រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្តល់អនុសាសន៍មួយចំនួនក្នុងពិធីបិទសន្និបាតបូកសរុបវាយតម្លៃការងារអប់រំ យុវជន និងកីឡា ឆ្នាំសិក្សា២០០៩-២០១០ និងលើកទិសដៅការងារឆ្នាំសិក្សាថ្មី២០១០-២០១១ កាលពីថ្ងៃទី២៤ មីនា នៅវិទ្យាស្ថានជាតិអប់រំក្នុងគោលដៅបន្តពង្រឹង និងពង្រីកគុណភាពប្រសិទ្ធភាពក្នុងវិស័យអប់រំ។
សម្តេចលើកអនុសាសន៍ថា ១-បន្តគោលនយោបាយធានាលទ្ធភាពទទួលបានសេវាអប់រំដោយសមធម៌ឱ្យបានកាន់តែទូលំទូលាយ ក្នុងនោះត្រូវពង្រឹងកម្មវិធីអប់រំកុមារតូចៗ ជាពិសេសសម្រាប់កុមារអាយុ៥ឆ្នាំ ដោយផ្តោតការយកចិត្ត ទុកដាក់ទៅលើឃុំ-សង្កាត់ ដែលមានអត្រាចូលរៀនមានកម្រិតទាប និងមានអត្រាត្រួតថ្នាក់ខ្ពស់នៅតាមសាលារៀនបឋមសិក្សា ។ ទន្ទឹមនឹងនេះត្រូវបំផុស និងជំរុញក្រុមប្រឹក្សាឃុំ-សង្កាត់ និងគណៈកម្មការទ្រទ្រង់សាលារៀនឱ្យជួយប្រជាជនក្នុងមូលដ្ឋានរបស់ខ្លួនឱ្យយល់ដឹងអំពីសារសំខាន់ និងតម្លៃនៃការសិក្សាអប់រំ តាមរយៈការអនុវត្តកម្មវិធីលើកទឹកចិត្ត កម្មវិធីផ្តល់អាហារូបករណ៍ សម្រាប់សិស្សពូកែ សិស្សមានការលំបាក ជាពិសេសសិស្សនារី និងត្រូវពង្រីកលទ្ធភាពចូលរួមរបស់វិស័យឯកជន និងសហគមន៍នៅគ្រប់កម្រិតសិក្សាតាមរយៈកិច្ចសហការល្អជាមួយក្រុមប្រឹក្សាឃុំ-សង្កាត់ និងសហគមន៍ជាតិ និងអន្តរជាតិ ដើម្បីអភិវឌ្ឍន៍វិស័យអប់រំតាមគោលការណ៍ «សាលារៀនផ្សារភ្ជាប់នឹងគ្រួសារ ផ្សារភ្ជាប់នឹងសង្គម» ។
ទី២-បន្តការកសាងសាលារៀនដើម្បីឆ្លើយតបទៅនឹងចំនួនសិស្សដែលកើនឡើងកាន់តែច្រើនពីមួយឆ្នាំទៅមួយឆ្នាំ ។ ត្រូវយកចិត្តទុកដាក់ សាងសង់សាលារៀនឱ្យកាន់តែនៅជិតលំនៅឋានរបស់ប្រជាជនសម្រាប់ជាការរួមចំណែកមួយក្នុងការកាត់បន្ថយចំណាយផ្សេងៗរបស់សិស្ស និងគ្រួសារ ហើយក៏រួមចំណែកដល់គោលដៅនៃសមធម៌ ក្នុងការអប់រំផងដែរ ។ ត្រូវបន្តពង្រឹងការអប់រំក្រៅប្រព័ន្ធឱ្យដើរទន្ទឹមគ្នានឹងការអប់រំក្នុងប្រព័ន្ធ ប្រមែប្រមូលសិស្សដែលបោះបង់ការសិក្សា និងពលរដ្ឋដែលបានបាត់បង់ឱកាសសិក្សាឱ្យបានចូលរៀនគ្រប់ៗគ្នាក្នុងថ្នាក់អក្ខរកម្ម ។ មិនត្រឹមតែអាចពង្រឹងការអប់រំក្រៅប្រព័ន្ធប៉ុណ្ណោះទេ ប៉ុន្តែថែមទាំងអាចដោះស្រាយបាននូវបញ្ហាកុមារ និងយុវជននៅក្រៅសាលារៀន ដែលអាចនឹងធ្លាក់ខ្លួនទៅសេពគ្រឿងញៀន ទៅប្រព្រឹត្តអំពើពាលាផ្សេងៗ និងជាកូនទំនើងទៀតផង ។
