ខេត្តព្រះវិហារ ៖ កាលពីព្រឹកថ្ងៃទី១៣ មិថុនា សិស្សសាលាបឋមសិក្សាស្រុកឆែប ប្រមាណ៧នាក់មានប្រុសមានស្រី បានដួលសន្លប់និងខ្លះទៀតមានអាការៈទន់ដៃ ទន់ជើង បន្ទាប់ពីសិស្សទាំង៧នាក់ក្នុងម៉ោងសម្រាកពីការសិក្សា បានទៅទិញផ្លែឪឡឹក ដែលលក់នៅ
ខេត្តព្រះវិហារ ៖ កាលពីព្រឹកថ្ងៃទី១៣ មិថុនា សិស្សសាលាបឋមសិក្សាស្រុកឆែប ប្រមាណ៧នាក់មានប្រុសមានស្រី បានដួលសន្លប់និងខ្លះទៀតមានអាការៈទន់ដៃ ទន់ជើង បន្ទាប់ពីសិស្សទាំង៧នាក់ក្នុងម៉ោងសម្រាកពីការសិក្សា បានទៅទិញផ្លែឪឡឹក ដែលលក់នៅក្បែរសាលា យកមកនាំគ្នាហូបបានមួយសន្ទុះ ក៏មានអការៈពុលតែម្តង ត្រូវបានលោកគ្រូអ្នកគ្រូ ដឹកយកទៅសង្គ្រោះនៅមណ្ឌលសុខភាពស្រុកឆែបភ្លាមៗ ។
បើតាមការបញ្ជាក់ពីលោកវរសេនីយ៍ឯក ឆយ បូរិន នាយសេនាធិការដ្ឋាននៃស្នងការដ្ឋាននគរបាលខេត្ត បានឲ្យដឹងនៅរសៀលថ្ងៃទី១៣ មិថុនា ថា បន្ទាប់ពីមានករណីសិស្សសាលាពុលផ្លែឪឡឹក សមត្ថកិច្ចក៏បានចុះទៅដល់គោលដៅ ដោយបានយកសំបកឪឡឹកដែលក្មេងៗហូបរួច យកមកពិនិត្យឃើញថា វាពិតជាមានសារជាតិថ្នាំស្រោចផ្លែឪឡឹកនៅតាមចម្ការ ទើបបង្កឱ្យពុល ព្រោះមិនបានលាងទឹកឱ្យស្អាតសំបក មុននឹងហូប ។
ដោយឡែក សមត្ថកិច្ចនៅទីនោះបានឲ្យដឹងថា បន្ទាប់ពីមានករណីពុលផ្លែឪឡឹកភ្លាម សមត្ថកិច្ចក៏បានចុះទៅពិនិត្យដល់ទីតាំងលក់ផ្លែឪឡឹកផ្ទាល់តែម្តង ដើម្បីត្រួតពិនិត្យ ប៉ុន្តែពុំបានរកឃើញផ្លែឪឡឹកផ្សេងទៀត មានផ្ទុកសារជាតិថ្នាំពុលនោះទេ ។ រីឯផ្លែឪឡឹកដែលសិស្សសាលាបានទិញយកទៅបរិភោគនោះ វាពិតជាចៃដន្យណាស់ ដែលផ្លែឪឡឹកមួយគោយន្តប៉ះចំលើឪឡឹក១ផ្លែ ដែលមានជាតិថ្នាំបណ្តាលឲ្យពុល តែពុំបណ្តាលឲ្យការពុលនោះធ្ងន់ធ្ងរខ្លាំងទេ ។
ជាមួយគ្នានេះ អាជ្ញាធរក៏បានស្នើឲ្យលោកគ្រូអ្នកគ្រូពន្យល់ណែនាំបន្ថែមទៀត ដល់សិស្សានុសិស្សទាំងអស់ អំពីការបរិភោគចំណីអាហារ ឲ្យមានអនាម័យល្អ ជាពិសេសបានស្នើឲ្យអ្នកលក់ដូរទាំងអស់ នៅតាមសាលារៀន ត្រូវគិតគូរពីសុវត្ថិភាពរបស់កុមារជាចម្បងផង សំខាន់គឺអនាម័យសំបកផ្លែឈើ មុននឹងដាក់លក់ ។
សូមបញ្ជាក់ថា ក្រោយពីបាននាំយកក្មេងៗរងគ្រោះទាំង៧នាក់ប្រុសស្រីទៅសង្គ្រោះទាន់ពេលវេលា មកដល់ពេលនេះ ក្មេងៗទាំងអស់នោះ មានសភាពធូរស្បើយវិញហើយ នឹងត្រូវបានអាណាព្យាបាល មកទទួលយកទៅផ្ទះរៀងៗខ្លួនវិញនៅថ្ងៃដដែល ៕
ចែករំលែកព័តមាននេះ