ខេត្តពោធិ៍សាត់ ៖ ក្មេងទំនើង០៦នាក់ ត្រូវបានកម្លាំងនគរបាលប៉ុស្ដិ៍រដ្ឋបាលរំលេច ស្រុកបាកាន ឃាត់ខ្លួនបានកាលពីវេលាម៉ោង១២និង២០នាទីថ្ងៃត្រង់ ថ្ងៃទី១៥ ខែមិថុនា ឆ្នាំ២០១៧ បន្ទាប់ពីពួកគេបានធ្វើសកម្មភាពឈ្លោះគ្នា និងកាប់បំផ្លាញម៉ូតូមួយគ្រឿងរបស់យុវជនម្នាក់ នៅខាងមុខវិទ្យាល័យពោធិ៍សាត់ ដែលជាសិស្សសាលាដូចគ្នា ។
លោកវរសេនីយ៍ទោ នាង វុធ អធិការនគរបាលស្រុកបាកានឲ្យដឹងថា ក្មេងទំនើងទាំង០៦នាក់ ដែលឃាត់ខ្លួននេះ ១.ឈ្មោះ គឹម សាវង្ស ភេទប្រុស អាយុ១៦ឆ្នាំ ២.ឈ្មោះ សេង ចាន់ថន ភេទប្រុស អាយុ១៦ឆ្នាំ ៣.ឈ្មោះ ផាន់ សៅរឿន ភេទប្រុស អាយុ១៨ឆ្នាំ ៤.ឈ្មោះ ណារិន គឹមឡុងភេទប្រុស អាយុ១៨ឆ្នាំ ៥.ឈ្មោះ សំណាន សុផានុ ភេទប្រុស អាយុ១៦ឆ្នាំ និង៦.ឈ្មោះ នី ចំរើនភេទប្រុស អាយុ១៦ឆ្នាំ ទាំង០៦នាក់នេះ ជាសិស្សរៀននៅវិទ្យាល័យសម្ដេចឪសម្ដេចម៉ែ ស្រុកភ្នំក្រវាញ ។ ក្នុងការឃាត់ខ្លួននេះសមត្ថកិច្ចបានដកហូតវត្ថុតាងមានដាវចំនួន០៥ កាំបិតផ្គាក់០១ ដំបងដែក០១ និងម៉ូតូចំនួន០៣គ្រឿង ។ ទាក់ទិនទៅនឹងការឃាត់ខ្លួនក្មេងទំនើងទាំង០៦នាក់នេះ លោកអធិការឲ្យដឹងថា កាលពីវេលាម៉ោង០៩ព្រឹក ថ្ងៃទី១៥ ខែមិថុនា ឆ្នាំ២០១៧ មានក្មេងទំនើងជាសិស្សសាលាពីរក្រុម មានគ្នាប្រហែល២០នាក់ប្រដាប់ដោយដាវ កាំបិត និងដំបងជាអាវុធ បានដេញកាប់ចាក់គ្នាផ្អើលពេញផ្លូវនៅខាងមុខវិទ្យាល័យពោធិ៍សាត់ ព្រមទាំងបានកាប់បំផ្លាញម៉ូតូមួយគ្រឿងម៉ាក Zoomer X ពាក់ស្លាកលេខ ពោធិ៍សាត់ ១GB-០៧៧០ របស់យុវជនម្នាក់ រួចហើយនាំគ្នារត់គេចបាត់អស់ទៅ ។ ភ្លាមៗនោះដោយមានចំណាត់ការពីលោកឧត្តមសេនីយ៍ទោ សារុន ចាន់ធី ស្នងការនគរបាលខេត្តឲ្យកម្លាំងទាំងអធិការដ្ឋាន និងប៉ុស្ដិ៍រដ្ឋបាលសហការណ៍គ្នាតាមប្រមាញ់ក្រុមក្មេងទំនើងទាំងនេះ ទើបវេលាម៉ោង១២និង២០នាទីថ្ងៃត្រង់ កម្លាំងនគរបាលប៉ុស្តិ៍រដ្ឋបាលរំលេច ស្ទាក់ចាប់បានចំនួន០៦នាក់នៅចំណុចទំនប់ធារាសាស្ត្រអន្លង់ស្វាយ ស្ថិតក្នុងភូមិព្នៅ ឃុំរំលេច ស្រុកបាកាន ខេត្តពោធិ៍សាត់ ។
បច្ចុប្បន្នក្រុមក្មេងទំនើងទាំង០៦នាក់ខាងលើរួមជាមួយវត្ថុតាង ត្រូវបាននគរបាលស្រុកបាកាន កសាងសំណុំរឿងបញ្ជូនទៅស្នងការដ្ឋាននគរបាលខេត្តពោធិ៍សាត់ ដើម្បីសួរនាំ និងចាត់ការបន្តតាមនីតិវិធី ។ ប្រជាពលរដ្ឋសំណូមពរដល់អាជ្ញាធរមានសមត្ថកិច្ច មេត្តាចាត់វិធានការឲ្យបានខ្លាំងបំផុតចំពោះអ្នកជួញដូរគ្រឿងញៀន សិស្សទៅរៀនមានលាក់ដាវ កាំបិត និងដំបងក្នុងកាបូប ឬក្នុងកែបម៉ូតូជាដើម ៕
ចែករំលែកព័តមាននេះ