ទី៣-បន្តអនុវត្តគោលនយោបាយកែលំអគុណភាព និងប្រសិទ្ធភាពអប់រំដែលត្រូវមានការរៀបចំក្របខណ្ឌអភិបាលកិច្ចល្អ និងរៀបចំស្ថាប័នឱ្យមានប្រសិទ្ធភាព មានការទទួលខុសត្រូវខ្ពស់ទាំងថ្នាក់កណ្តាល រាជធានី ខេត្ត ក្រុង ស្រុក ខណ្ឌ និងថ្នាក់សាលារៀន ។ ក្នុងការអនុវត្តជាក់ស្តែងត្រូវយកចិត្តទុកដាក់ការធានាសន្តិសុខ និងសុវត្ថិភាពល្អក្នុងសាលារៀន និងគ្រឹះស្ថានសិក្សា ដើម្បីធានាសកម្មភាពបង្រៀន និងឱ្យបានកាន់តែល្អប្រកបដោយគុណភាព និងប្រសិទ្ធភាពខ្ពស់ ។ ក្រសួងអប់រំយុវជន និងកីឡា ត្រូវពិនិត្យឱ្យបានហ្មត់ចត់អំពីបញ្ហាសុវត្ថិភាព សន្តិសុខ នៅគ្រប់គ្រឹះស្ថានសិក្សាទាំងរដ្ឋ និងឯកជន ជាពិសេសគ្រឹះស្ថានមត្តេយ្យសិក្សា និងបឋមសិក្សាដែលផ្តោតសំខាន់ទៅលើកុមារ ។
ទី៤-បន្តគោលនយោបាយកសាងសមត្ថភាព និងអភិវឌ្ឍន៍ស្ថាប័នសម្រាប់ធ្វើវិមជ្ឈការក្នុងនោះត្រូវបង្កើតលទ្ធភាព និងមធ្យោបាយបំពេញការងារទាំងផ្នែកធនធានសំភារ ធនធានថវិកា និងធនធានមនុស្ស។ ការពង្រឹងប្រព័ន្ធត្រួតពិនិត្យ អធិការកិច្ច ការវាយតម្លៃលើការអប់រំ ការងារគ្រប់គ្រងបុគ្គលិក ការងារប្រើប្រាស់ហិរញ្ញវត្ថុ ការងារប្រើប្រាស់មន្ត្រីជំនាញឱ្យចំទិស និងការពង្រាយមន្ត្រីទាំងនោះឱ្យបានដល់មូលដ្ឋាន ដើម្បីធានាសេវាអប់រំឱ្យកាន់តែមានប្រសិទ្ធភាព ។
ទី៥-បន្តអនុវត្តឱ្យមានប្រសិទ្ធភាពខ្ពស់ក្នុងការប្រើប្រាស់ហិរញ្ញប្បទានសហប្រតិបត្តិការដោយត្រូវបញ្ជាក់អំពីការចាំបាច់ក្នុងការកំណត់ចង្កោមការងារអាទិភាព ឱ្យសមល្មម និងឱ្យសម្រេចបានដោយផ្អែកលើបណ្តាអាទិភាពដែលមានក្នុងផែនការយុទ្ធសាស្ត្រ វិស័យអប់រំ ២០០៩-២០១៣ ។ ជាពិសេសត្រូវសម្រេចកិច្ចប្រឹងប្រែងទាំងអស់នេះ ទៅក្នុងដំណើរការកំណែទំរង់អប់រំនៅគ្រប់លំដាប់ថ្នាក់ ។
សម្តេចតេជោនាយករដ្ឋមន្ត្រីមានប្រសាសន៍ថា អនុសាសន៍ទាំង៥ចំណុចដែលខ្ញុំបានលើកឡើងខាងលើនេះ មានអត្ថន័យនិងខ្លឹមសារទៅតាមសកម្មភាពអាទិភាពនីមួយៗនៃវិស័យអប់រំ។ ដូច្នេះសូមអង្គសន្និបាតយកអនុសាសន៍ទាំងនេះទៅពិចារណាដើម្បី រំលេចឱ្យឃើញកាន់តែច្បាស់ពី ការងារជាក់ស្តែងសម្រាប់អនុវត្តទិសដៅភារកិច្ចឆ្នាំសិក្សាថ្មីនេះផង និងសម្រាប់អនុវត្តទៅមុខទៀតនៅបណ្តាឆ្នាំខាងមុខផង ព្រោះការអប់រំ គឺជាការងារយូរអង្វែងដែលត្រូវធ្វើជាប្រចាំបន្តបន្ទាប់ពីមួយឆ្នាំ ទៅមួយឆ្នាំ និងពីជំនាន់មួយទៅជំនាន់មួយ ។
