ខេត្តស្វាយរៀង ៖ អ្នកបើកបររថយន្តកុងតឺន័រ ងងុយដេកងោកបាត់បង់ម្ចាស់ការរេចង្កូតបុករះប៉ាន់ណូស្លាកចរាចរណ៍ និងជ្រុលទៅបុកដើមអាកាស្យា ដួលរាបដល់ដីអស់បួនដើមក្រឡាប់ចូលក្នុងទឹកព្រែកទន្លេវ៉ៃគោ បណ្តាលឲ្យអ្នកបើកបររងរបួស និងឈ្លក់ទឹក សំណាងល្អវាយបំបែកកញ្ចក់រថយន្តបាន ហើយរថយន្តលេចចូលក្នុងទឹក ប្រវ៉េប្រវ៉ាមុចហែលចេញរួចពីក្នុងកាប៊ីនរថយន្ត រួចផុតពីសេចក្ដីមិនស្លាប់ ។
ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង០១និង០០រំលងអធ្រាត ឈានចូលថ្ងៃទី១៦ ខែមិថុនា ឆ្នាំ២០១៧ នៅលើកំណាត់ផ្លូវជាតិលេខ១ នៅចំណុចខាងកើតស្ពានហាយវ៉េ ១០០ម៉ែត្រ ស្ថិតនៅភូមិបាក់រនាស់ សង្កាត់សង្ឃ័រ ក្រុងស្វាយរៀង ។ បើតាមសមត្ថកិច្ចនគរបាលបានឲ្យដឹងថា រថយន្តក្រឡាប់ចូលទឹកព្រែកទន្លេវ៉ៃគោ ម៉ាកហ៊ីយិនដាយ សណ្តោងរ៉ឺម៉ក ពាក់ស្លាកលេខ ព្រះសីហនុ ៤A-០៨៤៦ ផ្ទុកទំនិញពេញកុងតឺន័រ បើកបរពីខាងកើតទៅលិច មកពីផែស្ងួតក្រុងបាវិត ឆ្ពោះទៅរាជធានីភ្នំពេញ លុះមកដល់ចំណុចកើតហេតុខាងលើ ស្រាប់តែរេចង្កូតមកឆ្វេង បុករះប៉ាន់ណូស្លាកចរាចរណ៍ និងបុកដើមអាកាស្យារ ដួលរាបដល់ដីអស់៤ដើម ទៅមុខលែងរួច ហើយក្រឡាប់ផ្ងារជើងចូលក្នុងទឹកព្រែកទន្លេវ៉ៃគោតែម្តង ។ ខណៈនោះ រថយន្តលិចចូលក្នុងទឹកបន្តិចម្តងៗ អ្នកបើកបរក៏បានវាយបំបែកកញ្ចក់រួចមុជទឹកហែលចេញរួច ត្រូវប្រជាពលរដ្ឋដឹកតាមម៉ូតូទៅមន្ទីរពេទ្យខេត្តដើម្បីសង្គ្រោះ ។ ក៏ប៉ុន្តែអ្វីគួរហួសចិត្តនោះ គឺក្រុមគ្រូពេទ្យបានឲ្យដឹងថា ជនរងគ្រោះនៅក្នុងមន្ទីរពេទ្យបានបន្តិច ស្រាប់តែរត់ចេញហើយហៅរថយន្តតាក់ស៊ីត្រឡប់ទៅក្រុងបាវិតវិញបាត់ មិនទាន់បានសួរឈ្មោះផង ។
លុះដល់ព្រឹកឡើងសមត្ថកិច្ចនគរបាលចរាចរណ៍ខេត្ត ហៅរថយន្តមកស្ទូចយកទៅរក្សាទុករងចាំដោះស្រាយនៅពេលក្រោយ មូលហេតុងងុយដេក ៕
ចែករំលែកព័តមាននេះ