ខេត្តមណ្ឌលគិរី ៖ បុរសម្នាក់ត្រូវបានសមត្ថកិច្ចឃាត់ខ្លួន ខណៈកំពុងធ្វើសកម្មភាពដឹកជញ្ជូនឈើខុសច្បាប់ នៅវេលាម៉ោង០៩និង០៥នាទីព្រឹក ថ្ងៃទី១៥ ខែមិថុនា ឆ្នាំ២០១៧ នៅចំណុចផ្លូវបំបែកស្រែហ៊ុយ ស្ថិតក្នុងភូមិ ស្រែហ៊ុយ ឃុំស្រែហ៊ុយ ស្រុកកោះញែក ។
សមត្ថកិច្ចបានឲ្យដឹងថា រថយន្តដែលត្រូវឃាត់ម៉ាក កាមរីហើម ពណ៌ស្ករ ចង្កូតឆ្វេង ពាក់ស្លាកលេខ ភ្នំពេញ ២D-១២៥៨ មានផ្ទុកឈើប្រណិតប្រភេទធ្នង់ (កូនក្រទ្បឹង) ចំនួន១៤៥ដុំ ។ ម្ចាស់ឈ្មោះ ធន់ ជា ភេទប្រុស អាយុ៣៦ឆ្នាំ ទីលំនៅបច្ចុប្បន្ន ស្រុកកោះញែក ខេត្តមណ្ឌលគិរី ។ បច្ចុប្បន្នវត្ថុតាងទាំងអស់ និងមនុស្ស បានយកទៅផ្នែករដ្ឋបាលព្រៃឈើកោះញែក ដើម្បីចាត់ការតាមនីតិវិធី ។ សេចក្តីរាយការណ៏ដាច់ដោយឡែកមួយទៀត បានឲ្យដឹងថា ទីតាំងស្តុបឈើខុសច្បាប់មួយកន្លែង នៅភូមិពូត្រុំ សង្កាត់មនោរម្យ ក្រុងសែនមនោរម្យ ត្រូវបានកម្លាំងអាវុធហត្ថលើផ្ទៃប្រទេស ចុះឡោមព័ទ្ឋ កាលពីព្រឹកថ្ងៃទី១៥ ខែមិថុនា ឆ្នាំ២០១៧ ដោយរឹបអូសបានឈើប្រណិតជាច្រើនប្រភេទ ប្រមាណជិត១០ម៉ែត្រគូប ។
សមត្ថកិច្ចថា ក្រោយការចាប់បង្ក្រាបទីតាំងស្តុបឈើខាងលើ គេនៅមិនទាន់ដឹងថា ឈើទាំងនោះជាកម្មសិទ្ធអ្នកណាឡើយ ព្រោះទីតាំងលាក់ឈើ ស្ថិតនៅក្នុងចម្ការរបស់ប្រជាពលរដ្ឋ ។ ហើយនៅពេលនេះ កម្លាំងជំនាញកំពុងធ្វើការដឹកជញ្ជូនឈើខុសច្បាប់ ទៅរក្សាទុកនៅមន្ទីរបរិស្ថានខេត្ត ដើម្បីធ្វើការវាស់វែង នឹងចាត់ការតាមនីតិវិធីច្បាប់ ៕
ចែករំលែកព័តមាននេះ