លោកអឹុម សិទ្ធី រដ្ឋមន្ត្រីក្រសួងអប់រំ យុវជន និងកីឡា បានថ្លែងថា សន្និបាតរយៈពេល៣ថ្ងៃ គឺផ្តោតសំខាន់ទៅលើ៤ចំណុច ៖
១-ការពិនិត្យឡើងវិញពីវឌ្ឍនភាពនៃការអនុវត្តគោលនយោបាយអប់រំក្នុងឆ្នាំសិក្សា២០០៩-២០១០ ប្រៀបធៀបទៅនឹងលទ្ធផលរំពឹងទុកប្រចាំឆ្នាំដែលមានចែងក្នុងផែនការយុទ្ធសាស្ត្រវិស័យអប់រំ ។
២-ការពិនិត្យឡើងវិញពីប្រសិទ្ធភាពនៃការប្រើប្រាស់ហិរញ្ញវត្ថុរបស់គម្រោងទាំងអស់ក្នុងសកម្មភាពនៃផែនការយុទ្ធសាស្ត្រវិស័យអប់រំ ។
៣-ការពិនិត្យឡើងវិញពីការប្រែប្រួលរីកចម្រើនថ្មី ក្នុងការអភិវឌ្ឍសមត្ថភាពដើម្បីគុណភាពអប់រំលើគ្រប់ផ្នែក និងគ្រប់ភូមិសិក្សាផ្សារភ្ជាប់ទៅនឹងផលប៉ះពាល់ជាពិសេសបញ្ហាទាំងឡាយដែលត្រូវប្រឈមដោះស្រាយ ។
៤-ការដាក់ចេញនូវអនុសាសន៍ថ្មី និងវិធានការថ្មីជាយុទ្ធសាស្ត្រសម្រាប់អនុវត្តបន្តទៅមុខទៀតនៅឆ្នាំសិក្សា២០១០-២០១១ និងនៅតាមបណ្តាឆ្នាំខាងមុខ ។
លោករដ្ឋមន្ត្រីថ្លែងបន្តថា អង្គសន្និបាតនឹងលើកយកប្រធានបទចំនួន៩មកពិភាក្សា ដើម្បីរិះរកចំណុចខ្លាំង និងចំណុចខ្វះចន្លោះដែលបានអនុវត្តឆ្នាំកន្លងមកសម្រាប់កំណត់ទិសដៅឆ្នាំសិក្សា២០១០-២០១១ រួមមាន ៖
១-ការចូលរៀន និងអត្រាបញ្ចប់ការសិក្សាដើម្បីសម្រេចការអប់រំសម្រាប់ទាំងអស់គ្នា ។
២-តម្រូវការផ្គត់ផ្គង់ និងការងារគ្រប់គ្រងបុគ្គលិក ។
៣-ពង្រឹងការអនុវត្តសកម្មភាពមជ្ឈមណ្ឌលសិក្សា សហគមន៍ ។
៤-ការអភិវឌ្ឍកម្មវិធីសិក្សានៅឧត្តមសិក្សា និងទីផ្សារការងារ ។
៥-ការពង្រឹងគុណភាព និងប្រសិទ្ធភាពការងារយុវជន ។
៦-ការពង្រឹងគុណភាព និងប្រសិទ្ធភាពរបស់សកម្មភាពអប់រំកាយ និងកីឡា ។
៧-តម្រូវការ និងការផ្គត់ផ្គង់សៀវភៅសិក្សាគោលការណ៍អនុវត្តកម្មវិធីសិក្សាថ្មី ។
៨-ការអភិវឌ្ឍសមត្ថភាពស្ថាប័ន និងមន្ត្រីអប់រំ ។
និង៩-កម្មវិធីកំណែទំរង់ការគ្រប់គ្រងហិរញ្ញវុត្ថសាធារណៈក្នុងវិស័យអប់រំ ។
ទន្ទឹមនឹងនេះអង្គសន្និបាតនឹងឃើញបទបង្ហាញអំពីការអភិវឌ្ឍការងារអប់រំដែលអង្គភាពប្រតិបត្តិការបានរួមចំណែកក្នុងការអនុវត្តផែនការយុទ្ធសាស្ត្រអប់រំ ២០០៩-២០១៣ ។ តាមទិសដៅយុទ្ធសាស្ត្រអភិវឌ្ឍជាតិ បច្ចុប្បន្នកម្មវិធី ២០០៩-២០១៣ ស្របតាមគោលដៅអភិវឌ្ឍន៍សហស្សវត្សកម្ពុជា និងផែនការជាតិអប់រំសម្រាប់ទាំងអស់គ្នាឱ្យឆ្លើយតបទៅ នឹងយុទ្ធសាស្ត្រចតុកោណដំណាក់កាលទី ២ របស់រាជរដ្ឋាភិបាលនីតិកាលទី៤ នៃរដ្ឋសភា ៕
ចែករំលែកព័តមាននេះ