ជាប់ពាក្យត្រូវប្រិមប្រិយប្រកែកដោយថា«គេចេះតែថា ! ចាំខ្ញុំភ្ជាប់ពាក្យហើយនឹងបង្ហោះរូបឱ្យគេមើលជាទូទៅតែម្តង» ។
មានការលើកឡើងថា ប្រិមប្រិយមិនហ៊ានទម្លាយការណ៍ពិតអាចខ្លាចប៉ះពាល់ដល់ការងារសិល្បៈដែលកំពុងតែស្ទុះឡើង។ អ្នកសិល្បៈជាច្រើនសុទ្ធតែនិយាយថា ប្រិមប្រិយភ្ជាប់ពាក្យមែន ។ ម្នាក់បាននិយាយថា «កុំជឿប្រិមប្រិយគឺនាងភ្ជាប់ពាក្យមែនតើ ! គេកំពុងមានក្តីសុខទាំងពីរនាក់ ហើយលាក់រឿងនេះទំនងចង់ឱ្យមានការភ្ញាក់ផ្អើល ចង់ឱ្យឃើញនៅថ្ងៃសំខាន់នោះតែម្តងល្អជាងសារភាពជាមុន» ។
នាងប្រិមប្រិយជាស្ត្រីមេម៉ាយច្រើនឆ្នាំមកហើយ ។ កន្លងមកលេចឮថានាងភ្ជាប់ចំណងស្នេហ៍ជាមួយថៅកែភោជនីយដ្ឋានមួយ តែបានបែកបាក់គ្នាទៅហើយ ៕
ចែករំលែកព័តមាននេះ